КіруБейбіт күннің батырларына құрмет
Орал қаласында құтқарушылардың еңбегін ұлықтап, ерлігіне тағзым етуге арналған жаңа қоғамдық кеңістік пайда болды. Қос даңғылдың қиылысында «Құтқарушылар аллеясының» ашылу рәсімі өтті.
Салтанатты жиынға облыс әкімі Нариман Төреғалиев, ҚР Төтенше жағдайлар министрі Шыңғыс Әрінов, азаматтық қорғау саласының қызметкерлері мен ардагерлері, сондай-ақ қала тұрғындары қатысты.
Шара барысында облыс әкімі жаңа нысанның ашылуымен көпшілікті құттықтап, мемориалдық кешеннің бейбіт заманда ел қауіпсіздігін қорғап жүрген мамандарға көрсетілген құрметтің белгісі екенін айтты.
Нариман Төреғалиев өз сөзінде Мемлекет басшысы Қасым-Жомарт Кемелұлы Тоқаевтың құтқарушы мамандығының қоғамдағы беделін арттыруға ерекше мән беріп отырғанын атап өтті. Сонымен бірге 2025-2026 жылдары азаматтық қорғау саласын дамыту және оның материалдық-техникалық мүмкіндіктерін күшейту үшін жергілікті бюджеттен 2,6 млрд теңгеден астам қаржы бөлінгенін жеткізді.
– Бұл қаражат құтқарушылардың қызметтік міндеттерін қауіпсіз әрі нәтижелі атқаруына жағдай жасауға бағытталған нақты қолдаудың бір көрінісі, – деді облыс әкімі.
ҚР Төтенше жағдайлар министрі Шыңғыс Әрінов аллеяның бой көтеруіне қолдау көрсеткен облыс басшылығына алғыс білдірді. Оның пікірінше, жаңа орын тұрғындардың тынығуына арналған кеңістікпен қатар, қызмет барысында ерлік көрсеткен құтқарушыларды еске алатын тағылымды мекенге айналады.
Аумағы 1,6 мың шаршы метрді құрайтын аллеяда екі субұрқақ орналасқан. Оның бірінде өрт сөндірушінің мүсіні қойылса, екіншісінде XIX ғасырда қолданылған өрт сөндіру қол сорғышы бейнеленген. Қоғамдық кеңістік көгалдандырылып, абаттандырылды.
Аллеядағы мемориалдық тақтаға төтенше жағдайларды жою кезінде қаза болған құтқарушылар мен өрт сөндірушілердің суреттері орналастырылған. Ашылу рәсімінде олардың есімдері құрметпен аталып, рухтарына тағзым жасалды.
Соңғы жаңалықтар
Жедел медициналық көмек станциясының жаңа әкімшілік ғимараты салынуда
Батыс Қазақстан облысында Республика күні қарсаңында сенбіліктер мен ауыл шаруашылығы жәрмеңкесі өтті
Мемлекет басшысы NVIDIA компаниясының негізін қалаушы және президенті Дженсен Хуангты қабылдады
«Подстепное – Федоровка – Ресей Федерациясының шекарасы»: БҚО-да автомобиль жолы пайдалануға берілді
Мемлекет басшысы Қасым-Жомарт Тоқаев Республика күніне арналған салтанатты жиында сөз сөйледі
Президент Республика күні қарсаңында бір топ азаматты мемлекеттік наградалармен марапаттау туралы Жарлыққа қол қойды
Мемлекет басшысы әскери реформа мәселелері бойынша Қауіпсіздік Кеңесінің отырысын өткізді
«Мақат – Индербор – Сәтимола» бағытындағы теміржол инфрақұрылымның құрылысы басталды
Президент Қасым-Жомарт Тоқаев құтқарушыларға мемлекеттік марапаттар тапсырды
Жаңақала ауданында коммуналдық инфрақұрылымды жаңғырту жұмыстары жалғасуда
