КіруДОСТЫҚТА ШЕКАРА ЖОҚ
Орал қаласында «Ақ Сарай» кешенінде облыстық жастар саясаты мәселелері басқармасының ұйымдастыруымен екі елдің достығын одан әрі нығайту мақсатында «ДОСТЫҚТА ШЕКАРА ЖОҚ: Жастар. Диалог. Мәдениет» атты халықаралық шекара маңы ынтымақтастығы форумы өтті. Форумға еліміздің барлық өңірінің және Ресей Федерациясының шекаралас аймағыныңбелсенді жастары, республикалық және облыстық жастар ұйымдарының өкілдері қатысты.
Форум халықаралық өңіраралық жастар ынтымақтастығын кеңейту, тату көршілік қарым-қатынастарды нығайтып, үздік әдістемелер, жобалармен алмасу, жастар саясаты, мәдениет, кәсіпкерлікті қолдау салаларында жастар ұйымдарының тәжірибелерін зерттеуді көздеді. Форум барысында қатысушылар үздік әдістемелік жобалармен өзара пікір алмасып, мәдениет, кәсіпкерлік қолдау салаларында жастар ұйымдарының тәжірибелерін зерттеуге арналған іскерлік кездесулерге қатысты. БҚО Жастар саясаты мәселелері басқармасының басшысы Аян Сақошевтың айтуынша, негізгі мақсат – жастар саясаты мәселелері саласындағы тәжірибелермен бөлісу. – Биылғы жыл «Жастар жылы», соған орай бүгінгі жастардың алдында тұрған міндеттер, олардың өз мақсаттарына жету жолдарын білу үшін дәл осындай диалогтық алаң құру аса маңызды болып табылады. Форум жастар бастамаларына тең және қолжетімді жағдай жасауды көздейді. Әсіресе, екі ел жастарының бірлесе жасалған жұмыстары нәтижесіндегі тың жобаларды жүзеге асыруға басымдық берілді. Форум аясында түрлі шаралар, оқыту семинарлары ұйымдастырылды. Сондай-ақ «Үздік тәжірибелер аймағы» секциялық жұмысы болды. Бұл жерде қазақстандық және ресейлік үздік жастар мәселесін шешуге бағытталған жобалар таныстырылды. Сол жобаларды қалай жүзеге асырады, қандай мәселелер бар, соны болашақта талқылау болады, – дейді ол. TEDx форматындағы пленарлық отырыста маркетолог, «MarketologBlog» телеграмм каналының жүргізушісі Әлімжан Бисембаев, «Астана Хаб IT стартап халықаралық технопаркінің маркетингі және PR департаментінің директоры Даниэль Душманов, «AlmaU» бизнес инкубаторының директоры Данияр Медетов, «Samruk – Kazyna Trust» әлеуметтік жобалар даму қорының корпаративтік коммуникация департаментінің директоры Мирас Иргебаев, «PIPL Networking Bureau Women’s Entrepreneurship Day Ambassador in CA and CIS» негізін қалаушы Мерей Мустафиналар мәдениетаралық ықпалдастық, табысты стартап және бизнес жобалар мысалы, әлеуметтік жобалар, блогосфераны дамыту және басқа да тақырыптарда баяндама жасады. Пленарлық мәжілістен соң спикерлер кейс-стади, тренинг форматтарында секциялық жұмыстар өткізді.
Форум шеңберінде Ресей Федерациясының жастар саясаты саласындағы өкілетті органдары мен республикалық жастар ұйымдары және облыстық жастар ұйымдары арасында өзара ынтымақтастық пен достық туралы екіжақты меморандумға салтанатты жағдайда қол қойылды. Меморандум екі елдің достығын нығайтып, оған жастар саясаты жұмысын жақсарту, жастар ұйымдары жұмысын жетілдіру бойынша бірлескен бастамаларды жүзеге асыруға ықпал етпек. Үш күнге созылған форумға еліміздің және Ресейдің шекаралас аймағынан 300-ге тарта белсенді жас қатысты. Осы күндері қатысушылар қаланың көрікті жерлерін аралап, спорттық және мәдени көпшілік шараларға атсалысты. Достық үйіне барып, Қазақстан халқы Ассамблеясының жұмысымен танысып, Жоғары аграрлық техникалық колледжіндегі Bim технологиясы орталығын тамашалады. Сондай-ақ Оқушылар және жастар сарайында Жастар саясаты саласына қатысты жобалармен танысты.
Кәусар БАЙҒАЛИЕВА
Салтанат ТҰМАНБАЕВА, БҚО бойынша «Болашақ» корпоративтік қорының директоры:
– Форум жұмысы қоғамдағы аса өзекті мәселелерді және оларды шешу бойынша тиімді мысалдарды талқылауға, шекара маңындағы аумақтар үшін маңызы зор әлеуметтік жобалар, кәсіпкерлік, мәдениетаралық тәжірибе алмасу, ұзақ мерзімді өзара тиімді байланыстар орнатуға, жастар әріптестігін дамыт
уға бағытталған. Форум қатысушылары сарапшылардан аса құнды тәжірибе алды деп есептеймін. Спикерлердің өз мақсаттарына қалай жеткені, қандай қиындықтарға тап болғаны, биіктерді қалай бағындырғаны жөнінде жастар өз ауыздарынан естіді. Сондай-ақ форум қатысушылары face-to-face форматында өз жобаларын спикерлермен бірге талқылап, кәсіби білікті мамандар мен сарапшылардан ақыл-кеңестер алды. Форум форматына бүгінгі жастардың білім алуы мен жұмыспен қамтылуын талдау призмасы арқылы ұрпақтар сабақтастығындағы ерекшеліктер мәселелерін қарастыру енгізілді. Қатысушылар шығармашылық және кәсіпкерлік ой-өрістерін қолдану арқылы тәжірибе және білімдерін алмасты. Бұл жастардың жеке тұлға ретінде өсуіне, кәсіби тұрғыда қалыптасуына үлкен үлес қосады деп ойлаймын. Форум арқылы шекара маңындағы жастар арасындағы әріптестік мәселелерін оң шешу динамикасын қалыптастыру, мәдени даму және ағарту мақсатындағы платформалар құру, жас кәсіпкерлердің көрші елдер аумағында бизнес жобаларды дамытуы үшін жағдай туғызу, өңірдерде сапалы әлеуметтік жобалардың санын көбейту күтілуде.
Гүлдана РАЙСОВА, «ҚазИИТУ» ғылыми-білім кешенінің тәрбие және әлеуметтік жұмыстар жөніндегі бөлім маманы:
– Форумға «ҚазИИТУ»-дың белсенді жастары аса қызығушылықпен қатысты. Маған маркетолог Әлімжан Бисембаевтың өз саласы бойынша оқыған баяндамасы ұнады. Жалпы, нарык, нарықта ең бастысы тұтынушыға керек тауарларды сату жөніндегі ойларын ортаға салып, бағдарламалар және олардың қалай жұмыс істейтіні жөнінде құнды ақпараттармен бөлісті. Биыл Жастар жылы аясында өңірімізде жастарға бар жағдай жасалып, қолдау жасалуда.
Соңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Астанадан Батыс Қазақстан облысына гуманитарлық көмек жіберілді
«Су тасқынынан зардап шеккендерге өтемақы төлеуде жеделдік қажет»
су тасқынының алдын алу жұмысына 1 577 техника жұмылдырылды
Пікір үстеу