БҚО-ДА БІР ТӘУЛІКТЕ 28 АДАМНАН КОРОНАВИРУСТЫҚ ИНФЕКЦИЯ АНЫҚТАЛДЫ

Қараша айы басталғалы облыста коронавирустық инфекцияның 503 жағдайы тіркелді. 205 жағдайда ауру белгілері бар болса, 298 жағдайда – ауру белгілері жоқ. Батыс Қазақстан облысы бойынша коронавирустық инфекция бойынша эпидемиологиялық жағдай туралы өңірлік коммуникациялар қызметі ұйымдастырған брифингте БҚО тауарлар мен көрсетіетін қызметтер сапасы мен қауіпсіздігін бақылау департаменті басшысының орынбасары Нұрлыбек Мұстаев баян етті.

Облыс бойынша COVID-19 инфекциясының 7527 жағдайы тіркелген, оның ішінде ауру белгілері бар науқастар 3687 болса, 3840 науқаста ауру белгілерінсіз өткен. Сырқаттанушылықтың жалпы көрсеткіші 100 мың тұрғынға шаққанда 1140,5 құрап тұр. Осы кезге дейін індеттен 6961 адам сауығып, өкінішке орай 128 адам қайтыс болды.

1-16 қараша аралығында анықталған 503 жағдайдың басым бөлігі, яғни 360 оқиғасы Орал қаасында тіркеліп отыр. Бәйтерек ауданында – 63 жағдай, Бөрліде– 32, Теректіде – 12, Шыңғырлауда – 10, Жәнібекте – 8, Қазталовта – 7, Жаңақалада – 6, Сырымда – 4, Қаратөбеде – 3, Бөкей ордасы және Ақжайық аудандарында бір-бір жағдайдан тіркелген.

– Аталған жағдайлар жақын қарым-қатынаста болған адамдарды тексеру кезінде 223 адамда, ЖРВИ белгілері бойынша тексерілген 136 адамда, стационарларға емдеуге жатқызу алдында эпидемиологиялық қадағалау мақсатында сынама алынған 99 адамда және профилактикалық мақсатта тексерілген 45 адамда анықталды, – деп нақтылады Нұрлыбек Мұстаев.

БҚО өткен тәулік ішінде коронавирустық инфекциямен 28 жағдай тіркелген. 13 пациентте ауру белгілері бар болса, 15 пациенттің ауру белгілері байқалмаған. Профилактикалық мақсатта тексерілгендер арасында 10 жағдай, қарым-қатынаста болғандар арасында – 9, ЖРВИ белгілерімен тексерілгендер арасында 8, эпидемиологиялық қадағалау мақсатында тексерілгендер арасында 1 жағдай тіркелді.

1 қарашадан 16 қарашаға дейін облысымызда мемлекеттік шекарадан 12047 адам өтті, оның 2267-сі – жолаушы. 224 жолаушының COVID-19-ға тексерілгені туралы анықтамасы болмаған. Олар үш тәулікке карантиндік стационарға орналастырылып, ПТР әдісімен COVID-19 тесті алынды, нәтижесінде төртеуінде тест қорытындысы оң нәтиже көрсетті. БҚО арқылы өткен 2 жақты қатынаста халықаралық жүк тасымалдарын жүзеге асыратын жүргізушілер саны – 4022, оның ішінде 2178 жүргізушінің анықтамалары болған. Ал 1844 жүргізушіде анықтама жоқ болуы себепті олардан ПТР әдісімен COVID-19 тест алынып, қорытындысында тест 17 адамда оң нәтиже көрсеткен.

Эльмира НҰҒМАНОВА,

zhaikuni.kz

Версия для печати