Сыбайлас жемқорлықтың алдын алу: жүйелі жұмыс, нақты нәтижелер

Сыбайлас жемқорлықтың алдын алу бағытында кешенді және жүйелі жұмыстар жүргізілуде. Негізгі басымдық – ашықтықты қамтамасыз ету, тәуекелдердің алдын алу және адалдық қағидаттарын нығайту арқылы қоғам сенімін арттыру.

Есептік кезеңде барлығы 22 іс-шара ұйымдастырылып, 1350 адам қамтылды. Олардың қатарында түсіндіру кездесулері, оқыту семинарларымен алдын алу шаралары бар. Бұл жұмыстар қызметкерлердің құқықтық сауаттылығын арттыруға, сыбайлас жемқорлыққа қарсы мәдениетті қалыптастыруға және қызметтік әдеп нормаларын сақтау деңгейін күшейтуге бағытталды.

Сонымен қатар, мемлекеттік сатып алу саласы мен тұрғын үй кезегі бойынша мониторинг жүргізілді. Аталған бағыттар азаматтармен тікелей байланысты болғандықтан, олардың ашықтығы мен әділдігіне ерекше назар аударылды. Жүргізілген талдау нәтижесінде процестерді жетілдіру, артық әкімшілік кедергілерді азайту және ашықтықты күшейту бойынша нақты ұсынымдар әзірленді.

Қазақстан Республикасы Мемлекеттік қызмет істері агенттігінің Батыс Қазақстан облысы бойынша департаментінің бастамасымен 2026 жылғы 24 ақпаннан бастап Сот сараптамалар орталығы институтында сыртқы талдау жүргізілуде. Бұл жұмыс ұйым қызметін тәуелсіз тұрғыда бағалауға және ықтимал тәуекелдерді жан-жақты зерделеуге мүмкіндік береді.

Сыртқы талдау аясында кадрлық саясат, қызметкерлерді іріктеу және қабылдау рәсімдері, кадр тұрақтылығы, еңбекақы төлеу, сыйақы беру, материалдық көмек көрсету тетіктері, сондай-ақ тәуекелдерге әсер ететін өзге де факторлар қарастырылуда. Бұл бағыттардағы ашықтық пен әділдік деңгейі ұйым жұмысының тиімділігіне тікелей әсеретеді.

Жүргізіліп жатқан барлық шаралар заңбұзушылықтарды анықтауға емес, олардың алдын алуға, жүйелі кемшіліктерді жоюға және процестерді жетілдіруге бағытталған. Мұндай тәсіл сыбайлас жемқорлық тәуекелдерін ерте кезеңде анықтауға және олардың алдын алуға мүмкіндік береді.

Алдағы уақытта алдын алу бағытындағы жұмыстар жалғасып, өзге де салалар бойынша мониторингтермен сыртқы талдаулар жүргізілетін болады. Қабылданған шаралар мен енгізілетін ұсынымдар сыбайлас жемқорлық тәуекелдерін төмендетіп, ашық әрі тиімді жүйе қалыптастыруға негіз болады.