КіруЖАЛҒАН БАНК ҚЫЗМЕТКЕРІ ӨЗІНЕ 1 МЛН. 440 МЫҢ ТЕҢГЕ АУДАРТЫП АЛҒАН
Орал қаласында өзін банк қызметкері ретінде таныстырған алаяқ
62 жасар әйелді алдап соғады.
Орал қалалық Полиция басқармасының кезекші бөліміне сәуірдің 17-сі күні алаяқтық фактісі туралы хабарлама келіп түседі. 62 жасар әйелге белгісіз ер адам хабарласып, өзін «Каспий банкінің» қауіпсіздік қызметінің қызметкері ретінде таныстырған. Адамның сеніміне кірген қаскүнем әйелге қайдағы бір алаяқтар оған несие толтырмақшы деп айтып, оның орнына өзі несие алып бере алатынын түсіндіреді. Алдымен әйел әлгі қудың сөзіне сене қоймаған. Алайда алаяқ айтқанынан қайтпай, оның телефон нөмірі қолдау көрсету қызметінің нөмірімен сәйкес келетінін, тек коды өзге деп түсіндіреді.
Айлакердің сөзіне сенген ол өзіне несие алып, артынан қызына да толтыртады. Мұнымен қоймай жігіт оның депозиті бар-жоғын сұрап, ондағы бар ақшаны «сенімді шотқа» аударуға кеңес береді. Әйел барлық айтқанын мүлтіксіз орындайды.
Соңында әйел алаяққа жалпы 1 млн. 440 мың теңге көлемінде ақша аударып жібереді.
Аталған факті бойынша қылмысты ашу бағытында Орал қ. ПБ ҚК-нің 190-бабы 2-бөліміне (Алаяқтық) сәйкес сотқа дейінгі тергеу амалдары жүргізілуде. Осыған ұқсас жағдай наурыздың 30 күні Орал қаласының 31 жасар тұрғыны да алаяқтың қармағына ілінді. Ол онлайн түрде несие алып беремін деген алаяққа сеніп, «Kaspi.kz» қосымшасы арқылы 56 700 теңге көлемінде ақшасын аударып жіберген.
Полиция қызметкерлері алаяқтардың айла-амалдарына бой алдырмауға және банктік картаңыздағы деректерді біреуге бермеуге кеңес береді. Егер сіздің шотыңызға қатысты проблемалар болса, бұл мәселені ешқашан телефон арқылы шешпеңіз, банкіңіздің жақын жердегі бөлімшесіне хабарласқаныңыз дұрыс.
Сенетін адамдарға 16 таңбалы карта нөмірін беруге болады. Бұл сізге басқа банк картасынан аударым жасау үшін жеткілікті.
Төменде көрсетілген деректемелерді ешкімге айтпаңыз және хаттар мен SMS-терде көрсетпеңіз: банк карта иесінің аты-жөні, қолданылу мерзімі, CVV-нің үш таңбалы нөмірі, сондай-ақ төлемдер мен аударымдарды растау үшін PIN және SMS кодтары.
Интернет арқылы төлеген кезде, карта туралы мәліметтерді көрсетпес бұрын сайт мекен-жайының дұрыс және қосылым қауіпсіз екенін тексеріп алғаныңыз жөн.
БҚО Полиция департаментінің баспасөз қызметі
Версия для печатиСоңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу