КіруТұңғыштар мекені «таңқалдырды»
Кеше, 26 шілде күні кешкісін Бөкейорда ауданының көркемөнерпаздары оралдық көрермендерге керемет концерт ұсынды.
Тамаша кеште көрермен қауымның назары – 86 жастағы Қаламқас Жасқалиқызына ауды. Ауылдық жерде қарапайым тірлік кешіп жатқан әже Қадыр Мырза Әлінің 35 өлеңін жатқа біледі. Ол ақын өлеңдерін тебірене оқып, көзайым көрерменді өзіне жалт қаратты! Сөйтіп, Тұңғыштар мекені» өнерімен елді таңқалдырды.
Биыл жыл басында Қадыр Мырза Әлі атындағы облыстық мәдениет және өнер орталығы «Ауыл – атамекен пернесі» атты тың жобаны қолға алды. Басты мақсат – Мемлекеттік сыйлықтың иегері, Қазақстанның Халық жазушысы, аты аңызға айналған Қадыр Мырза Әлінің туғанына 90 жыл толуына орай, өміршең жырларын халыққа насихаттап, рухын ұлықтау. Сондықтан Қадыр Ғиниятұлына арналған ғибратты шаралар облыста тым ертерек басталып кетті.
Соның ішінде барша аудан өнерпаздары Орал қаласының орталығында орналасқан Қадыр сарайға келіп, ашық аспан астындағы атшаптырымдай театрда өнерлерін паш етуде. Бұл жолғы кезек бөкейордалықтарға бұйырып, кеш шымылдығы әйгілі «Ақ Жайық» әнімен басталды. «Мен сені сағындым ғой, Ақжайығым» дегеннен-ақ, көрермен қауым қиқулап қоя берді. Екі сағат бойы көзайым жұртшылық Қадыр ақынның өлеңіне жазылған небір тамаша әндерді шалт көңілмен, зор ықыласпен тыңдады.Өйткені, 200-ден астам әнге мәтін жазған дара дарынның әдебиетте де, ән әлемінде де орны бөлек. «Өз елім», «Цыған серенадасы», «Асыл әже», «Тамаша», «Жездеке» секілді өлеңдеріне жазылған әндері шырқалғанда көрерменде қосыла жөнелді. Кеш соңы әйгілі «Атамекен» әнімен түйінделіп, алаулап от шашылды.
Бұдан соң сахна төріне көтерілген Бөкей орда ауданы әкімінің орынбасары Кеңсары Нұршинов барша жерлестеріне, осы жобаны қолдаған мәдениет басқармасына және Қадыр орталығына ризашылығын білдірді. Аудан әкімі Нұрлыбек Дауымовтың сәлемін жеткізіп, кеш қонағы, ақынның бауыры Күләш Ғиниятқызына кестелі орамал мен оюлы камзол сыйлады. Осы ретте Қадыр Мырза Әлі атындағы БҚО мәдениет және өнер орталығының директоры Серік Тоқмамбетов те шалғайда жатқан Құм-Нарынның өнерлі ұжымына, «Әжелер» ансамбліне, талантты жастарға ақ жол тіледі.
– Басқа да аудандардың концертіне қатысып жүрмін. Зал іші тап осылай толған емес. Бүгін концертке халық өте көп жиналды. Бөкейордалықтар бұл жобаға үлкен дайындықпен келіпті. Әсіресе, мені де жасы сексен алтыға келіп, сахнада ағамның өлеңдерін мүдірмей, мәнерлеп оқыған Қаламқас әже таңқалдырды. Өнері үстем болсын! – деді Күләш апай.
Шырайлы кеш соңында «Тұңғыштар мекенінен» келген таланттарға БҚО әкімі Нариман Төреғалиевтің атынан ықылас гүлі сыйланды.
Мира ХАМЗАҚЫЗЫ,
«Жайық ҮНІ»
Соңғы жаңалықтар
«ӘДІЛЕТ» ПАРТИЯСЫНЫҢ КӨШПЕЛІ ШТАБЫ ЖӘНІБЕК ЖҰРТШЫЛЫҒЫМЕН КЕЗДЕСТІ
Тұрақты даму – тиімді мемлекеттік басқару мен ортақ жауапкершіліктің нәтижесі
Бөрлі ауылында «Әділет» партиясының облыстық штаб мүшелері тұрғындармен кездесті
Жаңа Қазақстан Конституциясы – Әділетті қоғамның құқықтық негізі
«Жаңа талап» мемлекеттік қызмет мектебінің жаңа оқу жылы басталды
КАЗТАЛОВ АУДАНЫНДА 2 МЛРД ТЕҢГЕНІҢ 26 ИНВЕСТИЦИЯЛЫҚ ЖОБАСЫ БОЙЫНША МЕМОРАНДУМҒА ҚОЛ ҚОЙЫЛДЫ
Конституцияның 6-бабы: саяси әралуандық пен қоғамдық тұрақтылықтың құқықтық негізі
АВТОМОБИЛЬ КӨЛІГІ ЖӘНЕ АВТОЖОЛ САЛАСЫ ҚЫЗМЕТКЕРЛЕРІ ҚҰРМЕТКЕ БӨЛЕНДІ
Болашақтың экономикасына байыппен көшуге құқықтық негіз болатын жаңа Азаматтық кодекс қабылдау қажет»
Президент Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауы
Президент Қасым-Жомарт Тоқаев 28 қазан күні Қазақстан халқына Жолдауын жариялайды
Президент шет мемлекеттер басшыларының Ұлттық мерекемізге орай жолдаған құттықтауларына ризашылығын білдірді
ОРАЛДА РЕСПУБЛИКА КҮНІНЕ ОРАЙ МЕМЛЕКЕТТІК ТУ КӨТЕРУ РӘСІМІ ӨТТІ
Облыс әкімі Нариман Төреғалиевтің Республика күнімен құттықтауы
Жедел медициналық көмек станциясының жаңа әкімшілік ғимараты салынуда
Батыс Қазақстан облысында Республика күні қарсаңында сенбіліктер мен ауыл шаруашылығы жәрмеңкесі өтті
Мемлекет басшысы NVIDIA компаниясының негізін қалаушы және президенті Дженсен Хуангты қабылдады
«Подстепное – Федоровка – Ресей Федерациясының шекарасы»: БҚО-да автомобиль жолы пайдалануға берілді
Мемлекет басшысы Қасым-Жомарт Тоқаев Республика күніне арналған салтанатты жиында сөз сөйледі
