ВАКЦИНА АЛҒАН БЕЛСЕНДІЛЕРГЕ ЖЕҢІЛДІК БАР

Бүгінде Жәңгір хан атындағы Батыс Қазақстан аграрлық-техникалық университетінің 300-ден астам қызметкері коронавирусқа қарсы вакцина салдыртты.

Жұқпалы індетке қарсы күресте маңызы зор вакцина салдыру науқаны жоғары оқу орнында биылғы сәуір айында басталған еді. Университеттің басқарма мүшелері, институт басшылары және жоғары мектеп жетекшілері ұжымға ауру жұқтыру қаупін азайтуға күш салуда. Бұл тұрғыда әріптестеріне үлгі болып, аурудың алдын алуға атсалысқан 82 жастағы ардагер-ұстаз Тілекжан Рысқалиевті атап өтуге болады.

Индустриалды-технологиялық институт директорының орынбасары Әлия Оразова да – өз еркімен екпе алған қызметкерлердің бірі. Ол ең алдымен үйдегі қарт анасы мен балаларының қауіпсіздігін ойлаған. Бүгінде Ресейде білім алып жүрген ұстаз «Спутник V» вакцинасын таңдапты. «Мен үшін ең бастысы, өзімнің және отбасымның амандығы. Сол үшін де алғашқылардың бірі болып коронавирусқа қарсы екпе алдым» деді Әлия Фрунзеқызы. Студенттік өзін-өзі басқару ұйымының төрағасы Бақытжан Әлжанов та екпе алу барысында алдымен өзінің денсаулығын ойлағанын айтты.

– Алдағы оқу жылын індет жұқтырып алудан қорықпай, еш алаңсыз бастағым келеді. Бұл қадам өзімді де, өзгелерді де қорғауға мүмкіндік береріне сенемін. Достарымды да вакцина салдырып, өзгелер үшін жауапкершілікті сезінуге шақырамын, – дейді студент.

Тағы бір айта кетерлігі, Жәңгір хан университетінде профессор-оқытушылар құрамын, қызметкерлер мен студенттерді белсенді вакцинациялауға ынталандыру шаралары қолға алынуда. Яғни, вакцина салдыртқан 50 оқытушы мен қызметкерге «Ақжайық» шипажайына демалу үшін төлеген қаражатының 50 пайызына өтемақы төлеу, алғашқы 150 студенттің оқу ақысына 5 пайыздық жеңілдік, екпе алған студенттерге жатақханада кезексіз орналасу құқығын беру, еңбек демалысы кезінде вакцина алған 100 оқытушы мен қызметкерге қосымша демалыс беру, вакцина салдыртуды әлеуметтік желілер мен БАҚ арқылы белсенді насихаттаған 50 оқытушы мен қызметкерге, 100 білім алушыға арнайы сыйлықтар тағайындау; оқытушылар мен білім алушыларға біліктілікті арттыру және академиялық алмасу бойынша басымдықтар беру және университеттің фитнес залына тегін абонементтер беру.

Университеттегі вакцинациялау науқаны арнайы медициналық орталықта жүргізілді. Қалалық №6 емхана дәрігерлері алдымен екпе алуға ниет білдіргендердің денсаулық жағдайын тексеріп, сауалнама толтырды. Алдыңғы кезекте екпе алғандар бүгінде медициналық құжаттарын да алып үлгерді. Барлық ұжым мүшелерін өз денсаулығымен қатар басқаларды да COVID-19 індетінен сақтандыру үшін вакцина салдыртуға шақырамыз.

Ләззат ҚАЖЫМОВА

университет медиа-орталығының маманы

Версия для печати