КіруБАС ИМАМ БӨРЛІ АУДАНЫНДА
ҚМДБ-ның БҚО облысы бойынша бас имамы Мұратбек Қыстаубаев өңірлік мешіттердің тыныс-тіршілігімен танысу мақсатында Бөрлі ауданы, Ақсай қалалық мешітіне арнайы іс-сапармен барды.
Іс-сапар барысында Бөрлі ауданының әкімінің орынбасары Е.Ихсановпен кездесіп, кездесу барысында ел аумағындағы діни ахуал жайын сөз етті.
Қасиетті жұмада бас имам Мұратбек Қыстаубаев Бөрлі ауданы, Ақсай қалалық мешітінің жамағатымен жүздесіп, мұсылманның тұлабойында табылуы тиіс негізгі жеті көркем сипатты қамтитын «Жеті рухани қазық» тұғырнамасын түсіндіріп, «Салиқалы әйелдің сипаты» тақырыбында уағыз айтты. Бас имам өз сөзінде: «Халқымыз «Отан – отбасыдан басталады» деген. Кез келген қоғамның маңызды институттарының бірі – отбасы. Ал отбасы мен қоғамның тұрағы ол – әйел. Баланың иманды, ер-жігіттің ұстамды болуына әйелдің әсері өте көп. Ертең елді басқаратын, халықты жақсылыққа бастап, имандылыққа ұйытатын тұлғалардың өмірге келуіне әйелдер үлкен себепкер болады. Ал Абдуллаһ ибн Амр әл-Ас (р.а.) жеткізген хадисте былай делінген: «Алла Елшісі: «Бұл дүние (мен оның ішіндегі нығметтердің бәрі де) уақытша берілген. Ондағы нығмет атаулының ең абзалы – салиқалы әйел». Әйел салиқалы болса, отбасы түзеледі. Отбасы түзелсе, ел түзеледі. Ел түзелсе, имандылық, ізгілік, қайырымдылық, жанашырлық, адамгершілік секілді құндылықтар салтанат құрады. Имандылық салтанат құрған қоғамның берекесі мен бірлігі, жақсылығы артады. Жақсылығы артқан ел бақытты өмір сүреді. Алла Тағала баршамызға бақытты өмір сүруді нәсіп етсін!» деп өз сөзін қорытындылады.
Сонымен қатар бас имам сапар барысында ауыл ақсақалдарымен кездесіп, Бөрлі ауылдық мешітінің де жай-күйімен танысты.
Үміт Жәңгірова, Бөрлі ауданы
Соңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Астанадан Батыс Қазақстан облысына гуманитарлық көмек жіберілді
«Су тасқынынан зардап шеккендерге өтемақы төлеуде жеделдік қажет»
су тасқынының алдын алу жұмысына 1 577 техника жұмылдырылды
Пікір үстеу