Кіру«ЖАСТАР ЖЫЛЫ» РЕСМИ ТҮРДЕ АШЫЛДЫ!
Бүгін Астанада Елбасы Н.Назарбаевтың қатысуымен «Жастар» жылының салтанатты ашылуы өтті.
«Тәуелсіздіктің ұрпақтары» атауымен өткен іс-шараға Үкімет мүшелері, Парламент депутаттары, жергілікті атқарушы органдардың басшылары, ҚР Президенті жанындағы Жастар саясаты кеңесінің мүшелері, «100 жаңа есім» байқауының жеңімпаздары, «Болашақ» бағдарламасының түлектері, ғалымдар, шығармашылық, студенттік және жұмысшы жастар өкілдері, спортшылар, дарынды балалар, заманауи медиа саласының өкілдері, балалар үйінің тәрбиеленушілері мен түлектері, ерекше қажеттіліктері бар ұл-қыздар мен әскери қызметкерлер қатысты.
Шара алдымен жас қазақстандықтардың жүзеге асырған табысты жобалары мен жаңа өнімдердерінің таныстырылымымен басталды.
Елбасының үнемі кейінгі толқынды қолдап, жастар саясатын дамытуды көздейтіні бекер емес. Ол мұны кезекті жолдауында да ашып айтты. «Қазақстандықтардың әл-ауқатының өсуі: табыс пен тұрмыс сапасын арттыру» атты жолдауда Елбасы 2019 жыл елімізде Жастар жылы деп аталатынына екпін түсірді. Елбасы Жарлығымен жарияланған «Жастар жылы» нені атқаруы тиіс? Өз баяндамасында Мемлекет басшысы Н.Назарбаев осы сұрақтың шешімін тарқатып, жастар үшін өзекті төрт мәселеге тоқталды. Олар – жастардың білім деңгейін көтеру, жұмысқа орналастыру, баспанамен қамту және жасампаздық. Спикерлер ретінде түрлі салаларда жетістіктерге жеткен жастар баяндама жасады.
Астана төрінде өткен шараны Жайық өңірінің ізбасарлары да тікелей эфирде көрді. Тікелей көрсетілім Жәңгір хан атындағы БҚАТУ, М.Өтемісов атындағы БҚМУ мен ҚазИИТУ және басқа да оқу орындарында ұйымдастырылды. Батысқазақстандықтар бірінші кезекте Нұрсұлтан Әбішұлына биылғы жылды «Жастар» жылы деп жариялағаны үшін ризашылықтарын білдірді.
«Еріктілерге гранттар бөлінеді»
– Елбасымыз жастардың потенциалын көтеру, бәсекеге қабілетті ең білімді, ең таланттылардың қатарында болуы үшін жасалуы тиіс жұмыстарды айтып, Үкіметке, министрліктерге тапсырма берді. Біз үшін қуанышты жағдай – ауыл жастарының әлеуетін арттыру мақсатында «Ауыл – ел бесігі» жобасының басталуы. Сонымен қатар «Дипломмен ауылға» жобасы шеңберінде берілетін бір реттік жәрдемақы 70 АЕК-тен 100 АЕК көлеміне көтерілетін болды. 250 мың теңге болатын қаражат ауылға барған жастарға мол қолдау. Олардың ауылдың азаматы ретінде сіңісіп кетуі үшін тиімділігі зор. Сондай-ақ Елбасы «Жас кәсіпкер» жобасын қолға алуды тапсырды. Бұған дейін кәсіпкерлік саласында мұндай ұғым болмаған еді. Бұл мәселеде өз нәтижесін беріп, жастардың мүмкіндігін көрсетуіне жол ашып, жаңа жұмыс орындарының көбеюіне септігін тигізеді деп сенемін. Жаңа жобалардың ішіндегі «Жас маманға» Президентіміз ерекше тоқталды. Өйткені уақыт талабына сай бірқатар мамандықтар жойылып, олар жасанды интеллектке ауысатын болады. Қазіргі уақытта білім алушы студенттердің мамандықтары болашақта қажетсіз болып қалуы бек мүмкін. Сол себепті бүгіннен бастап әлемдік процестерге зерттеу жасалуы керек. Жас ғалымдарды қолдау мақсатындағы қосымша гранттардың берілуі де дер кезінде қабылданып отыр. Бұл азаматтарды тың жобаларды жүзеге асыруына ынталандырып, адамдардың өмір сүру жағдайын жеңілдетуіне, денсаулық сақтау саласын ілгерілетуіне септігін тигізеді. Көңілімізді серпілткен тағы бір жағымды жаңалық – еріктілердің мәртебесін көтерудің назарға алынуы. Негізгі сабақтарымен қоса ақысыз, пұлсыз еріктілік қызметпен айналысып, көмекке мұқтаж жандарға қайырымдылық жасап, облыс аумағындағы шаралардың жоғары деңгейде өтуіне атсалысып жүрген белсенді ұл-қыздар көп-ақ. Алайда, оларды қолдау төмен. Осыған да ерекше тоқталған Мемлекет басшысы еріктілер үшін 30 пайыздық мөлшермен гранттар қарастыруды көздеп отыр. Бұл басқосуда Елбасы тілге тиек еткен бастамалар жетерлік. Әлі де жастарды қолдау мақсатындағы жобалар аз болмайды. Елбасы бастамасына орай өңірде де жарқын істер атқарылады деп сенемін. Президентіміз салтанатты жиында туризмді дамыту, жеріміздің қасиетті, шұрайлы өлкелерді таныстыру мәселесін де қозғады. Біз, батысқазақстандық жастар бұл мақсатта жұмыстанатын боламыз. Жыл сайын «Сакралды Қазақстан» жобасы бойынша жасотандықтар және оқу орындары студенттері облысымыздың түкпір-түкіпіріндегі киелі орындарға, тарихи мекендерге саяхат ұйымдастырып, шежіресіне үңіліп, өлкемізді танып-білуімізге жағдай жасап келеміз. Бұл әрине керек және өте маңызды жоба деп санаймын. Сондай-ақ өз тарапымыздан ауыл жастарының әлеуетін көтеру мақсатындағы «English for Jastar» жобасын жалғастыратын боламыз. Кәсіпкерлікпен айналысатын ынталыларға бағыт беру, тәжірибелі бизнесмендермен кездестіру біздің күн тәртібімізден түспейді. Бұдан басқа да санаттағы жастарымыз қолдаудан шет қалмайды, – дейді «Жас Отан» ЖҚ БҚО филиалы төрағасы Нұрғали Жолдасқалиев.
Версия для печатиСоңғы жаңалықтар
Блогерлер мен БАҚ беттерінде құмар ойындарды жарнамалауға тыйым салынбақ
Пікір үстеу