БАҒАЛЫ БҰЙЫМДАРДЫ ҰРЛАҒАН

Орал қалалық полиция басқармасының баспасөз қызметі жеке үйге ұрлыққа түсіп, бағалы бұйымдарды ұрлаған екі азаматтың ұсталғанын хабарлады.

Басқарманың баспасөз хатшысы Гүламан Исмағұлованың мәлімдеуінше, 2020 жылғы 21 желтоқсанда, шамамен сағат 16.40-та өздерінің қызметтік міндеттерін атқарып жүрген 2 полиция қызметкері «2- жұмысшылар поселкесі» ауданындағы Ватутин мен Оразбаева көшелерінің қиылысында жалтақтай қарап, кетіп бара жатқан күдікті 2 тұлғаны тоқтатады. Күдікті деп танылған тұлғаларды тоқтатқан Орал қ.ПБ ЖПҚб ППб қызмет инспекторы полиция аға лейтенанты Сырым Қуантаев пен полиция лейтенанты Нұрхат Сейфолла суыт жүрістерін байқап, жөн-жосық сұрайды. Безілдеген жігіттердің бірі қарсылық танытып, дөрекі сөйлейді. Берекеті қашып, тәртіп сақшысының сұрақтарына жауап бергісі келмей, жалтарады. Екіншісі қалтасындағы алтын бұйымдарды күртік қардың үстіне жанталасып лақтыра салады. Осы сәтте қырағылық танытқан екі инспектор ұрлық жасап, бой тасаламақ болған тұлғаларды ұстап, дереу жедел-тергеу тобын шақыртады. Алтын бұйымдармен бірге қолдарында ноутбук, ноутбукке қажетті қосалқы заттар мен жаңажылдық сыйлықтар, қол сағат, шырпы қорабы, есірткі тектес зат, суық қару-пышақ, т.б. жеке мүліктер болған.

Орал қалалық Полиция басқармасына жеткізілген бірі азиат, енді бірі европа нәсілді екі күдікті Ватутин мен Оразбаева көшелерінің қиылысындағы бір жер үйдің терезелерін ішке қарай итеріп ашып, пәтерге ұрлыққа түскендерін мойындады. Үйде кісі жоғын байқаған соң ойларын жүзеге асырыпты. 1981 және 1991 жылғы қос күдікті үй иесіне 150 мың теңгеге материалдық шығын келтірді.

Бүгінгі күні Орал қалалық полиция басқармасы тергеу бөлімінің өндірісінде Қазақстан Республикасы Қылмыстық Кодексінің 188- ъбабының 3- тармағына сай қылмыстық іс қозғалды. Тергеу, тексеру амалдары жүргізілуде.

Жыл басынан бері 1628 ұрлық, 294 пәтер ұрлығы тіркелді.

Версия для печати