«АТА-ЕНЕМНІҢ АҚ БАТАСЫН АЛДЫМ»

Х.Бөкеева атындағы облыстық қазақ драма театрында Елбасының «Болашаққа бағдар: рухани жаңғыру» мақаласын жүзеге асыру аясында өткен «Әлемнің жарығы» тақырыбындағы облыстық аналар форумында:

Клара РИЗУАНОВА, «Алтын алқа» иегері, ұстаз-ана:

– Мен 34 жыл еңбек өтілі бар ұстазбын. Орал қаласындағы педагогикалық институттың жаратылыстану-география факультетін тәмамдадым. Жолдасым Ауған соғысының ардагері Нұғманмен институтта бірге оқып, 1988 жылы шаңырақ көтердік. Өзім көпбалалы отбасында тәрбиелендім. Ата-енем «Бақыт балалы үйге қонады» деп жиі айтатын. Осы ақылдың әсері болар, дүниеге жеті сәби әкелдім. Ата-енемнің тікелей көмегінің арқасында ұстаздық жұмысымнан қол үзбедім. Фурманов ауданы Талдықұдық орта мектебінде 1990-2001 жылдары аралығында мұғалімдік қызмет атқардым. 2001 жылы Орал қаласына қоныс аудардық. Жолдасым екеуміз қаладағы №44 орта мектепте жұмыс істедік. Балаларымыздың алды да осы мектепте оқыды. Біздің бақытты алаңсыз тұрмысымызды 2004 жылы жолдасымның мезгілсіз қазасы үзіп кетті. Ол уақытта 7 баланың үлкені 8-сыныпты аяқтаса, кішісі 4 жаста болатын. Қанша қиналсам да жолдасымның аманаты балаларымды жетілдіру керек екенін түсіндім. Мен үшін туған анамнан кейінгі асыл жан-енем балаларымды студент болғанша бірге өсіріп, қарашаңырағымызды аманаттап, өмірден өтті. Қазір балаларым ер жетті. Екі қызым жоғары оқу орнын аяқтап, тұрмыс құрды. Өнегелі, текті әулеттермен құдандалы болдым. Ұлым БҚАТУ-ды тәмамдап, қазір «Болашақ» қоғамдық қорының менеджері. Одан кейінгі бір қызым №34 орта мектепте дефектолог болса, енді бірі Батыс Қазақстан жоғары медициналық колледжін аяқтап, облыстық көпбейінді ауруханада жұмыс жасайды. Бір қызым Алматыдағы Қазақ Ұлттық қыздар педагогикалық институтының биология факультетінде оқып жүрсе, кенжем Айсәуле БҚАТУ-дың экономика және бизнес факультетінің студенті. Өзім қазіргі заман мұғалімі деңгейіне сай болып, талап мүддесінен шығуға тырыстым. Еліміздің әр түкпірінде жүрген шәкірттерімнің ыстық ықыласын көргенде ең гуманизмге толы мамандығым үшін мақтанамын. Бүгінде ата-ененің батасын алған келінмін, ардақты анамын, қамқор әжемін, ұлағатты ұстазбын.

Версия для печати