КіруҒАСЫРДАН ҰЗАҚ ТАРИХЫ БАР КІТАПХАНА
Тәуелсіздіктің 30 жылы ішінде еліміздің өзге салаларымен бірге кітапхана жүйесі де ұлтымыздың мол мұрасын сақтауда. Солардың бірі республикамыздағы тарихы бай, көне Ж.Молдағалиев атындағы облыстық әмбебап-ғылыми кітапханасына биыл – 150 жыл. Айтулы мерекеге орай Ғ.Құрманғалиев атындағы облыстық филармония залында «Облыстық кітапхана Тәуелсіздік жылдарында» атты жинақтың тұсауы кесіліп, кітапхана ісін дамытуға үлес қосқан жандар ҚР Мәдениет және спорт министрінің, облыс әкімінің, ҚР Ұлттық кітапханасының Алғыс хаттарымен марапатталды.
БҚО Мәдениет басқармасының басшысы Сайран Дүйсентегі Құралай Арыстанова, Гүлбаршын Бакатова, Қарылға Қазиева, Райхан Ақболатова, Полина Жасиповаға облыс әкімі Ғали Есқалиевтың және бірқатар кітапханашыларға ҚР Мәдениет және спорт министрінің Алғыс хатын тапсырды.
Бұған дейін облыстық кітапхананың 140 жылдығына орай жарық көрген «Кітапхана және уақыт» атты кітапта кітапхана тарихы зерделеніп, мәліметтер мен деректер оқырмандар назарына ұсынылған болатын. Атаулы жинақта облыстық кітапхананың Тәуелсіздік алған жылдардан бері қарай кітапхана ісінің дамуы, қызметтегі жаңашылдықтар, ел тәуелсіздігін тұғырлы етуге, рухани ұлттық сана-сезімді қалыптастыруға қосқан үлесі туралы баяндалады. Сондай-ақ, ақпараттық жинаққа кітапхананың Тәуелсіздік жылдарындағы даму кезеңдеріне байланысты ресми құжаттар, жеткен жетістіктері, кітапханашы тұлғалар туралы деректер, кітапхана ісін дамыту бағытындағы қызметтері, мақалалар, баспа өнімдері енген.
Шара барысында ҚР Ұлттық академиялық кітапхана директоры, п.ғ.д, профессор Үмітхан Мұңалбаева, Қазақстан Республикасы Ұлттық кітапхана директоры, қазақстандық кітапханалық одақ төрайымы Бақытжамал Оспанова, «Қазақстандық салалық мәдениет, спорт, туризм және ақпарат қызметкерлерінің кәсіподағы» қоғамдық бірлестігінің төрайымы Светлана Иманқұлова және жинақтың бас редакторы М.Өтемісов атындағы БҚУ «Рухани жаңғыру» институтының директоры, п.ғ.д, профессор, Қазақстан педагогикалық ғылымдар академиясының академигі Абат Қыдыршаев жинақтың тұсаукесер рәсімін жасады.
– Ұлттық кітапханада 7 миллионнан асатын, 123 тілді қамтитын бай қорымыз бар. Сол қордағы ең үлкен мақтанышымыз сирек кітаптар мен қолжазбалар. Қорда XVIII ғасырда жазылған құран бар, – деген Қазақстан Республикасы Ұлттық кітапхана директоры, қазақстандық кітапханалық одақ төрайымы Бақытжамал Оспанова Ж.Молдағалиев атындағы облыстық әмбебап-ғылыми кітапханасы директоры Шолпан Қуанышқызына қасиетті құранды сыйға тартты. Сондай-ақ ҚР Ұлттық академиялық кітапханасының және ҚР Ұлттық кітапханасының алғыс хаттарын иелеріне тапсырды. ҚР Ұлттық академиялық кітапханасының Алғыс хатымен Абат Қыдыршаев, Үзілдік Елеубаева, Әлима Төлеуғалиева және тағы басқалар марапатталса, Алмагүл Нұрсапина, Роза Мұсағалиева, Светлана Жукина «Қазақстанның құрметті кітапханашысы», Динара Шакелова, Исатай Жұмақаев «Кітапхана ісінің ардагері» төсбелгілерін кеуделеріне тақты. Ал өңіріміздің зиялы қауым өкілдері Айтқали Нәріков, Мира Шүйіншәлиева, Медхат Қамбетов Алматы қаласы ҚР Ұлттық кітапханасының Алғыс хатын иеленді.
Өз кезегінде «Қазақстандық салалық мәдениет, спорт, туризм және ақпарат қызметкерлерінің кәсіподағы» қоғамдық бірлестігінің төрайымы Светлана Иманқұлова киелі алтын орда кітапхананың 150 жылдық мерейтойына арнайы Нұр-Сұлтаннан марапат ұсынғалы келгенін тілге тиек етіп, әсіресе кітапханашылар қауымына басын иіп, рахметін жеткізді.
– Айлығы шәйлығына жетпейтін, аз ғана жалақыға жұмыс жасап, адал еңбек етіп келесіздер. Қазақстандағы ғалым да, профессор да, министр де осы қарашаңыраққа келіп, білім нәрін алады, – деген бірлестік төрағасы кәсіподақ атынан бірқатар сала мамандарын «Еңбек Даңқы» төсбелгілерімен марапаттады.
