07 Желтоқсан 2023 2787
Көңіл айтамызМәңгілік мекеніңіз, соңғы сапарыңыз жұмақ болғай, ел абызы!
Осы аптаның 5 желтоқсаны күні Ақ Жайық өңірі тағы бір ардақты азаматынан айырылып қалды. Ол – Мемлекет және қоғам қайраткері, республикаға танымал тұлға, саясаткер, еліміздің өркендеуіне зор үлес қосқан мықты басшы, «Батыс Қазақстан облысының Құрметті азаматы», отбасының үлгі тұтар асқар тауыЕсқалиев Нәжімеден Ықсанұлы болатын. Осы қаралы қазаға байланысты облыс әкімі Нариман Төреғалиев Есқалиевтер әулетіне қайғырып көңіл айтты.
– Құрметті Ғали Нәжімеденұлы және Есқалиевтер әулеті! Бүгін киелі өлкеміз Ақ Жайық пен кең байтақ Қазақ елінің өркендеп дамуына айрықша үлес қосқан азамат, Мемлекет және қоғам қайраткері, дипломат Есқалиев Нәжімеден Ықсанұлы өмірден озды. Біз, барша Ақ Жайық жұрты атынан қайраткер азамат, танымал тұлға Нәжімеден Ықсанұлының қайтыс болғаны туралы қаралы хабарды терең күйзеліспен қабылдадық. Нәжімеден Ықсанұлының өмірі мен еңбек жолы ел мүддесіне деген адалдықтың, Отанға қалтқысыз қызмет етудің үлгі-өнегесі. Нәжімеден Ықсанұлы білім-білігі жоғары мамандар толқынын қалыптастырған мемлекетшіл тұлға, сонымен қатар жұбайы Ырысты апай екеуі өнегелі, елжанды перзенттер тәрбиелеген отбасының отағасы. Біздің бұл уәжімізге Ғали Нәжімеденұлы, сіздің еңбек жолыңыз айқын дәлел, айшықты мысал, – дей келе өңір басшысы орны толмас қайғыға ортақтаса отырып, Батыс Қазақстан облысы халқының және өзінің атынан марқұмның ағайын-туыстарына көңіл айтатынын жеткізді.
Нәжімеден Есқалиев 1941 жылы Астрахан облысы Краснояр ауданы Бәйбек ауылында дүниеге келген. 1966 жылы Қазақ ауыл шаруашылық институтын бітірген. 1966-1972 жылдары Жәнібек ауданындағы «Талов» кеңшарында агроном, 1972-74 жылдары Жәнібек ауданы ауыл шаруашылық басқармасының бастығы, 1974-1978 жылдары Орал облысы ауыл шаруашылығы басқармасы бастығының 1-орынбасары қызметтерін атқарды. Н.Есқалиев 1978-1980 жылдары Мәскеудегі Халық шаруашылық академиясының тындаушысы болды. 1980-1985 жылдары Талдықорған облысы ауыл шаруашылығы басқармасының бастығы, кейін Талдықорган аудан партия комитеті төрағасының 1-хатшысы, 1985-1986 жылдары Орал облысы атқару комитетінің 1-орынбасары, 1986-1991 жылдары Орал облысы партия комитетінің 1-хатшысы, 1991-1992жылдары Орал облысының кеңесінің төрағасы,1992-1993 жылдары Орал облысының әкімі, 1993-1994 жылдары Көкшетау облысының әкімі қызметтерін атқарды. 1994-1999 жылдары дипломаттық қызметте болды. (Қазақстанның Өзбекстандағы және Украинадағы елшісі). 1999 жылдан ТМД елдері атқару комитетіндегі Қазақстанның уәкілі қызметін атқарды.
Сондай-ақ, тоқсаныншы жылдары өлкедегі қазақ басылымын көбейтуге зор үлес қосып, Орал қалалық апталық қоғамдық-саяси«Жайық үні» газетінің ашылуына атсалысқан ұлт жанашыры, насихатшысы бола білді. Өңірдің мәдениеті мен өнерінің дамуына да, жас таланттардың өсуіне де қамқорлық көрсетті.
«Ер есімі-ел есінде» демекші, биік адамгершілік пен парасатты өмір сүріп, айналасына ізгі жандарды жинап, бар күш-жігерін еліміздің дамуына арнап, отбасында жан-жары мен ұл-қызы сыйлайтындай үлгілі әке де, ата да бола білген, өз дара жолымен жүрген Нәжімеден Ықсанұлын соңғы сапарға шығарып салу рәсімі 7 желтоқсан күні А.Н. Островский атындағы орыс драма театрында өтті. Қаралы қазаға өңір басшылары мен қарапайым халық өте көп жиналды. «Жайық үні» газетінің әлеуметтік желілерінде де Шолпан Қыдырниязова, алматылық Ғарифолла Көшенов, Донеділ Қажымовсынды көптеген өнер қайраткерлері, іні-қарындастары, жерлестері Есқалиевтер жанұясына арнап жүрек толқытар сөздерімен көңіл шерін тарқатты.
Білімі мен зердесі терең, кісілігі мол, көргені мен түйгені көп, биік таудай тұлғалы азамат, өнегелі ақсақалдың жарқын бейнесі мен есімі ел жадында ұзақ сақталары анық. Елге сыйлы Абызымызды Алла тағала алдынан жарылқап, панасына алғай.
Бақұл болыңыз, қош болыңыз, Нәжімеден аға! Мәңгілік мекеніңіз, соңғы сапарыңыз жұмақ болғай, ел АБЫЗЫ!
Мира ХАМЗАҚЫЗЫ
Версия для печати
Кіру
