Жаңа оқу жылы: сапа мен жаңа мүмкіндіктер

Тамыз конференциясының пленарлық отырысында облыс әкімінің орынбасары Қайыржан Меңдіғалиев алдағы оқу жылында білім беру жүйесі алдында тұрған негізгі міндеттерге тоқталды.

– Мемлекет басшысының ауылдық жерлердегі балаларға сапалы білім алуға қолайлы жағдай жасау жөніндегі тапсырмасы аясында облыста жаңа мектептер бой көтеруде. Жаңа оқу жылына дейін өңірде 8 жаңа мектеп пайдалануға беріледі. Жаңа білім нысандарының ашылуы оқушыларға заманауи әрі қауіпсіз ортада білім алуға мүмкіндік беріп, мектептердегі орын тапшылығын азайтуға және оқу сапасын арттыруға ықпал етеді, – деді Қайыржан Ермекұлы.

Аймақ басшысының орынбасары білім беру саласындағы маңызды міндеттердің бірі – қала мен ауыл оқушыларына тең мүмкіндік қалыптастыру екенін атап өтті. Осы ретте балалардың жан-жақты дамуына бағытталған қосымша жобаларды да атап айтты.

Батыс Қазақстан облысында бастауыш сынып оқушыларына шахмат үйрету тәжірибесі де жаңа деңгейге көтерілмек. Жаңа оқу жылынан бастап шахмат сабақтары өңірдегі барлық мектептің бастауыш сыныптарында қолжетімді болады. Қазіргі таңда бұл бағытта жүйелі жұмыстар жүргізілуде. Соңғы үш жылда 183 мектептің бастауыш сынып оқушылары вариативтік курс аясында шахматпен айналысып келеді.

Жобаның нәтижесі халықаралық деңгейде де көрініс тапты. Өткен оқу жылында Бөкей ордасы ауданының Жәңгір хан атындағы мектеп оқушылары «FIDE EDU» халықаралық фотобайқауында І орын иеленген болатын.

– Шахмат балалардың логикалық ойлау қабілетін дамытып, ақпаратты қабылдау және талдау дағдыларын жетілдіреді. Біз барлық балаларымызға қосымша бәсекелестік артықшылық бергіміз келеді, – деді Қайыржан Меңдіғалиев.

Сонымен қатар конференция аясында республикалық және өңірлік IT-компаниялардың көрмесі ұйымдастырылды. Көрмеде білім беру саласына арналған заманауи цифрлық шешімдер, жасанды интеллект құралдары мен инновациялық жобалар таныстырылды.

Пленарлық отырыс барысында білім беру саласына еселі еңбек сіңірген ардагер ұстаздар мен педагогтерге құрмет көрсетілді. Оларға Оқу-ағарту министрлігінің ведомстволық наградалары – «Еңбек ардагері» медалі, «Ыбырай Алтынсарин» медалі, «Білім беру саласының үздігі» төсбелгісі, «Құрмет грамотасы» және «Орта білім беру ісінің үздігі» құрмет дипломы табысталды.

Сондай-ақ облыс әкімі Нариман Төреғалиевтің «Алғыс хатымен» 43 педагог марапатталып, олардың кәсіби еңбегі мен білім беру саласының дамуына қосқан үлесі жоғары бағаланды.

Тамыз конференциясы жаңа оқу жылындағы міндеттерді айқындап қана қоймай, педагогтердің тәжірибе алмасып, жаңа идеялар мен заманауи шешімдерді ортаға салуына мүмкіндік берген маңызды кәсіби алаң болды.

Алдағы оқу жылында білім саласының барлық өкілдеріне толағай табыс, шығармашылық ізденіс пен жаңа жетістіктер тілейміз! Жаңа оқу жылы сәтті басталып, әр шәкірттің биік белестерді бағындыруына жол ашсын!