КіруКӘСІП БАСТАҒАНДАР ТЕГІН ҚЫЗМЕТ КӨРСЕТЕДІ
Кәсіп бастауға ниеттенген өңір жастары әлеуметтік жағынан аз қамтылған тұрғындарға тегін қызметтер көрсетіп, өнімдерін тегін таратпақ. Бұл халықаралық қайта құру және даму банкі мен ҚР Білім және ғылым министрлігінің бірлескен «Zhas Project» жастар корпусын дамыту жобасы аясында мүмкін болып отыр. Күні кеше Орал қаласы аумағында жұмысын бастаған төрт әлеуметтік жобаның тұсауы кесілді.
Жастардың идеясы мықты, жоспары сақадай-сай болғанмен, қаржы қолбайлау болса, бизнес әлеміне еркін ену мүмкін емес. Ал «Zhas Project» жобасы идеясы мол жастарға қаржылай демеушілік жасап, жеңімпаздарға 1 млн. теңге көлемінде қайтарымсыз грант негізінде қаржы береді. Негізгі мақсаты – жастарды қоғамға тарту, сондай-ақ қоғам игілігі жолында пайдалы қызмет әдістеріне оқыту арқылы өмірлік маңызы бар дағдыларды дамыту.
– Байқау көктемде жарияланып, облыс бойынша 700-ден астам топтық жоба комиссия қарауына ұсынылды. Нәтижесінде 200-дей ерекше жоба таңдалды. Олардың 58-і облыс орталығында іске асырылуда. Жеңімпаздар алты ай бойы қала және ауданда тұратын әлеуметтік жағдайы төмен отбасылар мен мүмкіндігі шектеулі жандарға өз қызметі мен өнімдерін тегін көрсетіп, тегін таратады. Әлеуметтік жоба болғандықтан, негізгі талап – осы. Тегін жасаған қызметтері үшін жарты жыл ішінде топ мүшелеріне 40-60 мың теңге көлемінде шәкіртақы төленеді, – дейді төрт топтық жобаның менторы Аида Мектепқалиева.
Бастау алып отырған жобалардың бірі – «Абсолют» миниглинингтік компаниясы. Олар жұмсақ жиһазды, кілемдерді тазалау және үй-жайды дезинфекциялау қызметімен айналысатын болады. «Babymassage07» тобы тірек-қимыл аппарттары бұзылған балаларға тегін массаж жасап, «Bon bon’s» тобы кондитерлік өнімдер дайындаудан айына екі рет шеберлік сағаттарын ұйымдастырады. Айрықша жобалардың бірі – «Тегін сүт» жобасы. Оны төрт жас бірігіп бастаған.
– Әзірге бір бұзаулы сиыр және тасымал үшін қажетті ыдыстар мен малдың жем-шөбін алып, өнім таратуды бастадық. Алдағы уақытта тағы бір сиыр алуымыз керек. Малымыз Ветелки ауылында. Күнара сиырды сауып, Орал қаласы әкімдігінен алынған тізім бойынша 20-30 отбасыға сүт пен қаймақ жеткізудеміз. Болашақта 100 отбасыға дейін қамту жоспарлануда, – дейді жоба авторларының бірі Мирас Ғайнуллин. Ол болашақта осы кәсіппен айналысып, таза өнімді сату дүкенін ашуды мақсат етіп отыр.
Мирас сынды өрендер Zhas Project-тің жастардың бизнес алаңда бақ сынауына үлкен мүмкіндік сыйлайтынына сенеді. Болашақ кәсіпкерлер қызметтерін «Арба» және «Бәйтерек» қоғамдық бірлестіктеріне көрсетуден бастады. «Бәйтеректің» балғындарына массаж жасап, «Арбаның» аруларына тәтті дайындаудың қыр-сырын үйретті.
Қос қоғамдық бірлдестіктің төрайымы Гүлмира Батпақұлова мен Меруерт Санқаева және қалалық жұмыспен қамту және әлеуметтік бағдарламалар бөлімінің басшысы Ерлан Ғалиев жастардың жаңа жобаларына сәттілік тіледі.
Елмұра АСХАТҚЫЗЫ
Версия для печатиСоңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу