ҚАЛАМГЕРЛЕР МАРАПАТТАЛДЫ

Қадыр Мырза Әли атындағы мәдениет және өнер орталығында Жазушылар Одағы БҚО филиалының ұйымдастыруымен өңірдегі қаламгерлердің басын қосқан жылды қорытындылау жиыны өтті. Шараға облыс әкімі С.Егізбаев, қала әкімі А.Шыныбеков және Қазақстан Жазушылар Одағы Басқарма төрағасының орынбасары М.Құлкенов қатысты.

Басқосуды Қазақстан Жазушылар Одағының БҚО филиалының директоры, Қадыр Мырза Әли атындағы облыстық мәдениет және өнер орталығының басшысы Бауыржан Халиолла ашып, үш ай бұрын ғана ресми түрде тіркелген одақ филиалының атқарар жұмысы ауқымды екенін атап өтті. Облыс әкімінің орынбасары Серік Егізбаев өңірдегі филиалдың жұмысын жандандыруға облыс әкімшілігі қолдау көрсететінін жеткізді.

Қала басшысы Абат Шыныбеков ағымдағы жылдың қиын кезең болғанымен, айтулы даталармен есте қалар жыл болғанын, әдебиеттегі ұлы тұлғалардың есімдерін халық жадында жаңғырту, келер ұрпаққа жеткізу мақсатында қалада ауқымды жұмыстар атқарылғанын атады.

Қазақстан Жазушылар Одағының Басқарма төрағасының орынбасары, жазушы, мемлекет және қоғам қайраткері М.Құлкенов батысқазақстандық филиалдың үш ай ішіндегі атқарған жұмысы көңіл толарлық екенін, бастамасы оң екенін атап өтті. Сонымен қатар жуырда халықаралық «Алаш» әдеби сыйлығы берілгенін және оған әр жазушының өзі өтінішпен хабарласқанын тілге тиек етіп, облыстық филиал басшылығы осындай жұмысты ұйымдастыруы тиіс екенін ескертті.

Шарада Ш.Қыдырниязова, Т.Жазықбай, Т.Әліпқали, З.Сисенғали, Ұ.Сәриева, Ү.Елеубаева, С.Бисенғалев, Т.Қуаныш, Е.Бимұханов, М.Бердәліге БҚО әкімі Ғ.Есқалиевтің Алғыс хаты, Н.Сәдір, Қ.Амандықов, Н.Кәрімова, А.Қаршығаұлына облыс әкімінің орынбасары С.Егізбаевтың Алғыс хаты табысталса, А.Нәріков, А.Бақтыгереева, Ғ.Сейтақ, М.Шүйіншәлиева, Б.Ғұбайдуллин, А.Шахин, Д.Мұштанова, А.Бектұрғанов, М.Балмолда Қазақстан Жазушылар Одағының Басқарма төрағасы Ұлықбек Есдәулеттің Алғыс хатымен марапатталды.

Абай Құнанбайұлының 175 жылдығы аясында ұлттық руханиятқа сіңірген еңбегі үшін халықаралық «Абай» атындағы мәдениет пен өнерді қолдау қорының Абай Құнанбайұлының 175 жылдығына арналған «Абай» мерейтойлық медалі Ғ.Сейтақтың, Т.Мықидың, Д.Есентеміровтың, Е.Өмірәлінің, Ж.Мусинаның және Б.Ширмединұлының кеудесіне тағылды. Ақын, Қазақстан Жазушылар одағының мүшесі Айтқали Нәріковтің 80 жасқа толуына орай ұйымдастырылған «Ақ Жайықтың Айтқалиы» атты жыр мүшәйрасының бас жүлдесі жас ақын М.Ғилымханға берілді.

Сондай-ақ бірқатар белгілі ақын-жазушылар мен әдебиет әлеміне есімі таныс жастарға Қазақстандық салалық мәдениет, спорт, туризм және ақпарат қызметкерлерінің кәсіптік одағының «Еңбек даңқы» төсбелгісі мен Құрмет грамотасы, «Абай» қорының, БҚО мәдениет басқармасының алғыс хаттары ұсынылды.

Ұ.Сәриева, Қ.Қабжанов, Т.Қуаныш, Т.Мықи, А.Исламғалиев сынды қаламгерлер Қазақстан Жазушылар одағына мүшелікке қабылданып, куәліктері ресми түрде табыс етілді.

Эльмира НҰҒМАНОВА

Версия для печати