Кіру«НҰРЛЫ ЖЕР»: ОРАЛДА СЕГІЗ ТҰРҒЫН ҮЙ ПАЙДАЛАНУҒА БЕРІЛЕДІ
Жыл аяғына дейін Оралда «Нұрлы жер» бағдарламасы аясында сегіз тұрғын үй пайдалануға беріледі.
Зашаған кентіндегі Саратов тас жолының бойы жыл санап жаңа көпқабатты үйлермен толығуда. Қазіргі уақытта да бұл ауданда құрылыс жұмыстары қарқынды. Мәселен, «Нұрлы жер» бағдарламасы аясында 47-дақта салынып жатқан тоғыз қабатты тұрғын үйде ішкі әрлеу, инженерлік желілерді тарту жұмыстары жасалуда. Мердігер компания – «Болашақ-Т» ЖШС қыркүйек айының орта шамасына дейін құрылыс жұмыстарын толығымен аяқтамақ. Тұрғын үй құрылысына жергілікті үйқұрылысы комбинатында дайындалған темірбетонды панельдер қолданылуда.
– Құрылыс 2019 жылдың тамызында басталды. Қазір негізгі жұмыстар аяқтала келді, ішкі әрлеуді жүргізудеміз. Құрылыс басында 70 шақты азамат жұмыс жасауда, – деді учаске басшысы Жандос Айтмағамбетов.
«Нұрлы жер» бағдарламасы аясында салынып жатқан бұл үйге республикалық бюджеттен 2 млрд. теңге қаржы бөлінген. Мұнда жергілікті атқарушы органда тұрғын үй кезегінде тұрған азаматтар қоныстанады деп күтілуде. 198 пәтердің 81-і – бір бөлмелі, 99-ы– екі бөлмелі, 18-і – үш бөлмелі пәтерлер болмақ.
Үй құрылысы жұмыстары аяқталған соң ауласы абаттандырылып, қараша-желтоқсан айында пайдалануға беріледі деп күтілуде.
Орал қаласы құрылыс бөлімінің сектор меңгерушісі Алтай Молдағалиевтің мәліметінше, «Нұрлы жер» бағдарламасы аясында жыл соңына дейін 8 тұрғын үй пайдалануға беріледі. Олардың алтауы «Тұрғынүйқұрылыс жинақ» банкінің салымшыларына, екеуі жергілікті атқарушы органда тұрғын үй кезегінде тұрған азаматтарға ұсынылмақ.
Айта кетейік, бұған дейін, яғни маусым айында шаһарда «Нұрлы жер» бағдарламасымен екі үй тапсырылып, 284 отбасы баспаналы болғанын жазған едік.
Эльмира НҰҒМАНОВА,
zhaikuni.kz
Версия для печатиСоңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу