КіруХАЛЫҚ ПЕН БИЛІКТІҢ АШЫҚ АЛАҢЫ
Х.Бөкеева атындағы қазақ драма театрында өткен «Нұр Отан» партиясына – 20 жыл» және Мәслихаттардың құрылғанына 25 жыл толуына орай салтанатты шарада әр шақырымдағы түрлі деңгейдегі депутаттар марапатталды. Салтанатты шараға облыс әкімі Алтай Көлгінов қатысып, халық қалаулыларын мерейтойларымен құттықтады.
– Тәуелсіз еліміз үлкен тарихи кезеңді бастан өткеруде. Мемлекетімізді азат ел ретінде қалыптастырған әлемдік деңгейдегі саяси қайраткер Нұрсұлтан Әбішұлы Назарбаевтың атқарған еңбегі тұтас бір тарихи кезеңді қамтиды. «Алдымен экономика, содан кейін саясат» ұстанымы өз жемісін беріп келеді. Экономикамыздың тұрақты даму ырғағы қалыптасқанына, еліміздің ішкі бірлігіне әбден көз жеткізген Елбасы өзінің тағдыршешті шешімімен, дәстүрлі сабақтастық ұғымын бәрімізге терең түсіндіріп берді. Себебі біздің ұлтымыздың табиғаты эволюциялық дамуға бейім. Нұрсұлтан Әбішұлының еселі еңбегінің нәтиесінде еліміздің ішкі, сыртқы саясатымыз қалыптасып, шетелдік инвестициялар тартылып экономикамыз бой тіктеген 1995 жылы Қазақстан Республикасының жаңа Конституциясы қабылданды. Мемлекеттің құрылымын түбегейлі өзгерді. Мәслихаттардың құрылуы сол өзгерістердің бастауы болатын. Бүгінгі таңда әр деңгейдегі мәслихаттар халық пен билік арасын берік жалғап, өңірдің дамуы мен тұрғындардың әл-ауқатын арттыруға бағытталған істерді келісе атқаруға арналған ашық алаңға айналды.
Бұл құрылымның басты ерекшелігі – әр тұрғын өз атынан немесе сенім білдірген тұлғасы арқылы өз өңірінің немесе тұрғылықты жерінің түйіткілдерін шешуге атсалыса алатындығында. 2019 жыл – «Нұр Отан» партиясының 20 жылдығымен тұспа-тұс келіп отыр. «Нұр Отан» – елімізді алға жетелейтін табыс пен жетістіктердің партиясы. Партияның кезекті XVIII съезінде еліміздің Тұңғыш Президенті Нұрсұлтан Әбішұлы Назарбаев: «Біз – халық бірлігінің партиясымыз. Бас партия болу дегеніміз – басқару емес, елге адал қызмет ету!» деп, партияның ерекше рөлін атап өтті. Біз бұл бағыттан айнымай, еалқымыздың әл-ауқатын арттыру жолындағы қызметімізді одан әрі жалғастыратын боламыз. Бүгінде облыстық мәслихатта 6-шақырылымның депутаттары жұмыс істеуде. Қоғамдық жұмыс ретінде бұл мандаттарына ешқандай жалақы алмайды. Елбасы тапсырмасына сай, көптеген қоғамдық маңызды істерді шешуге белсенді атсалысуда. Ширек ғасырдан астам уақыт ішінде Тәуелсіз еліміздің қарыштап дамып, өзге елдермен терезесін теңестіруі біріншіден Тұңғыш Президентіміз – Елбасымыз Нұрсұлтан Әбішұлы Назарбаевтың саясатының нәтижесі болса, екіншіден осы жылдары өңірлерді басқарған тұлғалар мен әр деңгейдегі мәслихат депутаттарының қажырлы еңбегі деп білемін. Сол үшін де туған елінің келешегі үшін аянбай тер төккен өңіріміздің барша халық қалаулыларына зор алғысымды білдіремін, – деп салтанатты шараны ашқан облыс әкімі Алтай Сейдірұлы бірқатар депутаттарды Қазақстан Республикасының Парламенті Сенатының Алғыс хатымен, Батыс Қазақстан облысының «Құрмет грамотасымен» марапаттады.
Қазақстан Республикасының Жоғарғы Кеңесі 1993 жылы 10 желтоқсанда Қазақстандағы «Жергілікті өкілді және атқарушы органдар туралы» Заң қабылданды. Осы заңға сәйкес, өкілді органдар ретінде мәслихаттар танылды. Осы орайда Батыс Қазақстан облыстық мәслихатының хатшысы Мәлік Құлшар мәслихаттардың тарихына тоқталды. Мәлік Иманқұлұлының айтуынша, 1994 жылы 7 наурызда елімізде алғашқы рет жергілікті өкілді билік органдары – мәслихат жиналысына депутаттар сайлауы өткізілді. Наурыз айы ішінде облыстық, Орал қалалық және аудандық мәслихаттар алғашқы ұйымдастыру сессияларын шақырды. Содан бері 7 наурыз – Қазақстан Республикасы мәслихаттарының алғашқы сайланған туған күні ретінде қабылданады. Бұл оқиғаның еліміз өміріндегі маңызы зор болды, өйткені кеңестер орнына жаңа органдар сайлау – саяси санадағы жаңа толқыныс, демократиялық дамуға жасаған жаңа қадам болып табылды. Мәслихаттарды қалыптастырудың басты әлеуметтік құндылығы – азаматтардың жергілікті билікті қалыптастыру процесіне тікелей қатысуларына мүмкіндік жасалуында. Еліміздің қиындықтарды еңсере отырып дамуымен, халқымыздың әлеуметтік – экономикалық жағдайы да біркелкі жақсара түсті. Сондықтан да жергілікті атқарушы органдармен бірлесе әрбір шақырылымдағы мәслихаттар қоғамдағы күнделікті экономикалық және әлеуметтік мәселелерді шешуде маңызды рөлге ие болып қала берді.
