КіруКРУГЛООЗЕРНЫЙ КЕНТІНІҢ ӘКІМШІЛІГІ КӨШІРІЛЕ МЕ?
«Ашық әкімдік» акциясы аясында бүгін Орал қаласы әкімі Мұрат Мұқаев және қалалық бөлім, коммуналдық мекеме басшылары Круглоозерный және Серебряков елдімекені тұрғындарының мәселелеріне құлақ түріп, қабылдау өткізді.
Статистикалық мәліметтер бойынша қос елдімекенде қазіргі уақытта 6404 адам тұрады. Соңғы жылдары ауылда көптеген игі жұмыстар жасалды. Бірнеше жыл күрмеулі мәселе болған Круглоозерный ауылының кіреберіс жолы жасалып, ауылішілік жолдар асфальтталды. Десек те, өркениетке ұмтылған кентте мәдениет үйі жоқ. Ауыл ақсақалы Бәтуә Дүйсенбаевтың қабылдауға келгендегі мәселесі сол.
– Бұл мәселемен жұмыстанудамыз. Қазір осындағы ТУСМ-14 ғимаратын Мәдениет үйіне айналдыруды жоспарладық. Жекеменшікте болғандықтан, қаржы мәселесін шешу жолдарын қарастырудамыз. Бірер жылда реттеледі деп айту қиын. Дегенмен, мемлекет меншігіне алғаннан кейін жоба жасап, күрделі жөндеу жүргіземіз. 2020 жылға қарай қолданысқа берілетін болады, – деді шаһар басшысы Мұрат Рахметұлы.
Гүлнара Кушмұханованың базынасы – баспанасының бабы. Бұрынғы білім ұясы ғимаратында тұратын ол үйлерінің апатты жағдайда тұрғанын жеткізді. Советский көшесі 78 мекенжайындағы бұл үй 7-8 пәтерлі. Қазіргі уақытта онда үш отбасы ғана тұрады. Басқалары құлаудың аз-ақ алдында тұрған үйлерінен көшіп кеткен. Мұрат Мұқаев үйді апатты деп тану үшін арнайы комиссия жіберілетінін, сәйкесінше үй тұрғындары кезекке алынатынын айтып, бұдан басқа жаңа баспана алудың жолдарын түсіндіріп берді.
Наталья Кузнецова да қабылдауға үй мәселесімен келді. Ауыр науқасқа шалдығып, осыдан 15 жыл бұрын ота жасатқаннан кейін көру қабілетінен айырылған қызы Любовь І топ мүгедегі ретінде үй кезегіне тұрған. Кезекті күтумен арада 10 жылдан астам уақыт өтіпті. Өз тексерген соңғы деректерде кезегі 130-ға түскен. Наталья Григорьевна қызының күндізгі уақытта үйде жалғыз қалатынын және жер үйде тұру оған қиын екенін жеткізді. Мұрат Рахметұлы кезекте тұрғандарға пәтер заңды ретпен берілетінін және соңғы жылдары шаһарда кезектегілер үшін үй құрылысы қарқынды жүргізіліп жатқанын айтып, екі-үш жыл ішінде үйге қол жеткізе алатынына сендірді.
Кенттік округтің әкімшілік ғимараты қазіргі уақтытта Серебряковта орналасқан. Алдағы уақытта әкімшілік Круглоозерный ауылына көшірілуі мүмкін. Бұл мәселені ардагерлердің бір тобы қолдаса, серебряковтықтардың әкімдік көшірілсе, көзден таса қаламыз деген уайымдары бар. Қалаға қатынайтын автобустар да уақытымен жүрмейтін көрінеді. Сондықтан кей кездері студенттер мен қалада жұмыс жасайтындар үш есе шығынданып, таксимен жүруге мәжбүр. Осы және басқа да мәселелермен қабылдауға жалпы 21 тұрғын келді. Кент әкімі Кенесары Нұршинов қабылдауда көтерілген барлық сұрақтар үнемі қала жəне кент əкімдігінің бақылауында болатынын айтты.
Эльмир НҰҒМАНОВА
Версия для печатиСоңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу