БҚО-ДА АЛТЫ МЕКТЕП ЖАБЫЛАДЫ

Бұл туралы бүгін, 29 шілде күні өңірлік коммникациялар қызметі ұйымдастырған брифингте облыстық білім басқармасы басшысының орынбасары Светлана Темірғалиева айтты.

Спикер брифингте облыстағы білім ұйымдарының жаңа 2021 – 2022 оқу жылына дайындығы және күзгі-қысқы мезгілдерге үздіксіз жұмыс істеуді қамтамасыз мақсатындағы даярлық жұмыстары туралы баяндады. 2021-2022 оқу жылы қарсаңындағы болжамды мәлімет бойынша облыста 372 мемлекеттік күндізгі жалпы білім беретін мектептер жұмыс жасап, оларда 113 мыңнан астам оқушы, 5 жеке мектепте – 618, кешкі мектептерде- 243 білім алады. Оқушылар контингентінің азайып, талапқа сай келмеуіне байланысты 6 бастауыш мектеп жабылады. Олар – Казталов ауданы Ащысай бастауыш мектебі, Бестерек бастауыш мектебі, Аққұрай бастауыш мектебі, Теректі ауданындағы Қоныссай бастауыш мектебі, Шыңғырлаудағы Ұрысай бастауыш мектебі және Жаңақала ауданындағы Плантация бастауыш мектебі.

Сондай-ақ оқушы санына байланысты үш негізгі мектеп бастауыш мектеп болып қайта құрылады. Олар – Ақжайық ауданы И.Тайманов атындағы негізгі  мектеп, Қадырқұл негізгі мектебі және Теректі ауданы Қызылжар негізгі мектебі.

Облыста2021-2022 оқу жылы қарсаңында болжамды мәлімет бойынша 1 сыныпқа 11 202 оқушы қабылданды, құжаттарды қабылдау ағымдағы жылдың 30 шілдесіне аяқталады.  Мемлекеттік тілде 7341, орыс тілінде 3861 оқушы білім алмақ.

Эльмира НҰҒМАНОВА,

zhaikuni.kz