КіруМОМЫШҰЛЫ КӨШЕСІНЕ – ЖОЛ, ТОҚСАНОВҚА – ЖАРЫҚ КЕРЕК
Қала әкімінің есептік кездесуі ақпанның 10-ы күні қаладағы №42 орта мектепте жалғасты. Шаһар басшысы солтүстік-шығыс бөлігі ауданында тұратын тұрғындары алдында өткен жылы атқарылған жұмыстарды саралап, алдағы міндеттерді нақтылады.
Әсіресе, қала басшысы тұрғындар тарапынан үнемі көтеріліп жүрген мәселелер – абаттандыру, көшелерді жарықтандыру, жолдарды жөндеу, қоғамдық көлік, инженерлік желілер, қоғамдық қауіпсіздік мәселесіне ерекше тоқталды. Жұртшылықтың Тоқсанов көшесін жарықтандыру туралы өтінішіне «Қаланың 268 көшесі мен 372 аула аумағы жарықтандырылған. Орал қаласының көше-жол желісінде 20 000-ға жуық жарық нүктесі бар. 2019 жылы қала бойынша 2007 дана электр үнемдейтін шам ауыстырылды. Сонымен қатар Есенжанов көшесінде 84 шам ауыстырылды» деген Абат Абайұлы қалада ағымдағы жылы 15 мың шамды ауыстыру жоспарланғанын, алынған шамдар жарығы жоқ көшелерге қойылатынын жеткізді. Сондай-ақ тұрғындар тарапынан №42 орта мектептің 1200 орынға шақталғанымен, мұнда қазір 2000-нан аса бала білім жатқаны айтылып, осы аумаққа жаңа мектеп салу мәселесі қозғалды. – Бірінші кезекте қаладағы бес үшауысымды мектепті жабуға жұмыстанудамыз. Ол үшін жекеменшік инвестицияны көп тартуымыз керек. Әйтпесе, бюджеттен бөлінетін қаражатпен жылына бір мектеп бітіреміз. Қалада 2 апатты мектеп бар, олар №31 және №33 білім ұялары. №33 мектеп құрылысының ЖСҚ сараптамасының оң қорытындысы алынып, тиісті қаражат бөлінді. Қазіргі таңда сүрілу жұмыстары жүргізілуде, – деген шаһар басшысы бұл мәселенің орынды екенін, қаланың солтүстік-шығыс бөлігінде жаңа мектеп құрылысы жоспарда бар екенін айтты.
Кәусар БАЙҒАЛИЕВА
Нұржан БЕККАЛИЕВ, тұрғын:
– Бізге Правдухина көшесінен «Ел ырысы» ауданындағы асфальтқа шығатын жаяу жүргіншілер жолы керек. Правдухин көшесінде қоқыс жәшігі де, жауапты мекемемен келісімшартымыз да жоқ. Бірақ, қоқысқа ақша төлеп жүрміз.
Абат ШЫНЫБЕКОВ, қала әкімі:
– Өткен жылы 855 қоқыс жәшігі сатып алынды. Қазіргі таңда қала аумағындағы 722 жерде қоқыс алаңына 3000-ға жуық қоқыс жәшігі қойылған. Биыл да қоқыс жәшіктерін сатып алу жоспарда бар. Сіздің көшеңізге де орнатылады. Әр адам қатты тұрмыстық қалдық үшін төлем жасауы тиіс.
Нұркен САРИЕВ, 5 шағынаудан тұрғыны:
– 5 шағынауданы 3-үй тұрғындарының атынан келдім. Баспанамыз 2013 жылы пайдалануға берілді. Содан бері үйдің іргетасы отырып, қабырғалары сөгілген. Төбесі жарық. Бесінші қабаттан жаңбыр, еріген қар суы ағып тұр. Жертөле судан толып тұр. Жағымсыз иіс шығады. ПИК-ке айта-айта шаршадық.
Қанат ӨМІРӘЛИЕВ, ТҮКШ бөлімі басшысының орынбасары:
– Бұл жайттан хабардармын. Мәселе бар. Төбе жабынын ашып, қайта жабу қажет. Мамандар қарап, қайта қалпына келтіруге мүмкіндік бар екенін айтты. Жергілікті компаниямен бірігіп, жұмыстанамыз. Ал жертөлені әуелі сізбен бірге барып қараймыз. Содан соң тиісті шаралар қабылдаймыз.
Зұлқаш БАУБЕКОВ, Б.Момышұлы көшесінің тұрғыны:
– Мен көршілерімнің аманатымен келіп тұрмын. Жеңістің 65 жылдығы кезінде Бауыржан Момышұлы көшесін абаттандыру жұмыстары жасалды. Жол салынған кезде, 400-450 метр жол аяқсыз қалды. 2015 жылы бұл мәселе көтеріліп, жобалау-сметалық құжаттары жасалды. Енді ЖСҚ мерзімі өтіп кете ме деген қорқыныш бар. Облыс басшысында болғанымда, бірінші кезекте тұрғанымызды айтқан еді. Биыл тізімде тағы жоқпыз. Бауыржанның есіміне көшеміздің аты сай келмей тұр. Ұлы Жеңістің 175 жылдығы қарсаңында атамыздың көшесіне көңіл бөлінсе?
Абат ШЫНЫБЕКОВ, қала әкімі:
– Көше бойынша өткен жылы басталған жұмыстар биыл жалғасуда. Жағдай түсінікті. Мүмкіндіктерді қарастырамыз.
Версия для печатиСоңғы жаңалықтар
Қазақ тілін және тарихын білмейтіндерге Қазақстан азаматтығы берілмейді
«Мерейлі отбасы-2024» ұлттық конкурсының қалалық кезеңі өтеді
Пікір үстеу