Қоғамдық қауіпсіздік пен құқықтық тәртіп: БҚО-да 25 елді мекен ішімдіктен бас тартты

Қазақстан Республикасының Премьер-министрі Олжас Бектеновтің төрағалығымен Үкімет жанындағы Құқық бұзушылық профилактикасы жөніндегі ведомствоаралық комиссияның кезекті отырысы өтті. Оған облыс әкімі Нариман Төреғалиев селекторлық режим арқылы қатысты.

Жиында Мемлекет басшысының тапсырмасымен әзірленген Қоғамдық қауіпсіздікті қоғаммен әріптестік жасап қамтамасыз етудің 2024–2028 жылдарға арналған тұжырымдамасын жүзеге асыру барысы талқыланды. Сондай-ақ көші-қон ахуалы мен жол қауіпсіздігін қамтамасыз ету мәселелері қаралды. Орталық мемлекеттік органдардың басшылары баяндама жасап, атқарылған жұмыстар мен алдағы міндеттерге тоқталды.

Облыс әкімі Нариман Төреғалиев комиссия отырысынан соң құзырлы құрылымдарға Мемлекет басшысы, Үкімет жүктеген міндеттерді тиісті деңгейде орындау, жол-көлік оқиғаларының алдын алу бағытындағы жұмыстарды жүйелі түрде жалғастыру жөнінде нақты тапсырмалар берді.

«Заң мен тәртіп» қағидатын ілгерілету – қоғамдық қауіпсіздіктің кепілі. Референдумда қабылданған Конституцияда да бұл бағытта тиісті нормалар бекітілді. Жиында жан-жақты талқыланған тұжырымдамада нақтыланғандай, қоғамдық қауіпсіздік пен құқықтық тәртіпті қамтамасыз етуде азаматтық қоғамның белсенділігі маңызды. Мәселен, өңірде тұрғындардың өз еркімен 25 елді мекен ішімдіктен түбегейлі бас тартты. Одан бөлек ондаған ауылдың дүкендерінде спирттік өнімдер сатылмайды. Тәртіп сақшыларының айтуынша, игі бастаманы жүзеге асырған ауылдарда құқық бұзушылық, соның ішінде тұрмыстық зорлық-зомбылық деректері тіркелмеген.

БҚО әкімінің баспасөз қызметі

Версия для печати