Кіру«ІЗ-ТҮССІЗ КЕТКЕНДЕРДІ ТАБУҒА ТҰРҒЫНДАРДАН КӨМЕК КЕРЕК»
Кейінгі үш жыл ішінде БҚО Полиция департаментінде азаматтардың жоғалуы туралы 465 шағым тіркелген. Бүгінгі күнге дейін жоғалған сегіз адамның мекенжайы анықталмаған. БҚО полиция департаментінің бастығы М.Аблазимов өзінің әлеуметтік желідегі парақшасында облыс тұрғындарын жоғалған жандарды іздестіруде полицейлерге көмек көрсетуге, із-түзсіз кеткендердің туыстарымен қауышуына белсенді түрде үлес қосуға шақырды.
«Шығып кетті және қайта оралмады». Хабар-ошарсыз кеткендер туралы өтініштердің бәрі осылай басталады. Дүкенге шығып, қайта келмеген, жұмыстан немесе сабақтан шыққанымен, үйге әдеттегі уақытында келмеген, межелі орынға жетпеген – осындай себептер жоғалған адамды іздеу туралы арызбен полицияға жүгінуге негіз болады» деген өз жазбасында Махсудхан Аблазимов.
Із-түссіз жоғалғандарды іздеумен айналысатын қылмыстық іздестіру бөлімі қызметкерлерінің айтуынша, іздестіру жұмыстарын жүргізуде оның жоғалу себебінен бөлек ол туралы ақпарат іздеуді жеделдету де маңызды. Мәселен, оның телефонының нөмірі, ұялы телефонының IMEI нөмірі, достарының мекенжайлары мен байланыс нөмірлері, айналысатын хоббиі мен әдеті, араласатын ортасы, жоғалу жағдайы. Сондай-ақ қандай киімде шығып кеткеніне мән беру керек. Әсіресе кәмелетке толмаған балалар мен егде жастағылардың кіммен, қай бағытта кеткені туралы деректер, олардың өздерімен бірге құжаттарының бар немесе жоқ екені маңызды.
Полиция қызметкерлері кез келген жағдайда жоғалу мерзіміне қарамастан жедел түрде іздеу шараларын жүргізеді. Азаматтың жоғалғаны туралы шағым түскен сәтте жедел тергеу тобы оқиға орнына барып, материал жинақтайды. Туыстарынан, таныстарынан сауалнама алып, іздеу үшін маңызды деректер жинақталады. Оның тұрғылықты жеріндегі және соңғы рет болған аумағындағы бейнебақылау камералары зерделенеді. Дегенмен, тұрғындардың үлес қосуы да аса қажет-ақ. Махсудхан Нұғманұлы өз жазбасында полицейлердің атқаратын жұмыстары және нәтижесі туралы хабардар етіп, іздеу шараларына көмек көрсетуде облыс тұрғындарына үн тастады.
«Іздестіру үшін барлық жеке құрам бағыттама алады. Соның нәтижесі ретінде барлық түскен шағымдардың ішінен «жедел түрде», яғни екі-үш тәулік ішінде 308 жоғалған азаматтың табылғанын атап өту керек. Бұл үш жылдағы көрсеткіш. Жоғалған жандардың басым көбісі отбасындағы жанжал немесе кикілжіңнен кейін үйден кетіп қалған және «бейәдеп өмір салтын ұстанатын» алкогольге құмар, тұрақты тұратын орны және жұмысы жоқтар. Осы санаттағы азаматтардың көпшілігін полиция қызметкерлері шалғайдағы қыстақтардан табады. Яғни, оларды табыс және тегін тамақтануды ұсынумен «арбап», шаруа қожалықтарындағы жұмысқа алып кететін жағдайлар бар. Аудандардағы полиция бөлімдерінің қызметкерлері тұрақты негізде қыстақтарда, шаруа қожалықтарында тексеру жүргізіп тұрады. Соның нәтижесінде 2018-2020 жылдардың ішінде 12 азамат шаруа қожалықтарынан табылды. Жоғалған азаматтарды іздеуде дала, орман алқабын, су қоймаларын қамту қажет болады. Осы орайда төтенше жағдайлар департаменті қызметкерлері мен әскерилерді тартуға тура келеді. Дегенмен, қабылдаған шараларымыз әрқашан қысқа мерзімде нәтижелі бола бермейді. Іздестіруде халықтың және бұқаралық ақпарат құралдарының көмегі қажет. Егер жоғалған адам тез табылмаса, бұқаралақ ақпарат құралдары, әлеуметтік желілер арқылы кескін келбеті, назар аударарлық мәліметтерді көрсетіп, хабарлама береміз. Бірақ, өкінішке орай, осы кезге дейін тұрғындар тарапынан хабарсыз кеткен адамды табуда нақты көмек болған жоқ. Азаматтар іздестіру жұмыстарына қатысуға құлықсыз. Волонтерлар ғана көмектесуде. Айта кеткен жөн, ақпараттарды жинау, сауалнама жүргізу, ұзақ уақыт алады, осы ретте еріктілер айтарлықтай көмек көрсете алар еді. Сол себепті облыс тұрғындарын қалыс қалмауға, құқық қорғау органына көмек көрсетіп, белсенділік танытуға шақырамын. Осылайша, өз туыстарын іздеген жандарға көмек көрсете аласыздар» деді полиция генерал-майоры М.Аблазимов.
Департамент бастығының ұсынған мәліметінше, 2018-2020 жылдары азаматтардың жоғалуы туралы 465 шағым түскен. Оның ішінде 2018 жылы – 193 адам, 2019 жылы – 127 адам, 2020 жылы – 145 адам. Үш жылдың ішінде жоғалған сегіз адамның қазір қайда екені табылмаған.
zhaikuni.kz
Версия для печатиСоңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу