КіруАЛДАНҒАН КӨРЕРМЕН АЙГҮЛГЕ ӨКПЕЛІ (видео)
Бүгін, 26 ақпан күні сағат 15.00-де Х.Бөкеева атындағы облыстық қазақ драма театрында А.Иманбаеваның «А.И.Театрының» «Менің әйелім өтірікші» атты комедиясы сахналануы тиіс еді. Өкінішке орай, аталмыш комедия сағат үште болмай қалды. Түкке түсінбеген көрермендер алдын-ала сатып алған билеттерін қолдарына ұстаған күйі шыныменде кімнің өтірікші екенін білмей дал болды. Дәл қазіргі таңда Қазақстанның еңбек сіңірген қайраткері, «Құрмет» орденінің иегері, әнші-актриса Айгүл Иманбаева Батыс Қазақстан облысында шығармашылық сапармен жүрген болатын.
Мәселенің мән-жайын тарқатып айтайық. Сағат тілі үшке таяғанда ақпанның көз аштырмай бұрқасындатқан ақ боранына, өңменіңнен өткен желіне қарамастан көрермен қауым театрға келе бастады. Іштерінде сәбиін сүйреткен жас аналар да болды. Қой мінезді, жуастау халықпыз ғой… Көрерменнің кейбірі ашуға булықса да үнсіз шығып бара жатты. Ал, енді бірі өзін А.Иманбаеваның әкімгерінің жағасына жармасты. Өкпе-реніштерін жайып салды. Бұл жерде біздің түсінігімізше, сағат үштегі билеттер кассада өтпей қалған. Сосын, «алданған» көрерменнің басын қосып, қойылымды сағат 19.00-де біржола ұсынамыз деп шешсе керек. Осы сәтте дәлізде өзін Жазирамын деп таныстырған А.Иманбаеваның әкімгері:
– Осы жақтың директоры Қуаныш ағай бізге отмена жасады. Біз бір ай бұрын арендаға алған едік. Біздің орнымызға сағат беске концертті қойып қойған. Сосын біз үштегі қойылымды отмена жасадық. Кассадан сіздер ғана алғансыңыз. Басқа ешкім алмаған. Осы билеттеріңізбен келсеңіздер, кешкі 7-де кіргіземін, – деді.
Бұл жайттың анығын білмек болып, «Ел-жұртты тентіретіп, әбігерге салып не болды?» деп телефон шалдық Х.Бөкеева атындағы қазақ драма театрының директоры Қуаныш Амандықовқа.
– Өтірік айтады, түстегі концертіне тек алты билет сатылған. Сол үшін отмена жасаған ғой. Кінәлі адам табу керек қой, сосын мені итере салған. Мен бір тиын алған жоқпын бұлардан. Тегін концерт қойып жатыр. Себебі деген, Айгүл біздің елдің қызы. Облысқа хат жазған ғой. Сосын рұқсат берген. Мен жақсы дедім. Театр іші бос тұр. Жарықтар жанып тұр. Бір сағаттық қойылымды қоюға болатын еді үште де. Мен бұл жағын білмеймін. Менің қатысым жоқ, – деп ақталды Қуаныш Сайлауұлы. Бұдан соң облыстық мәдениет басқармасының басшылығына қоңырау шалдық. Басқармадағылар театрдың алдына арнайы бір кісіні қоятындарын, ол келген халыққа Қайраттың концерті жайлы жөн сілтейтінін айтты.
Қайратты іздеп сабылды
Дәл осы күні кешкі сағат 18.00-де Х. Бөкеева атындағы қазақ драма театрында алты алашқа есімі мәшһүр, дәстүрлі халық әндерінің шебер орындаушысы, «Құрмет» орденінің иегері, ҚР Мәдениет саласының үздігі, бірнеше конкурстардың лауреаты Қайрат Кәкімовтің де «Әсем әні асқақтап» атты жеке шығармашылық концерті өтетін. Алайда, кімнің зияны тигені белгісіз, Қайраттың концерті аяқ астынан «Нұр Отан» партиясы ғимаратының залына ауыстырылды. Сал Мұхит бабамыз бен Ғарифолла атамыздың өнердегі ізін жалғаған халықтың сүйікті ұлы Қайрат Кәкімовті кім білмейді?! Қайратты сағына іздеп сабылған көрермен қауым әуелі Х.Бөкеева атындағы театрды жағалап, «Қайдасың, Қайрат?» деп партия ғимаратына бара жатты. Өйткені, тағы да әлеуметтік желілерде, ешқайда Қ.Кәкімовтің концертінің орны ауысқаны жайлы ұйымдастырушылар ақпарат таратпады. Ғ.Құрманғалиев атындағы облыстық филармонияның сыртқы қабырғасында Қайраттың концерті жайлы бәлен күн бұрын ілінген афиша сол күйі қарап тұрды.
Жарайды, осылай-ақ болсын. Дегенмен, бір күннің ішінде, жұмыс аптасының сейсенбісінде, яғни тапа-тал түсте және кешкі жетіде (15.00-19.00) «Менің әйелім өтірікші» атты комедияны екі қайтара қоюдың не қажеті бар еді?! Екіншіден, жерлесіміз әрі дәстүрлі әнші Қайрат Кәкімовтің де концерті дәл осы театрда өтетін болғандықтан, бірнеше апта бұрын Қайраттың афишасы Орал қаласының көрнекті көшелерінде бадырайып тұрғандықтан, БҚО мәдениет басқармасы, театр әкімшілігі, ұйымдастырушылар екі шараны бір күнге қабаттастырмай, алдын-ала мәселенің ақ-қарасын шешіп алуы тиіс еді ғой?! Сайып келгенде мұның өзі көрерменнің алтын уақытын ұрлау, қарапайым халықпен санаспау және жауапкершіліктің жоқтығы емес пе?!
ТҮЙІН: Сонымен, «Даудың басы «А. И. Театрының» түскі үште болмай қалған шарасынан басталды-ау. Осы жөнінде өз аузынан бір-екі ауыз сөз жазып алмақ ниетте едік. «Ұрының арты қуыс» дегендей, мойнына жауапкершілікті алғысы келмеген әнші-актриса әкімгері мен тілшіні қоса айыптады. «Хан да халықпен санасады» дегендей, көңілі құлазыған көрермен «Қарапайым ел-жұрттан үлкен ешкім жоқ қой. Алақанға аялап ұстап, тілеуін тілеп жүретін халқын алдағаны несі, комедиясын уақытында қоймағаны несі, билетін сатып, өтірік айтқаны несі?! Әлде, Иманбаевадан да иман кеткен бе?!» деген күпті көңілмен кетіп бара жатты.
«ЖАЙЫҚ ҮНІ»
Версия для печати
Соңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу