КіруБАЛАЛАР МЕРЕКЕСІНЕ АРНАЛҒАН СПОРТ ЖАРЫСЫ ӨТТІ
Бүгін қалалық мәдениет және демалыс саябағының оң жағалауының спорттық алаңында «1 маусым – Халықаралық балаларды қорғау күні» мерекесіне орай облыстық отбасы үлгісіндегі балалар ауылының тәрбиеленушілері арасында шағын футбол және арқан тартыстан жарыс ұйымдастырылды. Айта кетейік бұл ойын – биылғы жылдың саябақтағы маусым ашар ойыны.
Шараның мақсаты – балалар үйі тәрбиеленушілері арасында спорт және дене тәрбиесін дамыту, салауатты өмір салтын насихаттау, өскелең ұрпақтың патриоттық тәрбиесін күшейту, балаларды тұрақты түрде спортпен шұғылдануға баулу.
Спорттық бәсекені тамашалауға Орал қаласының дене шынықтыру және спорт бөлімінің бас маманы Артур Шерғалиев, БҚО Street lifting федерациясының президенті Асқар Досқалиев, Циклдық спорт меңгерушісі Қанат Жанғалиев және Орал спорт клубының өкілі Орынтай Абуов қатысты.
– Бүгінгідей шаралардың басты мақсаты –балаларға спортпен айналысуға деген сенім мен ынта беру. Балалар үйінде дарынды балалар өте көп. Ал біздің міндетіміз оларға жәрдемдесіп, болашақта бағыт-бағдар табуына көмектесу. Мен сіздердің араларыңыздан еліміздің мақтанышы мен басқаларға үлгі болатындай спортшылар шығатынына сенімдімін, – дейді Орал қаласының дене шынықтыру және спорт бөлімінің бас маманы Артур Шерғалиев. Сонымен қатар мамандар спорттың нақты түрімен айналысуға ниет білдірген балалармен сұхбат жүргізіп, спорт үйірмелеріне орналастыру мүмкіндіктері жөнінде де кеңес берді.
Мерекелік спорттық шара соңында балаларға жарыстың демеушілері – БҚО Street lifting федерациясының президенті Асқар Досқалиев тәттілер ұсынды. Қысқы спорт түрлерінен облыстық балалар-жасөспірімдер спорт мектебі атынан – биылғы сырғанау маусымына Мұз спорт сарайында көпшілік сырғанауға тегін абонементтер және спорт бөлімінен естелік сыйлықтар табысталды. Саябақтың оң жағалауында жеке кәсіпкер балаларға тегін велосипед тебу сағатын ұйымдастырылды.
Соңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Астанадан Батыс Қазақстан облысына гуманитарлық көмек жіберілді
«Су тасқынынан зардап шеккендерге өтемақы төлеуде жеделдік қажет»
су тасқынының алдын алу жұмысына 1 577 техника жұмылдырылды
Пікір үстеу