ЖАРЫҚТЫҢ БАҒАСЫ ҚАЙТА ҚЫМБАТТАДЫ

БҚО-да электр энергиясының тарифі 1 қыркүйектен бастап, 1 теңгеге қымбаттады. «Батысэнергоресурс» ЖШС өкілдері оның себебін кәсіпорынның қарызға батуымен байланыстырады.

Естеріңізде болса, тариф құны үстіміздегі жылдың 1 қаңтарынан бастап, Елбасының тапсырмасына сәйкес 1 теңгеге арзандаған болатын. Бағаның бір теңгеге төмендеуінен коммуналдық мекеме 700 млн. теңгеге шығынға батқан-мыс. Тұтынушылар күзден бастап сағатына – 11,5 теңге төлейтін болды. Бұл өткен жылдың соңына дейінгі қалыптасқан баға. «Батысэнергоресурс» ЖШС бас директоры Дина Ғалиметденова бұл қадамға амалсыздан барып отырғанын мәлімдеді. – Қазір кәсіпорынның серіктес мекемелерге берешегі – 700 млн. теңгені құрайды. Бұдан бөлек бірнеше жарық тарату стансаларына екі айдан бері қарызымызды өтей алмай келеміз. Сол себепті 1 теңге тарифті қайта өсірдік. Бұл тұрғындар үшін қолайсыздық тудырады деп ойламаймыз. Бұл қымбаттау емес, тек бұрынғы тариф құнын қайта қалпына келтіру болып табылады, – деді серіктестік директоры. Бұрынғы бағаға қайта оралу арқылы кәсіпорын осы уақытқа дейін қордаланған қарызды өтейтініне сенімді. Айта кеткен жөн жарық бағасы бюджеттік ұйымдар мен кәсіпкерлік субьектілері үшін өзгеріссіз қалды. Табиғи монополияларды реттеу басқармасының мамандары коммуналдық тарифтің қымбаттауы арнайы заңмен реттелетінін мәлімдеді. Яғни, «Батысэнергоресурс» ЖШС өз бетінше жарық бағасын көтерді. Бұған заң бойынша рұқсат бар. Ал өзге коммуналдық мекемелерден әзірге тариф құнының қымбаттауы туралы өтініш агенттікке түспеген. Естеріңізде болса, осыдан бірер апта бұрын шығынға батқан «Орал таза сервис» ЖШС өкілдері де тариф құнының қайта қарау туралы ойларын ортаға салған еді.

Айнұр ТӨЛЕУҒАЛИҚЫЗЫ

Версия для печати