КіруЖАҚСЫЛЫҚ ЖАСАП ЖАРЫСАЙЫҚ!
Өңірімізде бастау алған «Ақжайық шеберлер қаласы» жобасы шеңберінде бүгін жергілікті шеберлер қаладағы №5 бағыттағы автобустың соңғы аялдамасында жүргізушілер мен жолаушыларға тегін маска үлестірді.
Бұл жолы БҚО волонтерларын қолдау орталығы «Біз біргеміз» акциясы аясында жеке кәсіпкер Жарқынай Еселбаеваның бастамасымен игі істі қолға алыпты. Волонтерларды қолдау орталығының және «Ақжайық шеберлер қаласы» жобасының жетекшісі Айболат Құрымбаевтың айтуынша, Еріктілер жылы шеңберіндегі бұл акция әрі қарай да жалғасын табады. – Әрине, біздің ресурстарымыз шектеулі. Егер мата сататын кәсіпкерлер қолдайтын болса, масканы тегін тігуге әзірміз. Бүгін міне, тегін 100 масканы қоғамдық көлік жүргізушілері мен жолаушыларға таратудамыз, – дейді ол.
Аталмыш жоба мүшесі, «Рахмет» жеке кәсіпкерлігінің иесі Жарқынай Еселбаева бұған дейін де тың идеяларымен танымал жан.
– Менің командамда Қазақстанның әр қаласынан 100-ге жуық шебер бар. Қоғамда орын алған келеңсіз жағдайға байланысты маска тапшылығы орын алуда. Осыған орай шеберлер бір ауыздан келісіп, тегін маска таратуды қолға алдық. Мақсатымыз – ел тыныштығы, халықтың саулығы. Бір маскамыз – бір адамның өмірін сақтап қалса игі. Бұл жобаны өзге қалалардағы шеберлерге жолдаймын. Күніне шамамен 50 маска тігемін. Тапсырыстар түсіп жатыр, бірақ әзірге тегін таратамыз. Үйде отырған өзім секілді көпбалалы аналарды әр адамның қолынан келетін осындай пайдалы іспен айналысуға шақырамын. Жақсылық жасап жарысайық, – дейді Жарқынай Рахметқызы.
Соңғы аялдамаға аялдаған автобус жүргізушілері мен кондукторлар қоғамдық көліктерді залалсыздандырып, сақтық шараларын жасауда. Жүргізуші Роман Керцманның айтуынша, дүйсенбіден бері қоғамдық көлікке мінетіндердің нөпірі күрт азайған. – Әр айналым сайын автобусты хлорлап, сақтық шараларын қатаң сақтаудамыз,. Әр адамның денсаулығы маңызды, – дейді ол.
Кәусар БАЙҒАЛИЕВА
Версия для печатиСоңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу