КіруАрда ұлын ардақтады
Халықаралық дәрежедегі спорт шебері, Қазақстанның еңбек сіңірген спорт шебері, КСРО чемпионы, Әлем чемпионы және Әлем кубогының иегері, марқұм Асқар Шайхиевті 29-30 қазан күндері еске алуға арналған самбо және әскери самбодан халықаралық турнирде сарапқа салынған 48 жүлденің жиырмасын батысқазақстандық палуандар иеленді. Қаламызда өткен додаға бес елден 150 спортшы қатысты.
Өмірі мен еңбегі жас ұрпақты тәрбиелеуге лайықты ардақты тұлғалардың бірі – жерлесіміз, самбо күресінен тұңғыш ҚР еңбек сіңірген спорт шебері атанған Асқар Шайхиев. Бозкілемде ешкімге бәс бермеген палуанның жолын бүгінгі ұрпақ табысты жалғастырып келеді. Тәуелсіздік жылдары өңірімізден сан алуан спорт шеберлері, ҚР және Әлем чемпионаттарының, республикалық және халықаралық турнирлердің жеңімпаздары мен жүлдегерлері тәрбиеленді. Осының бәрінде күрес өнерінің қыры мен сырын жіті меңгеріп, белдесуде алдына жан салмаған сырымдық саңлақ Асқар Тастайұлының қолтаңбасы тұр. Аталмыш турнирдегі жүлделердің жартысына жуығын жерлестеріміздің облыс қоржынына салуы – соның айқын дәлелі. Жеті мемлекеттің өкілдері жиналған додада бас қосқан туыстары мен бауырлары дарабоз тұлғаның спортта жүріп өткен жолы, азаматтығы хақында ой бөлісті.
– Еліміз егемендік алған 25 жыл ішінде Елбасының бастауымен қай салада болмасын толайым жетістікке қол жеткіздік. Ұлыларымызды ұлықтауға мүмкіндік алғанымыз осы дербестігіміздің арқасы. Аты әлемге әйгілі самбошы атанған жерлесіміз Асқар Шайхиев өзінің ізін Батыс Қазақстан олысында ғана емес, республика көлемінде, халықаралық дәрежеде қалдырған. Бала кезден спортқа тартымы бөлек Асқар өзін үлкен спортқа арнап, зор жетістікке жетті. Кеңес Үкіметінде құрамаға енудің өзі – үлкен жетістік, әрі жауапкершілік. Жаттығу кезіндегі төгілген тер, айналасындағы қызықтардан өзін тежеу, бар өмірін спортқа арнау оңай емес. Асекең спортпен ғана айналысып қоймай, жан-жақтылығын да көрсетті. Өр мінезді, кең жүректі азаматтың қасиетті қара домбырада, гитарада еркін ойнап, ортаның адамы болғаны әлі күнге ел аузында. А.Шайхиевтің ізімен балалары, бауырлары, ізбасарлары талай мәрте чемпион атанып, өңірде самбоның дамығанын дәлелдеп келеді. Ұрпақтар сабақтастығы деген осы болса керек, – деді облыс әкімінің орынбасары Марат Тоқжанов.
Елі ардақтаған дара саңлақтың жұбайы Аягөз Мәжикенқызы турнирді ұйымдастырған облыс әкімшілігіне, облыстық дене шынықтыру және туризм басқармасына ризашылығын білдіріп, жарысқа қатысушы спортшыларға Асқар Тастайұлының жетістігін тіледі.
Бозкілемдегі белдесуді 48 келі салмақтағы палуандар бастады. Екі күн бойы Армения, Қырғызстан, Қытай, Өзбекстан, Ресей, Тәжікстан елдерімен қатар еліміздің Алматы, Ақтөбе, Атырау, Маңғыстау, Оңтүстік және Шығыс Қазақстан облыстары мен өңірімізден қатысқан спортшылар жүзден жүйрік шығуға тырысып бақты.
