«Неврологиялық өзгерістер, жүрек ақауы»: ҚАЗАҚСТАНДА ПОСТКОВИДТІ ПАНДЕМИЯ БОЛУЫ МҮМКІН

Медицина ғылымдарының докторы, профессор, ДСМ Ұлттық Фтизиопульмонология ғылыми орталығы директорының клиникалық және ғылыми жұмыстар жөніндегі орынбасары Ләззат Ералиева ОКҚ өткен онлайн-брифингте екпе салдырғанша коронавируспен ауырған дұрыс емес пе деген сауалға жауап берді.

Журналистердің сөзінше, дәрігерлер коронавирус кезінде әртүрлі жанама асқынулар пайда болуы мүмкін екенін айтады. Соның ішінде жүрек-қан тамыр жүйесіндегі асқынулар. Осыған байланысты БАҚ өкілдері коронавирустан кейінгі кезең қалай болатынын сұрады. Ләззат Ералиеваның айтуынша, адамзатты постковидті пандемия күтіп тұр. «Адамзатты дәрігерлер коронавирус инфекциясының зардаптарымен бетпе-бет келетін постковидті пандемия күтіп тұр. Оның қандай салдары барын біз қазір білеміз – олар әртүрлі. Неврологиялық өзгерістер, жүрек ақауы жатады. Қазірдің өзінде COVID-19 көп жағдайда қатерлі ісік ауруларының дамуына түрткі болатыны белгілі», – деді.

Ол коронавируспен ауырып шыққан адамдарда шаршаңқылық, ұйқысыздық, түнде кенеттен үрейлену сияқты неврологиялық өзгерістер байқалатынын атап өтті. «Сол себепті екпе ектіргеннен гөрі ауырып шыққан дұрыс деп ойлау – мүлде қате пікір», – деді профессор.

Еске сала кетсек, Алматы қаласының санитарлық-эпидемиологиялық бақылау департаменті жетекшісінің орынбасары Әсел Қалықова коронавирус пандемиясы жеті жылға созылады деген ақпаратқа пікір білдірген болатын. Оның сөзінше, пандемияның жеті жылға созылуы мүмкін емес.

https://kaz.nur.kz/society/1898773-nevrologiyalyq-ozgerister-zurek-aqauy-qazaqstanda-postkovidti-pandemiya-boluy-mumkin/?utm_source=clipboard&utm_medium=article-fragment

Версия для печати