ӨГЕЙ ӘКЕНІҢ ІСІ СОТТА ҚАРАЛУДА

Оралда 13 жастағы өгей қызын зорлады деп айыпталған қала тұрғынының соты басталды. Батыс Қазақстан облыстық соты хабарлағандай, іс Қылмыстық Кодекстің екі бабы бойынша қозғалды. Жәбірленуші тарап қатал жаза талап етіп отыр.

Жәбірленуші күйеуінің үнемі өзіне қол жұмсағанын айтады. Кезекті ұрыс-керіс шегіне жеткенде, үлкен қызы өгей әкесінің өзіне жасаған озбырлығын, жылап отырып жеткізіпті. Мұндай сұмдықты бей-жай қалдыра алмағанын, «сондықтан бірден полицияға жүгіндім» деп отыр.

– Қызым бұл сұмдықтан әлі есін жияр емес. Қазір емделіп жатыр, психологтар оның қайта қалпына келуі, әлі 4-5 жылға созылатынын айтады. Ал «мұндай ауыр жан жарасы өмір бойына қалады» дейді. Шынымды айтсам, күйеуімнен қатты қорқамын. Қазір қыздарымның тағдыры қыл үстінде тұр. Сондықтан сот әділ жазасын береді деп үміттенемін,- дейді жәбірленушінің анасы.

Айыпталушы тарап болса, тағылған айыппен келіспейді. Бірақ сұхбат беруден бас тартты. Ал адвокаты Мереке Ғабдуалиев бұл істің нүктесін сот қоятынын айтты.

– Сотта өзіме белгілі болған ақпаратты айтпауға міндеттеліп, қол қойдым. Конституцияға сәйкес, кінәсі дәлелденіп, сот үкімі шықпайынша, ешкімді кінәлауға болмайды. Сондықтан, сот істі әділ қарайды деп сенеміз, – деді айыпталушының қорғаушысы Мереке Ғабдуалиев.

Қазір бұл іс сотта жабық жағдайда қаралып жатыр. Айыпталушы – өгей әке. Оның үстінен жасөспірімге азғындық әрекет жасағаны үшін қылмыстық іс қозғалған.

– Айыпталушы ҚР ҚК 121-бабының 4-бөлігі, 124-бабының 2-бөлігімен, яғни сексуалдық сипаттағы зорлық-зомбылық және жас баланы азғындық жолға түсіру деген бап бойынша сотқа берілді, – деді БҚО соты баспасөз қызметінің басшысы Нұргүл Қанатбаева.

Ажырасуға арыз берген ерлі-зайыптылар қазір арадағы дүние-мүлікті де өзара бөліске салыпты. Ал айыпталушының жасөспірімге зәбір көрсеткені дәлелденсе, заң бойынша 7 жылдан 20 жылға дейін бас бостандығынан айыру жазасы қарастырылған.

Айнара ИСА,

zhaikuni.kz

Версия для печати