Турнир қорытындысы бойынша 48, 52, 57, 68, 90, 100 және 100 келіден жоғары салмақта батысқазақстандық Ерасыл Бақыт, Армат Қабдолов, Тоқтар Үмітәлиев, Серікбай Неғмет, Ерназар Хамзин, Олжас Сүлейменов, Көлбай Темірлан, 62 келі салмақта ресейлік Амир Жусувалиев, 74 келіде армениялық Роберт Габриелян, 85 келіде оңтүстікқазақстандық Айдарбек Тоқтарбек, 62 және 74 келідегі салмақта ұйымдастырылған әскери самбодан жерлесіміз Шыңғыс Қажиақпаров пен атыраулық Қанағат Батыршиев алтыннан алқа тағып, барлық бас жүлде иегерлері 50 мың теңге көлеміндегі сыйақымен, облыстық дене шынықтыру және спорт басқармасының дипломымен, медальдармен марапатталды.
Эльмира НҰҒМАНОВА
Михаил Шепетюк, Қазақстан Республикасына еңбек сіңірген жаттықтырушы, А.Шайхиевтің бапкері:
– Қазақ дене шынықтыру институтына жұмыс жасай жүріп, 1984 жылдан ұлттық құраманың бапкері болып тағайындалдым. Сол уақыттан бастап шамамен он шақты жылдай Асқар Шайхиевпен жұмыс жасадым. Ол 1987 жылы Кеңес Одағы чемпионатының күміс жүлдегері, 1988 жылы бірінші рет Ташкентте, екінші рет Омскде өткен чемпионатта, 1989 жылы Кеңес Одағының чемпионы атанды. Құраманың өзінде оның салмағындағы бәсекелестері мықты болды. Бірақ Асқар алдына халықаралық деңгейге шығуды мақсат етіп қойып, сол мақсатына жетті.
Ваган Хожоян, халықаралық деңгейдегі спорт шебері, Армения командасының бапкері:
– Асқар Шайхиев туралы көп естідік. Біздің Гагик Хазарян есімді чемпионымыз бар. Кеңес Одағы кезінде әлем чемпионаттарына, спорттық жиындарға екеуі бірге шығып жүрді. Жыл сайын өткізілетін еске алу турниріне қатыса жүріп, қазақ спортшысын терең тани түстік. Оның ізбасарлары самбоның даму деңгейін лайықты көрсетіп келеді. Дайындықтары өте жоғары. Қазақтардың өнеріне тәнті болдық. Біздің таңдаулы екі спортшымыздың бірі бас жүлдені иеленді. Дайындығымызды пысықтап, келер жылы көбірек палуанмен келгіміз келеді.
Қайыр Қажи, Әлем чемпионы А.Шайхиев атындағы таэквондо спорт клубының директоры:
– Асқар ағамыздың самбода ғана емес, таэквондо спортында да өз қолтаңбасы бар. Бір ауылдан шыққаннан кейін ағамыздың есімі ұмытылмасын деген ниетпен 2003 жылы Алматыда оның атымен таэквондо клубын аштық. Клуб президенті – Мәжіліс депутаты Бақытбек Смағұл. 2001 жылы алғаш рет Алматыда таэквондодан республикалық еске алу турнирін өткіздік. Оған 350-дей жасөспірім қатысты. Енді, міне, өз ұлдары қолға алып, өзі туған өңірде халықаралық деңгейде турнир ұйымдастыруды бастады. Екі жыл бұрын Оралдан А.Шайхиевтің құрметіне көшеге есімі берілді. Бұл бізді қуантады.
Соңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Астанадан Батыс Қазақстан облысына гуманитарлық көмек жіберілді
«Су тасқынынан зардап шеккендерге өтемақы төлеуде жеделдік қажет»
су тасқынының алдын алу жұмысына 1 577 техника жұмылдырылды
Батысқазақстандық полиция қызметкерлеріне гуманитарлық көмек жіберілді
Пікір үстеу