Иә, тынымсыз еңбек пен зор ізденісті талап ететін кітапханашы мамандығының қыр-сырын терең меңгерген майталман мамандар кітапхана тарихын қалыптастыруымен қатар оны даму сатысына жеткізу жолында өз қолтаңбаларын қалдырып, айтарлықтай үлес қосты. Кітапхананың әр жылдарда жаңашылдыққа ұмтылып, толағай жетістіктерге жетіп, биік белестерден көрінуі ұжымға басшылық еткен тұлғаларға да тікелей байланысты екені сөзсіз. Білімі мен біліктілігін елге адал қызмет етуге арнап, кітапхана саласында мағыналы да мәнді еңбек атқарған Лидия Губанова, Гүлжан Жұмақаева, Роза Исатаева сынды беделі биік дарынды басшылардың өнегелі ісі мен еңбек жолын көпшілік жақсы біледі және үлгі тұтады. Осы орайда кітапхана саласының құрметті ардагерлері Гүлжан Жұмақаева мен Роза Исатаева, БҚО салалық мәдениет, спорт және ақпарат қызметкерлері кәсіподағының төрағасы Айдар Батырханов қазіргі заман талабына сай кәсіби білімі жоғары, жаңа технологияны меңгерген жан-жақты жетілген кітапхана жұмысына сәттілік тіледі.
Кітапханада ақын Жұбан Молдағалиевтың шығармашылық мұрасын оқырмандарға кеңінен насихаттау мақсатында «Жұбан оқулары» байқауы жыл сайын дәстүрлі түрде өтіп келеді. Осы жылдар ішінде талай поэзия сүйер жас ұрпақ ақын жырларын сүйсіне оқып, рухани жетілуде. Биыл да 21-ші рет өткізілген «Жұбан оқулары» байқауы өз мәресіне жетіп отыр. Салтанатты шарада М.Өтемісов атындағы БҚУ-дың қауымдастырылған профессоры, филология ғылымдарының кандидаты, доцент Зейнолла Мүтеев байқаудың жеңімпаздарын марапаттады.
Жергілікті ақын-жазушылар кітапханамыздың тұрақты оқырманы. Жаңа жарық көрген жинаққа Айтқали Нәріков, Мира Шүйіншәлиева, Мұнайдар Балмолда, Сағынтай Бисенғалиев сынды өлкеміздің бірқатар танымал тұлғалары пікір білдіріп, жүрекжарды өлеңдерін арнап, Тәуелсіздіктің отызыншы белесіне көтерілген кітапхана да елмен бірге жасай беретініне, келешек ұрпақты рухани теңіздің тұнық тұңғиығынан сусындатып, мәдениетке, адамгершілікке, жақсылыққа, қайырымдылыққа тәрбиелей береріне сенім білдірді.
Рухани кеш соңында Қазақстан Журналистер одағының мүшесі Cәуле Карабалинаның әні мен сөзіне жазылған «Жұбан кітапханасы» әні алғаш рет шырқалып, көпшіліктің көңілін тербеді.
Кәусар БАЙҒАЛИЕВА,
Рафхат ХАЛЕЛОВТЫҢ суреттері
zhaikuni.kz
Версия для печати
Соңғы жаңалықтар
«ӘДІЛЕТ» ПАРТИЯСЫНЫҢ КӨШПЕЛІ ШТАБЫ ЖӘНІБЕК ЖҰРТШЫЛЫҒЫМЕН КЕЗДЕСТІ
Тұрақты даму – тиімді мемлекеттік басқару мен ортақ жауапкершіліктің нәтижесі
Бөрлі ауылында «Әділет» партиясының облыстық штаб мүшелері тұрғындармен кездесті
Жаңа Қазақстан Конституциясы – Әділетті қоғамның құқықтық негізі
«Жаңа талап» мемлекеттік қызмет мектебінің жаңа оқу жылы басталды
КАЗТАЛОВ АУДАНЫНДА 2 МЛРД ТЕҢГЕНІҢ 26 ИНВЕСТИЦИЯЛЫҚ ЖОБАСЫ БОЙЫНША МЕМОРАНДУМҒА ҚОЛ ҚОЙЫЛДЫ
Конституцияның 6-бабы: саяси әралуандық пен қоғамдық тұрақтылықтың құқықтық негізі
АВТОМОБИЛЬ КӨЛІГІ ЖӘНЕ АВТОЖОЛ САЛАСЫ ҚЫЗМЕТКЕРЛЕРІ ҚҰРМЕТКЕ БӨЛЕНДІ
Болашақтың экономикасына байыппен көшуге құқықтық негіз болатын жаңа Азаматтық кодекс қабылдау қажет»
Президент Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауы
Президент Қасым-Жомарт Тоқаев 28 қазан күні Қазақстан халқына Жолдауын жариялайды
Президент шет мемлекеттер басшыларының Ұлттық мерекемізге орай жолдаған құттықтауларына ризашылығын білдірді
ОРАЛДА РЕСПУБЛИКА КҮНІНЕ ОРАЙ МЕМЛЕКЕТТІК ТУ КӨТЕРУ РӘСІМІ ӨТТІ
Облыс әкімі Нариман Төреғалиевтің Республика күнімен құттықтауы
Жедел медициналық көмек станциясының жаңа әкімшілік ғимараты салынуда
Батыс Қазақстан облысында Республика күні қарсаңында сенбіліктер мен ауыл шаруашылығы жәрмеңкесі өтті
Мемлекет басшысы NVIDIA компаниясының негізін қалаушы және президенті Дженсен Хуангты қабылдады
«Подстепное – Федоровка – Ресей Федерациясының шекарасы»: БҚО-да автомобиль жолы пайдалануға берілді
Мемлекет басшысы Қасым-Жомарт Тоқаев Республика күніне арналған салтанатты жиында сөз сөйледі
Пікір үстеу