Кіру«ОТАНҒА ДЕГЕН АДАЛДЫҚ ЖЕҢІСКЕ ЖЕТЕЛЕДІ» №18 5.05.2016
Ұлы Отан соғысының ардагері Мұхтар Әжіғұлов биылғы 1 мамырда 94 жасын ел-жұртымен, үрім-бұтағымен қарсылады.
Отты жылдардың куәгері, Сталинградты қорғауға қатысқан қарт майдангер бүгінгідей бейбіт заманды көзімен көргеніне тәубе дейді. Әйтсе де, өмір мен өлімнің ортасында жүріп, Отан үшін от кешкен күндерін бір сәт есінен шығарған емес.
Ұлы Отан соғысының ардагері Мұхтар Әжіғұлов биылғы 1 мамырда 94 жасын ел-жұртымен, үрім-бұтағымен қарсылады.
Отты жылдардың куәгері, Сталинградты қорғауға қатысқан қарт майдангер бүгінгідей бейбіт заманды көзімен көргеніне тәубе дейді. Әйтсе де, өмір мен өлімнің ортасында жүріп, Отан үшін от кешкен күндерін бір сәт есінен шығарған емес.
– Соғысқа алынған кезде бастапқыда пулеметші болуға үйреткен еді. Бірақ Астрахан жағындағы Қалмақ қырына парашютпен түскен немістерді жойған соң бізді басқа жаққа алып кетті. Сталинград шайқасында танкіге қарсы қарумен оқ ататынбыз. Тіпті оның мылтығы да, оқтары ауыр. Нысана – танкистер қарап отыратын саңылау. Алайда оған дәлдеп тигізу оңай емес. Ал оқ танкінің артындағы бакке түссе ол қызыл жалынға оранады. Сөйтіп жүргенде жараландым. Ол кезде мен сержант болатынмын, – деп есіне алды Мұхтар атай.
Радиотелефонистердің курсын бітірген жауынгер М.Әжіғұлов соғыста радист болып та қызмет еткен. Прибалтика жерінде жауды барлау арқылы олардың рациясынан ақпарат алумен шұғылданыпты. – Ақпаратты аудармашы неміс тілінен аударады. Біздің алып келген хабарымыз арқылы жаудың қайда бет алғаны, қай жаққа бұрылғаны, қай тұста тоқтайтыны анықталады. Осылайша біздің әскерге дұрыс әрекет жасауға жәрдемдестік. Барлауға барғандарды немістер ұстап алуы да мүмкін еді. Сол себепті бұл қызметтің қиындығы да, жауапкершілігі де мол болды, – дейді майдангер. Соған қарамастан соғыстың соңына дейін осы қызметті тыңғылықты атқарыпты. Ал 1945 жылдың 9 мамырын ІІ Прибалтика майданының құрамымен бірге Литваның Каунас қаласында қарсылаған. – Прибалтикада соғысу өте қиын. Таңмен шық тұнып тұратын жолдармен көліктер, танкілер жүре алмайды. Сондықтан арнайы батальон әдейілеп тақтайдан 15-20 шақырым жол салады. Сол жердегі әскерді қалаға жібермей, теңізге өткізбей, сырттан көмек көрсеткізбей ұстап тұрдық. Ал елге 1945 жылдың қарашасында оралдым, – деді кейіпкеріміз.
Майданнан аға сержант болып қайтқан жерлесіміз аласапыран кезеңде Отан қорғау жолында опат болған, бүгінде арамызда жоқ боздақтардың барлығын Батырға теңейді. Мұхтар ата кейінгі ұрпаққа жау қолынан қаза тапқан майдандастарының ерлігін аңыз ғып айтудан жалыққан емес. Елі үшін жанын қиған ерлердің батылдығын көз алдынан өткізген ардагер:
– Соғыста жекпе-жек деген болмайды. Кейде окоптан шығу үшін оқты қарша боратқан пулеметті жоюға бір адамды жұмсайды. Ол өлетінін біліп тұрса да, жанын аямай, пулеметтің аузына өз денесін тосады. Өйткені пулеметті басқаша құрту мүмкін емес. Пулеметтің үні өшкен кезде біз окоптан шығып «уралап» жүгіреміз. Бұл – немістердің жанды жері. Себебі олар бұл дауыстан қорқып, жан-жаққа қашады, – дей келе, соғыс даласында шейіт болғандардың есімін еш уақытта ұмытуға болмайтынын жеткізді.
Отандастарымыздың төккен қанымен келген Ұлы Жеңістің мән-маңызы ерекше. Сондықтан 9 мамыр – Ұлы Жеңіс мерекесін асыға күтетін соғыс ардагерлерінің қатарында Мұхтар Әжіғұлов та бар. – Бұл күні сонау ауыр жылдар, арамызда жоқ жолдастарымыз есімізге түседі. Олардың жанкешті ерлігі ұрпақтың жадынан өшпесін деп айта жүреміз. Ал біздің қатарымыз таусылған кезде оларды еске алатын жан бола ма, жоқ па?! Тек есімдері кітапта қалады, ал біз секілді ерлігін айтып отыратын тірі куәгерлер табылмайды. Сондықтан батырларымыз туралы деректер балаларға балабақшаларда, мектептерде көбірек берілуі керек, – деді келер ұрпақтың қамын ойлаған ардагер.
Ұлы Отан соғысының ардагері ел ішіндегі тыныштықты, татулықты жоғары бағалады. – Елімізде түрлі ұлттар мен ұлыстар бейбіт өмір сүруде. Бұл Елбасының көреген саясатының нәтижесі. Сонымен бірге жерді қазақстандықтарға жеке меншікке сату жөніндегі мәселені толық қолдаймын. Себебі, жер – адам өмірінің тамыры. Оны қорламай, баптап, құнарлығын арттырып, дұрыс көзбен қарау керек. Жас буын елін, жерін, халқын сүюі керек. Ұлы Отан соғысында да жауынгерлердің Отанға деген адалдығы Жеңісті жақындатуға септігін тигізді, – деген майдангер жер бетінде соғыс өртінің қайта тұтанбауын тіледі.
Ләззат ҚАЖЫМ
Версия для печатиСоңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Астанадан Батыс Қазақстан облысына гуманитарлық көмек жіберілді
«Су тасқынынан зардап шеккендерге өтемақы төлеуде жеделдік қажет»
Пікір үстеу