КіруКӘСІПКЕР ОБЛЫСТЫҚ АУРУХАНАҒА ОТТЕГІ КОНЦЕНТРАТТАРЫН СЫЙЛАДЫ
Бүгін оралдық кәсіпкер, «Давид Строй» ЖШС директоры Қанат Жанғазиев облыстық көпбейінді ауруханаға әрқайсысының құны 680 мың теңге тұратын үш оттегі концентратын сыйға тартты. Қазіргі таңда емдеу ісіне аса қажетті құрылғы қысылтаяң шақта жерлестеріміздің қауіпті дерттен айығуына сеп болары сөзсіз.
Облыстық көпбейінді аурухана директоры Арман Байдеуов дәрігерлерге қолдау, науқастарға көмек көрсетіп жатқан жанашыр жандарға шексіз алғысын білдірді.
– Бүгінде ауруханадағы жағдай тым ауыр. Провизорлық стационарға күніне ауа жетпей демігіп, жиырмадан аса науқас түседі. Осы тұста оларға оттегі концентраты аса қажет. Бизнесменнің бұл сыйы науқастарға дер кезінде көмек көрсетуге үлкен сеп болды. Сол себепті медициналық қызметкерлердің, емделушілердің атынан ризашылығымызды білдіремін, – деді «Көпбейінді облыстық ауруханасы» ШЖҚ МКК директоры Арман Байдеуов.
Өз кезегінде кәсіпкер облыстық ауруханаға алғаш рет қайырымдылық жасап отырғанын тілге тиек етіп, алдағы уақытта қолдан келген көмегін аямайтынын жеткізді.
– Елімізде болып жатқан төтенше жағдайға бейжай қарап отыра алмадық. Осы орайда Орал қалалық әкімшілігіне хабарласып, тұрғындарға қандай көмек қажеттігін сұраған едік. Ақылдаса келе, облыстық ауруханада оттегі концентраты жетіспейтінін білдік. Сол себепті ауруханаға үш құрылғыны алып келдік. Бұл бастаманы өзге кәсіпкерлерге жолдаймыз. Мұндай қиындықты тек бірлігіміздің нәтижесінде ғана жеңе аламыз, – дейді Қанат Қайратұлы.
Айта кету керек, 7 шілдедегі мәлімет бойынша өңірімізде індет жұқтырғандар саны – 3423-ке жетті. Олардың 1185-і жазылып, үйлеріне шыққан. Облыстық аурухананың провизорлық стационар бөліміне күніне 20-22 науқас түссе, 100-ден аса науқас ем алуда. Аурухана басшысының мәліметінше, он екі науқас ауыр халде жансақтау бөлімінде жатыр.
Жуырда облыстық көпбейінді ауруханада 150 орын провизорлық стационар ашылады деп күтілуде.
Кәусар БАЙҒАЛИЕВА
Версия для печати
Соңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Астанадан Батыс Қазақстан облысына гуманитарлық көмек жіберілді
«Су тасқынынан зардап шеккендерге өтемақы төлеуде жеделдік қажет»
су тасқынының алдын алу жұмысына 1 577 техника жұмылдырылды
Пікір үстеу