БҚО-ДА ЖҰМЫС ЖАСАЙТЫНДАР АРАСЫНДА ИНФЕКЦИЯ ЖҰҚТЫРҒАНДАР КӨБЕЙДІ

Бұл туралы кеше, 17 қараша күні облыс әкімі Ғали Есқалиевтің төрағалығымен коронавирусқа қарсы облыстық жеделштабтың отырысында облыстың басмемлекеттік санитариялық дәрігері Мұхамғали Арыспаев мәлім етті.

Облыстағы эидемиологиялық ахуал тұрақсыз. Қараша айы басталғалы коронавирус инфекциясымен 503 науқас тіркелген. Бұл қазан айымен салыстырғанда 67 пайызға көп. Көп жағдайда ауру белгілері байқалмаған науқастардың саны артқан. Науқастардың 71 пайызы Орал қаласында тіркелген. Сонымен қатар Ақжайық, Бөрлі, Теректі, Шыңғырлау, Жаңақала аудандарында көбірек. Облыстық тауарлар мен көрсетілетін қызметтер сапасы мен қауіпсіздігін қадағалау департаментінің басшысы Мұхамғали Арыспаев атап өткендей, сараптама жүргізу кезінде анықталған аурулардың көпшілігі қарым-қатынас кезінде жұқтырғаны белгілі болып отыр.

– Қазіргі көрсеткіштің 44 пайызы қарым-қатынас негізінде жұқтырғандар. Яғни біздің тұрғындарымыз әлі карантин талаптарын сақтамайды, маскасыз жүреді. Әсіресе, қоғамдық көліктерде бетперде тақпайды. Қарым-қатынаста жұқтырғандар арасында бір отбасы мүшелері немесе еңбек ұжымдары бар. Екіншіден, ЖРВИ белгілерімен емханаларға жүгінген тұрғындардан Covid-19-ға ПТР-талдау алынып, нәтижесі оң болғандар бар. Ол – 26 пайыз болып тұр. 19 пайызы ем алу мақсатында ауруханаларға келгендерді тексергенде белгілі болса, 8 пайызы жұмысқа бару үшін анықтама алу кезінде тексерілгенде анықталды, – дейді Мұхамғали Қайыржанұлы.

Облыстық бас мемлекеттік санитариялық дәрігердің мәліметінше, қарашада Covid-19 инфекциясы жұмыс жасайтын азаматтардың арасынан көбірек анықталған. Дәлірек айтқанда, барлық тіркелген 503 жағдайдың 204-і жұмыс жасайтындар болып отыр. Сондай-ақ 16 жасқа дейінгі балалар арасында да ауру көрсеткіші қазан айында жетеу болса, ағымдағы айда 70 баладан анықталған.

– ҚР бас мемлекеттік санитариялық дәрігерінің қаулысында «эпидемиологиялық ахуал мүмкіндік берсе, 5 сыныптар үшін де «кезекші сынып» ашуға рұқсат беру» туралы жазылған еді. Дегенмен, біздің өңірде ахуал оған мүмкіндік бермейді. Сондықтан оқу процесі бұған дейін қабылданған форматта қала береді, – деді бас мемлекеттік санитариялық дәрігер.

10 қарашадан бастап екі аптаға шектеу шаралары қабылданған болатын. Сенбі-жексенбі күндері облыс аумағында жалпы 25 санитарлық бекет қойылды. Күшейтілген шектеу шараларын одан әрі жалғастыру мәселесі эпидемиолгиялық жағдайдың ағымына қарай қабылданатын болады.

Эльмира НҰҒМАНОВА,

zhaikuni.kz

Версия для печати