ЗОРЛАУ ОРТАША АУЫРДАН АУЫР ҚЫЛМЫС ҚАТАРЫНА АУЫСТЫРЫЛДЫ
Мемлекет басшысы «Қазақстан Республикасының кейбір заңнамалық актілеріне қылмыстық, қылмыстық-процестік заңнаманы жетілдіру және жеке адам құқықтарының қорғалуын күшейту мәселелері бойынша өзгерістер мен толықтырулар енгізу туралы» заңға қол қойды. Бүгін БҚО полиция департаментінде өткен брифингте қылмыстық, қылмыстық-процестік заңнама, әкімшілік-құқықбұзушылық туралы Кодекске енгізілген өзгерістер түсіндірілді.
БҚО Полиция департаменті бастығының орынбасары Асхат Теміржанов Қылмыстық Кодекс бойынша енгізілген өзгерістерді таныстырды.
Өзгеріс енгізіліп отырған баптардың бірі – Қылмыстық Кодекстегі 120 (Зорлау) және 121-баптарына (Сексуалдық сипаттағы зорлық-зомбылық әрекеттері) қатысты. Заңнаманың 1 тармағы бойынша бұған дейін 3-5 жыл аралығында бас бостандығынан айыру жазасы қолданылып келсе, енді ол 5-8 жыл аралығында бас бостандығынан айыру түріндегі жаза қолданылмақ. Әрі зорлау орташа ауырдан ауыр қылмыс қатарына ауыстырылған. Бұл бап бойынша тараптардың ымыраласуына жол берілмейді. Енді балаларға қатысты жасалған зорлау қылмыс аса ауыр қылмыс деп танылады.
Балаларды зорлау және оларға қатысты зорлық әрекеттерін жасағандарға 20 жылға дейін немесе өмір бойы бас бостандығынан айыру жазасы беріледі. Сондай-ақ кәмелетке толмағандарға қатысты жасалған жыныстық зорлық қылмысын жасаған тұлғаларға қатысты жаза да қатаңдатылып, 6 жылға дейін бас бостандығынан айыру жазасы қаралып отыр. Бұған дейін бұл әрекет ауыр қылмыстар қатарына жатқызылмағандықтан, жауапкершілік қарастырылмаған болатын.
Версия для печати
Пікір үстеу