ОРАЛ ҚАЛАСЫНЫҢ ӘКІМІ ДАРЫНДЫ ОҚУШЫЛАРМЕН ЖҮЗДЕСТІ

Орал қаласының әкімі Абат Шыныбеков шаһардағы дарынды мектеп оқушылармен кездесті.

Оқушылар сарайында ұйымдастырылған кездесуге биылғы республикалық пәндік олимпиаданың облыстық кезеңінің жүлдегерлері мен халықаралық, республикалық деңгейдегі ғылыми жобалар байқауларының жеңімпаздары қатысты.

Қалалық білім беру бөлімінің мәліметінше, биылғы пәндік олимпиаданың облыстық кезеңінде командалық есеп бойынша қала мектептерінің командасы екінші орынды иеленді. Қатысқан 82 оқушының 51-і жүлделі орындарды иеленген болатын. Олардың 11-і – бірінші, 20-сы – екінші орын алған. Осы 31 оқушы олимпиаданың республикалық кезеңіне ұсынылып отыр. Іріктеуден өткендер наурыз айында Талдықорған, Қарағанды қалаларында болатын олимпиаданың қорытынды кезеңінде облыс намысын қорғамақ.

Кездесуде оқушылар оқу жылында қол жеткізген өз жетістіктері туралы айтты. Жаңалыққа жаны құмар өрендер зерттеулері мен қиялдарынан туған ғылыми жобаларын таныстырды. Күннен қуат алатын «Ақылды үй», от жылуын электр энергиясына айналдыратын қозғалтқыш, қызғалдақ өсіру, кітап оқу белсенділігін арттыруға интернет-блоктың ықпалы сынды қызықты жобалар – оқушылардың ізденіске деген ілтипаттарының айғағы десек болады. Дарынды оқушылардың қатарында ұлттық қолөнер бұйымдары мен құлпытастар тарихын зерделеп, өткенді жаңғыртуға ынталанып жүргендері де бар.

Сұхбат барысында қала әкімі Абат Абайұлы оқушылардың сұрақтарына жауап беріп, Ұлы ақын Абай Құнанбайұлының рухани мұрасынан нәр алуға шақырды. Жүздесуге қатысқан оқушыларға алғыс хат ұсынып, таланты ұшқыр, талғамы биік балғындардың армандарына жетуіне тілектес екенін жеткізді.