«Nur Otan» партиясының құрылғанына биыл 20 жыл толып, мерейлі межеге қадам басты. 1999 жылғы 1 наурыз егемен еліміздің жылнамасына партиямыздың негізі қаланған күн ретінде енді. Алғашқы сәттен-ақ партия құрамына 164 мың адам мүше болған. Партияның Сайлауалды бағдарламасында айқындалған көрсеткіштерге жергілікті жерде қол жеткізу қадағалауда. Жиында сөз алған «Нұр Отан» партиясы Батыс Қазақстан облыстық филиалы төрағасының бірінші орынбасары Серік Сүлеймен жергілікті атқарушы органдардың жұмысы облыстық мәслихаттағы 26 депутаттан тұратын фракция арқылы анықталып, қажеттілігіне қарай Саяси кеңесте немесе Саяси кеңес Бюросында қаралып жүргенін атап өтті.
– Биылғы жылдан бастап, партияның қызметін жаңғырту аясында «Рухани жаңғыру», «Цифрлы Қазақстан» бағдарламаларын жүзеге асыруға, шағын және орта бизнесті қолдауға бағытталған жаңа 20 партиялық жоба іске асырылуда. Осы бағытта бірлесіп жұмыстану мақсатында партияның облыстық филиалымен облыстық кәсіпкерлер палатасы, уәкілетті мемлекеттік органдармен үш жақты меморандумдарға қол қойылды. Нәтижесінде, облысымызда «Балалар үшін тегін IT-сынып» партиялық жобасы аясында облыс бойынша 17 IT класс ашылып, 1500 оқушы білім алуда. Биыл өңірімізде 50 ІТ сыныптар ашылады. Партияның «Заманауи білім орталықтары» жобасы аясында кітапханаларды қазіргі заманғы коворкинг және білім орталықтарына айналдыруды қолға алдық. Бүгінде облысымызда жастарға арналған 7 коворкинг орталық жұмыс жасауда. Тілдің үштұғырлылығына өту жобасы аясында ауыл балалары үшін ағылшын тілін оқыту жөніндегі арнайы жазғы 20 стационарлық лагерлер ашылып, онда 2000-нан астам бала оқытылды. «Нұр Отан» партиясы «Жас Отан» Жастар қанаты және «Болашақ» Қауымдастығы «English for Jastar» жаңа жобасы жүзеге асуда. Жоба аясында облыс бойынша 10 жергілікті студент еріктілерімен ауылдық жерлерде 600-ге жуық оқушы ағылшын тілін үйренді. «Nur Otan» партиясының кезекті XVIII съезінде «Бақуатты қоғам: онжылдықтың 10 мақсаты» «Нұр Отан» партиясының 2030 жылға дейінгі бағдарламасы қабылданды. Бағдарламада партиямыздың алдағы он жылға арналған күн тәртібі көрсетілген. Бұдан басқа партия жұмысының келесі бағыты ретінде Елбасының съезде айтқан төрт нақты жобасы өз жұмысын бастады. Олардың біріншісі – «Бақытты отбасы жобасы». Бұл бастама алдымен аз қамтылған және көпбалалы отбасыларға қолдау көрсету мақсатында қолға алынып отыр. Жоба аясында партияның қоғамдық қабылдау бөлмелері мен филиалдары арқылы мұқтаж жандарға нақты көмек көрсетілуде. «Құтты мекен» жобасы алдымен ауылдық жерлердің инфрақұрылымын дамытуға бағытталса, «Ауыл – ел бесігі» жобасы да ауылдарды дамытып, жұмыс орындарын ашып, жайлы өмір сүруге қолайлы жағдай жасауды көздейді. «Халыққа көмек» жобасы халыққа жедел әрі нақты әлеуметтік көмек көрсетуді көздейді, – деді Серік Кенжебекұлы.
Салтанатты шарада ел дамуына елеулі үлес қосқан халық қалаулылары Қазақстан Республикасы Парламенті Мәжілісінің «Алғыс хатын», Батыс Қазақстан облысының «Құрмет грамотасын» иеленді. Кеш соңы облыс өнерпаздарының концертіне жалғасты.
Кәусар БАЙҒАЛИЕВА
Версия для печати
Соңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
«Су тасқынынан зардап шеккендерге өтемақы төлеуде жеделдік қажет»
су тасқынының алдын алу жұмысына 1 577 техника жұмылдырылды
Батысқазақстандық полиция қызметкерлеріне гуманитарлық көмек жіберілді
Пікір үстеу