КіруӨМІРІ ЖАРҚЫН КАЛЕЙДОСКОП
Бүгін Н.Островский атындағы облыстық орыс драма театрында Қазақстан Республикасының мәдениет қайраткері, еңбек ардагері Феликс Баюканскийдің 70 жасқа толуына арналған «Праздник души и жизни» атты салтанатты кеші өтті. Мерейтой иесін облыс әкімінің орынбасары Ғабидолла Оспанқұлов пен қала әкімінің орынбасары Бақытжан Нарымбетов құттықтап, салт-дәстүр жоралғысымен иығына оюлы шапан жапты.
Феликс Баюканский – өлкеміздің мәдениеті мен өнеріне ұзақ жылдардан бері сүбелі үлес қосып келе жатқан айтулы азамат. Қызметтік жолын облыстық мемлекеттік архив, өлкетану музейі, қалалық мәдениет бөлімі, Ғ.Құрманғалиев атындағы облыстық филармониясы, қалалық «Жастар» мәдениет үйі, мәдени-ағарту бірлестігінде өткерген қадірлі ардагердің 70 жас мерейтойы өз алдына, биыл Орал қаласының мәдениетін дамыту мен мәдени мұраны насихаттаудағы еңбегіне 50 жыл толып отыр. Жайықтағы мәдениет саласын өмірлік ісім деп бағалайтын жан туралы сөз алғандар кеште азаматтық қасиетін, өзгелерге үлгі болар өнегесін ерекше атап өтті.
– Феликс Аркадьевичтің өмірбаяны терең мазмұнға ие оқиғаларға толы жарқын калейдоскоп секілді. Облыстық өлкетану музейінде жасаған кезіңізден Сізді жұртшылық Орал өңірі тарихының білгірі ретінде танып-біледі. Екіншіден, сіз білікті әрі тәжірибелі ұйымдастырушысыз. Ұзақ жылдар қалалық мәдениет бөлімін басқардыңыз. Біздің облыс тірліктің қайнаған ортасы. Елге сыйлы қонақтар, түрлі деңгейдегі өнер ұжымдары гастрольдік сапарлармен келіп-кетіп жатады. Осындай жүктеменің барлығын көтеретін қалалық мәдениет бөлімі. Бірнеше жыл шаһардағы мәдениет бөлімінің тізгінін ұстап, оралдықтар мен қонақтарға көтеріңкі көңіл-күймен, шалтты мейрам сыйлап келдіңіз. Сіздің қызметіңіздің үшінші бағытын ерекше атап өткім келеді. Бұл, Қазақстан халқы Ассамблеясы мүшесі ретінде ең басты құндылығымыз – халықтың бірлігі мен татулығын сақтауға қосқан зор үлесіңіз. Осы қарқындағы жұмысыңызды жоғары бағалаймыз. Өміріңіз ұзақ болсын. Еңбегіңіз әрдайым жемісті болып, сізден кейінгі толқын ізіңізді жалғастырып, мерейіңізді өсіре берсін, – деп құттықтауын жеткізді БҚО әкімінің орынбасары Ғабидолла Абдоллаұлы.
Салтанатты кешке қатысқан Феликс Баюканскийдің әріптестестері, қызметтес болған замандастары, достары мен шәкірттері ыстық лебіздерін білдірді. Кеш иесінің сүйіп тыңдайтын әндері орындалып, өнер ұжымдары биден шашу шашты. Шара соңында мерейтой иесі сөз алып, еңбегін ескерусіз қалдырмаған облыс басшылығына, әріптес-ізбасарларына алғысын жаудырды.
Айта кетейік, шебер және тәжірибелі ұйымдастырушы, қоғам қайраткері жемісті еңбек жолында «Мәдениет қайраткері», «Ерен еңбегі үшін», Қазақстан халқы Ассамблеясына 20 жыл, «Қайсар», ҚР ІІМ 1-2-3 дәрежелі медальдарымен және тағы басқа наградалармен марапатталған болатын.
Соңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Астанадан Батыс Қазақстан облысына гуманитарлық көмек жіберілді
«Су тасқынынан зардап шеккендерге өтемақы төлеуде жеделдік қажет»
Пікір үстеу