КіруҰСТАЗДАРҒА ҚҰРМЕТ КӨРСЕТІЛДІ
Бүгін қаладағы Х.Бөкеева атындағы облыстық қазақ драма театрында ұстаздардың кәсіби мерекелеріне арналған «Ұстазға бас иемін!» атты мерекелік кеш өтті. Алдымен ұстаз болу өмірінің мәні мен сәніне айналған, бар болмысын педагог мамандығымен ұштастырған жандарды облыс әкімінің орынбасары Серік Егізбаев кәсіби мерекелерімен құттықтады.
– Құрметті ұстаздар қауымы! Оқу-ағартудың атасы Ыбырай Алтынсарин «Тарыдай болып кіресің, таудай болып шығасың» демекші, алдарыңызға тарыдай болып келген бүлдіршіндерді таудай елдің азаматы етіп шығаратын сіздерсіздер. Сол үшін де мың алғыс! Отбасыларыңызға амандық, дендеріңізге саулық тілеймін. Шәкірттеріңіздің құрметіне бөленулеріңізге тілектеспін. Білім саласында жасалып жатқан игі істер жетерлік. Ұстаздарға қанша жақсылық жасасақ та, артық етпейді. Қоғамның, елдің болашағын тәрбилеп жатқан өздеріңіз. Жұмыстарыңыз жемісті болсын, – деген шынай тілегін жеткізген Серік Рахметоллаұлы қаладағы №35 мектеп-лицейінің химия пәні мұғалімі Зинаида Сухина мен Бөрлі ауданы Ақсай қаласының №3 жалпы орта білім беретін мектебінің физика пәні мұғалімі Сандуғаш Куликешті «Ы.Алтынсарин» төсбелгiсiмен марапаттады. Ал дарынды балаларға арналған мамандандырылған С.Сейфуллин атындағы №11 облыстық қазақ мектеп-интернат кешенінің қазақ тілі және әдебиеті пәнінің мұғалімі Агерке Байжиенова мен Жаңақала ауданы Жаңақала жалпы орта білім беретін мектебінің тарих пәні мұғалімі Саид Әлиевке «Бiлiм беру iсiнiң құрметтi қызметкерi» төсбелгiсiн тақты.
Батыс Қазақстан облыстық білім және ғылым қызметкерлерінің кәсіподақ ұйымы мен білім басқармасы атынан ұстаздарға дәстүрлі номинациялар тағайындалған. Білім беру ұйымдарының басшыларына арналған «Табысты менеджер» номинациясын ардагер ұстаз Светлана Бисембаева табыстады. Олардың қатарында қаладағы №42 Ақниет гимназиясының директоры Ерік Темірғалиев, Ақжайық ауданы Ораз Исаев атындағы жалпы орта білім беретін мектебінің директоры Нұрлан Есболатов, Қазталов ауданы, Қараөзен мектеп-лицейінің директоры Мәншүк Жексенова, Шыңғырлау ауданы Лұқпан Қылышев атындағы жалпы орта білім беретін мектебінің директоры Гүлнәр Бисенғалиева, Қаратөбе колледжінің директоры Мәулен Салахаден бар. Сондай-ақ бір топ ұстаздар «Даралықты дәріптеуші», «Зерделі ұстаз», «Ізгі істерді ілгерілетуші», мектепке дейінгі ұйым тәрбиешілері «Бала бағбаны» аталымдарымен марапатталды.
Сондай-ақ салтанатты шарада ұстаздықты ұрпақтан-ұрпаққа жалғастырып, құндылықтары мен құпияларын отбасылық жәдігерлікке айналдырған, сан ұрпақты білім нәрімен сусындатып педагогикалық әулет атанған жаңақалалық Саркеновтар отбасы «Ұстаздар ұстаханасы» аталымының жеңімпазы атанды. Әулеттің педагогикалық еңбек өтілі – 187 жылды құрайды. Педагогикалық әулеттің негізін қалаушылар тарих пәнінің мұғалімі Құрманғазы Саркенов, бастауыш сынып мұғалімі Меңсұлу Саркенова. Әке мен ананың жолын ұл-қыздары жалғап, келіндері де қиын да қадірлі ұстаздық жолын таңдаған. Туған елінің мақтанышы, үлгі-өнеге болған мұғалімдер династиясында бастауыш сынып, тарих, химия, биология, қазақ тілі мен әдебиеті, орыс тілі мен әдебиеті, ағылшын тілі, технология, музыка, дене шынықтыру пәндерінің мұғалімдері, хореография үйірмесінің жетекшісі қызметін атқарады. Түрлі аталым иелеріне облыстық ғылым мен білім қызметкерлерінің кәсіподақ комитетінің атынан сыйлықтар берілді.
Айта кету керек, облысымызда білім саласына әркез назар аударылып, үнемі қамқорлыққа ие болуда. Жыл сайын жаңадан салынған білім нысандары пайдалануға беріліп, білім беру мекемелерінің материалдық-техникалық базалары нығаюда. Тек соңғы үш жылда облысымызда 14 білім беру мекемесі пайдалануға берілген. Өткен жылдың 1 қаңтарынан бастап жаңартылған білім беру мазмұны бойынша жұмыс жасап жүрген 11 мыңнан астам мұғалімге қосымша 30% үстемеақы төленуде. Облыстың жалпы білім беретін және арнайы мектептерінің 7029 педагогикалық қызметкері аттестаттаудың жаңа моделі бойынша 30-50% аралығында үстемеақы алуда. 2019 жылдың маусым айынан бастап педагогикалық қызметкерлердің еңбек ақысы лауазымдық жалақысынан 30% көтерілді. Бүгінгі күні облыс ұстаздары 106535 оқушыға сапалы білім мен саналы тәрбие беруде. Мемлекет басшысы Қасым-Жомарт Тоқаевтың «Bіlіm jáne Ǵylym!» атты тамыз конференциясының пленарлық отырысында «Үкіметке білім беру жүйесіне білікті кадрларды тарту мақсатында төрт жыл ішінде мұғалімдердің жалақысын 2 есеге арттыруды тапсырамын» деген сөзі ұстаздарға деген құрметтің ерекше екенінің дәлелі.
Кәусар БАЙҒАЛИЕВА
Версия для печати
Соңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
«Су тасқынынан зардап шеккендерге өтемақы төлеуде жеделдік қажет»
су тасқынының алдын алу жұмысына 1 577 техника жұмылдырылды
Батысқазақстандық полиция қызметкерлеріне гуманитарлық көмек жіберілді
Пікір үстеу