КіруЕЛОРДА – ЕЛБАСЫНЫҢ ЕРЛІГІ
Батыс Қазақстан облысында «Nur Otan» партиясы бастауыш ұйымдарының форумы өтті. «ҚазИИТУ» ғылыми-білім кешенінің Студенттер сарайында өткен «Nur Otan» партиясының облыстық бастауыш партия ұйымдарының форумына Қазақстанның Тұңғыш Президентінің еңбегін еске алу үшін партияның белсенділері жиналды. Жиында бастауыш партия ұйымдарының мүшелері Қазақстан Республикасының Тұңғыш Президенті Нұрсұлтан Назарбаевтың жетістіктері туралы айтты. 
Форум жұмысына бастауыш партия ұйымдары мүшелерімен қатар, елорда атауының өзгеруін қолдайтын батысқазақстандықтар да қатысты.
«Nur Otan» партиясы Батыс Қазақстан облыстық филиалы төрағасының бірінші орынбасары Серік Сүлеймен әлемде көптеген қалалар белгілі мемлекет қайраткерлерінің есімдерін алып жүргенін айтты. Жиналғандарға Тұңғыш Президенттің еңбегі, реформалары халықтың жаппай қолдауына ие екенін жеткізді.
Батыс Қазақстан облыстық мәслихатының хатшысы Мәлік Құлшар 90-шы жылдары ел қандай жағдайда болғанын еске алып, Нұрсұлтан Назарбаев ұсынған реформалар елді бүкіл әлемге танымал еткенін атап өтті.
– Қазіргі таңда әлемді таңғалдырған қала тұрғызудың өзі бұл тұңғыш Елбасымыздың үлкен көрегендігі деп есептеймін. Астана қаласына Елбасы аты берілуі – бұл заңды құбылыс. Иә, қазір әртүрлі пікірлер туындап жатыр, бірақ түбінде тарих өзі таразылайды. Сондықтан қазір Нұр-Сұлтан атауына үйренбегендіктен тосырқай қарағанымызбен, түбінде ол Елбасымыздың үлкен еңбегі деп бағаланатын болады, ұрпаққа мұра болып қалады, – деп өз ойымен бөлісті «Өрлеу» БАҰО» АҚ бастауыш партия ұйымының төрайымы Софья Ізмұханбетова.
«Nur Otan» партиясының «Жас Отан» жастар қанатының белсенділері – жасотандықтар да бұл пікірді қолдады.
– Тұңғыш Президент әрқашан жастарға ерекше көңіл бөлді, соңғы мысалдардың бірі – 2019 жылды – Жастар жылы деп жариялау. Бір жыл бойы жастардың жол картасы қабылданып, онда жастардың әр түрлі топтарын қолдау бойынша жүйелі шаралар айқын белгіленген. Жастарға қатысты барлық мемлекеттік бағдарламалар жалғасатын болады деп сеніммен айта аламын, – деді «Жас Отан» жастар қанаты БҚО филиалы төрағасы Нұрғали Жолдасқалиев.
Айта кетейік, облыс бойынша 275 бастауыш партия ұйымы бар, олардың 64-і бүгін форум жұмысына қатысты.
Кәусар ДҮЙСЕКЕШҚЫЗЫ
Шолпан РАЙСОВА, «ҚазИИТУ» ғылыми-білім кешенінің «Тәрбие және әлеуметтік жұмыстар» бөлімінің маманы, Жастар ісі жөніндегі комитет жетекшісі:
– Астана бүгінде брендке айналды. Астана арқылы қазақтың аты әлемге танылды. Қазақстанның жаңа президенті Қасымжомарт Кемелұлы Тоқаевтың осы Астанаға Нұрсұлтан атауын беру жөніндегі жарлығын орынды деп ойлаймын. Бұл дер кезінде қабылданған шешім. Астанамыз Нұр-Сұлтан деп аталуы ұлтымыздың Назарбаевқа деген құрметі, алғысы деп білемін. Астана еліміздің жүрегі, тәуелсіздіктің символы, халқымыздың мақтанышы боп үлгерді. Барлығымыз үшін Астана, Қазақстан ұғымы егіз. Сондықтан да ел бірлігі артып, Елбасы салған дара да дана жолды жалғай бергеніміз жөн. Жастарға сенім артқан ұлт көшбасшысының алдыға қойған талап-тілектерін, мақсат-мұраттарын іске асыруда бүгінгі ұрпақ бар болмысымен, ынта-ықыласымен ел үшін қызмет етуге әзір. Тұңғыш Президенттің еңбегі зор, мәселен, оның «Төртінші өнеркәсіптік революция жағдайындағы дамудың жаңа мүмкіндіктері» Жолдауында көптеген маңызды мәселелер қозғалды. Жастар үшін «Smart Sity» және «IT» сынды тағы басқа да оқу, білім беру салаларындағы жаңа технологияларды дендеп енгізу қажеттігін айтуы болашақтың қамын ойлауы. Елбасы Жолдауында айтылған экономиканы өркендету талаптарына орай экономика, қаржы саласындағы білікті мамандарды даярлаудың да маңыздылығы жоғары тұратыны рас. Тәуелсіздік алған жылдардан бастап, экономикаға ерекше мән беріп, ішкі-сыртқы саясатты бір жолға қоя білген Нұрсұлтан Назарбаевтың құрметі үшін Астана атауы «Нұр-Сұлтан» болып өзгергендігін мен толық қостаймын.
Аягүл КЕРЕЕВА, Қазақстан инновациялық және телекоммуникациялық жүйелер университетінің ПД-121 тобының студенті:
– Сарыарқа төрінен орын алған елордамыздың сәнді-салтанатты түрде қалаға айналуына Тұңғыш Президент Нұрсұлтан Назарбаевтың қосқан үлесі зор екенін білеміз. Кешегі арман бүгін міне, ақиқат. Мәңгілік ел болуды аңсадық. Оған қол жеткіздік. Өзге елдермен терезесі тең елге айналуымыз да Нұрсұлтан Әбішұлының еңбегі. Президентіміз көреген саясатының арқасында ұлт көшбасшысы атанды. Осы ретте біз, жастар Елбасы Нұрсұлтан Назарбаевтың есімін мәңгі сақтау үшін басталған бастама, ұсыныс «Нұр-Сұлтан» атауының астанаға берілуін толық қолдаймыз. Өйткені, елорданың басты сәулетшісі Нұрсұлтан Назарбаевтың өзі.
Версия для печати
Соңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу