Сұлулық тазалықты талап етеді!..

Қазіргі таңда сұлулық салондарына әйелдер мен ерлер жиі барады. Алайда, бұл мекемелерде тұтынушылардың қауіпсіздігі мен денсаулығы әрдайым басты назарда болуы тиіс. Өкінішке орай, сұлулық индустриясында да бірқатар өзекті мәселелер бар,-дейді Орал қалалық санитариялық-
эпидемиологиялық бақылау басқармасының
жетекші маманы Ж. Мерекина.
Кәсіби маманның айтуынша, кейбір сұлулық салондары құрал-жабдықтарды дұрыс залалсыздандырмайды. Бұл инфекциялық аурулардың (мысалы, гепатит В, С, тері инфекциялары) таралуына әкелуі мүмкін. Кейбір мамандар арнайы білім мен тәжірибеден өтпей-ақ қызмет көрсетеді. Бұл клиенттердің терісіне немесе шашына зиян келтіруі мүмкін. Сапасыз бояулар, химиялық заттар немесе стерильді емес құралдар да тұтынушыға қауіп төндіреді. Сұлулық салондары Қазақстан Республикасының Денсаулық сақтау министрлігінің 2022 жылғы 26 шілдедегі № ҚР ДСМ-67 бұйрығы «Коммуналдық мақсаттағы объектілерге қойылатын санитариялық-эпидемиологиялық талаптар» санитариялық қағидаларының нормаларына сай жұмыс істеуі қажет.
Айталық, маникюр және педикюр жүргізуге қойылатын санитариялық-эпидемиологиялық талаптарға мыналар жатады: педикюр жүргiзу кезiнде аяқ астына салынатын жастықша әрбiр қолданудан кейiн дезинфекциялау ерiтiндiсiне салынған шүберекпен сүртілуі тиіс. Аяққа және қолға арналған ванналар әрбiр клиенттен соң жуу құралдары арқылы өңделу керек. Тері, сілемейлі беттердің зақымдалуы мүмкін манипуляция жүргізудің барлық кезеңдері клиент үшін қауіпсіздікті қамтамасыз етеді. Маникюрді, педикюрді, пирсингті, татуажбен жұмыс жасамас бұрын және одан кейін тері беті және зақымдалған жерлерді зарарсыздандырыңыз! Маникюрге, педикюрге арналған құралдарды, сондай-ақ шығыс материалдарын микроорганизмдермен екінші рет контаминацияны болдырмайтын жағдайларда сақтай отырып, бу, ауа немесе химиялық стерилдеу әдісімен стерильдеу керек. Маникюр және педикюр кабинеттерінің жұмыс орындары жарық болу керек. Қызметкерлердің арнайы киіммен жұмыс істеуі тиіс. Жеке
гигиенаны сақтап, қызмет көрсететін мамандардың медициналық тексеруден өтуі және тиісті сертификаттары болуы қажет. Жұмыс орнын таза ұстау және бөлмені желдетіп отыру керек.
Сұлулық – денсаулықпен бірге жүруі тиіс. Сұлулық салондарына барған кезде тұтынушы ретінде санитариялық талаптарға назар аударыңыз!

«Жайық ҮНІ»

Версия для печати