БҚО-ДА ӨТКЕН ТӘУЛІКТЕ 83 АДАМНАН КОРОНАВИРУС ИНФЕКЦИЯСЫ АНЫҚТАЛДЫ

Батыс Қазақстан облысында коронавирустық инфекция бойынша эпидемиологиялық жағдай туралы бүгін өңірлік коммуникациялар қызметіндегі брифингте облыстың бас мемлекеттік санитариялық дәрігері М.Арыспаев мәлім етті.

Облыста 1 қаңтар мен 18 ақпан аралығында коронавирустық инфекциямен барлығы 3 191 жағдай тіркелген, оның ішінде 2 049 жағдайда ауру белгілері бар болса, 1 142 жағдайда ауру белгілері жоқ.

1 ақпаннан бері COVID-19 инфекциясы бойынша 1354 жағдай анықталды. Аталған жағдайлар ЖРВИ белгілері бойынша тексерілген 654 адамда, науқастармен жақын қарым-қатынаста болған адамдарды тексеру кезінде 450 адамда, профилактикалық мақсатта тексерілген 159 адамда және стационарларға емдеуге жатқызу алдында эпидемиологиялық қадағалау мақсатында сынама алынған 91 адамда анықталған.

1 ақпаннан КВИ жұқтырған науқастармен қарым-қатынаста болған 1990 адам анықталып, медициналық бақылауға алынды.

– Кәсіби құрамы бойынша тіркелген жағдайлардың 31,9 пайызы жұмыс істейтін адамдар арасындағ 26,8 пайызы – зейнеткерлер, 23,1 пайызы – жұмыс істемейтіндер, 7,2 пайызы – оқушылар және мұғалімдер, медицина қызметкерлері, студенттер, балабақша тәрбиешілері, балалар арасында да анықталып отыр. Облыс бойынша өткен тәулік ішінде, 18 ақпанда коронавирустық инфекциямен 83 жағдай тіркелді, – деді М.Арыспаев.

Оқу жылы басталғалы COVID-19 инфекциясы мектепте дәстүрлі форматта оқитын 212 оқушыда, қашықтан оқитын 209 оқушыда, барлығы 421 оқушыда анықталды. Үшінші тоқсанда (11 қаңтардан бастап) оқушылар арасында COVID-19 инфекциясы 207 (114-дәстүрлі форматта, 93-қашықтан оқитын) оқушыда анықталды. 12-18 ақпан аралығында қала және аудандардың Бас мемлекеттік санитариялық дәрігерлерінің қаулысымен 4 мектеп карантинге жабылды.

Айта кетейік, індет басталғалы Батыс Қазақстан облысында COVID-19-дың 12 412 жағдайы тіркелді. Індеттен 9 970 адам сауығып, 199 адам қайтыс болды.

Эльмира НҰҒМАНОВА,

zhaikuni.kz

Версия для печати