КіруБиыл ҰБТ тапсыру ережелеріне қандай өзгеріс енгізілді? Білім және ғылым министрлігі жауап берді
Биыл талапкерлер ұлттық бірыңғай тестілеуді екі рет тапсырып, ең жоғары ұпаймен гранттар конкурсына қатыса алады. Бұл туралы БҒМ Жоғары және жоғары оқу орнынан кейінгі білім департаменті директоры Әділет Тойбаев мәлімдеді.
Айтуынша, 29 сәуір құжат қабылдау басталғаннан бері негізгі ҰБТ-ға 130 мыңнан аса талапкер тіркелген. Өтініштерді қабылдау 14 мамырға дейін жалғасады. ҰБТ-ның өзі 16 мамыр мен 5 шілде аралығында өтеді.
«Биыл талапкерлер негізгі ҰБТ-ны екі рет тапсырып, үздік нәтижемен гранттарды тағайындау конкурсына қатыса алады. Бірақ бейінді пәндер комбинациясын ауыстыруға болмайды. Яғни бірінші рет физика-математика тапсырса, екінші рет те сол пәндерді тапсыруға міндетті», – деді Тойбаев орталық коммуникациялар қызметінде өткен баспасөз мәслихатында.
Тағы бір жаңалық, оның айтуынша, егер бірінші тестілеуде талапкер ереже бұзса, ол ҰБТ-ны екінші рет тапсыра алмайды. Ал егер екінші рет тапсыру кезінде ережелерді бұзса, бірінші және екінші тестілеудің нәтижелері жойылады. Яғни бала гранттарды тағайындау конкурсына қатыса алмайды.
«Биыл ақпараттық қауіпсіздікті қамтамасыз ету бойынша ҰБТ «1 компьютер – 2 камера – 1 тестіленуші» қағидасы бойынша өткізіледі. Талапкердің жұмыс орнында негізгі камерадан басқа тұлғаны анықтауға (Face ID) және бөгде адамдардың кіруіне жол бермеуге мүмкіндік беретін қосымша алдыңғы веб-камера орнатылған», – деп түсіндірді департамент директоры.
Сондай-ақ, академиялық адалдықты сақтау үшін талапкерлердің тестілік нұсқасы таңбаланады, яғни ҰБТ-ның әрбір қатысушысының жеке тест нұсқасы болады. Талапкерлер ережелерді бұзып, тест тапсырмаларын аудиториядан тыс жерлерге шығаруға әрекет жасаса, олардың нәтижелері жойылады.
ҰБТ-дағы пәндердің саны биыл да өзгермейді – үш міндетті және екі таңдау бойынша. Тест тапсырмаларының саны – 120. Оның ішінде Қазақстан тарихынан – 15, математикалық сауаттылықтан – 15, оқу сауаттылығынан – 20 және екі бейіндік пәннен – 35. Ең жоғарғы ұпай саны – 140.
ҰБТ кезінде компьютер экранында калькулятор, Менделеев кестесі және металдардың бірқатар белсенділігі қосылған тұздың ерігіштігі кестесі болады.
Тестілеуге 4 сағат (240 минут) беріледі. Ал ерекше білім беру қажеттілігі бар балаларға қосымша 40 минут уақыт беріледі. Сонымен қатар олар үшін суреттерсіз, диаграммаларсыз және схемаларсыз сынақ нұсқалары әзірленді.
Үміткерлер тестілеу аяқталғаннан кейін 30 минут ішінде апелляцияға бере алады. Сертификат аппеляция туралы шешім қабылданғаннан кейін тестіленушінің жеке кабинетінде қолжетімді болады.
Stan.kz
Версия для печатиСоңғы жаңалықтар
«Мерейлі отбасы-2024» ұлттық конкурсының қалалық кезеңі өтеді
Пікір үстеу