КіруСҰЛУЛЫҚ СЫЙЛАЙТЫН САЛОН
Бүгінгі таңда адамдардың, әсіресе нәзік жан иелерінің сырт келбеті оның өзі жайлы жағымды пікір қалыптастыратын ең басты фактор екеніне ешкім дауласа қоймас. Соның арқасында сән саласының шеберліктері толысып, түрлі қызмет түрлерін өмірге әкелуде. Орал қаласында да қыз-келіншектерге әдемілік сыйлайтын орындар баршылық. Жақында солардың қатары Зашаған кентіндегі Көктем шағынауданынан ашылған «Гүлнафис» атты тағы бір салонмен толықты.
Ақпан айының алғашқы күні ашылу салтанатын жасаған аталмыш салон аз уақыт ішінде тұрақты клиенттерін тауып үлгерген. Салонның негізін қалаған Гүлмира Бақтығалиқызы кәсіптің бұл түріне бала кезінен қызығыпты.
– Жастайымнан өз кәсібімді ашсам деп армандайтынмын. Зашаған кентінде халықтың сұранысын толық қанағаттандыратын сұлулық салондары жоқтың қасы. Сол себепті қыз-келіншектерге барлық қызметтің түрін көрсететін, көптің көңілінен шығатын салон ашу көптен ойымда жүрді. Сол арманым жүзеге асып, осыдан екі ай бұрын қызымның есімімен «Гүлнафис» салонын аштым. Салонға кірген адам шаш пен қасты қиып, тырнағын бояп, кірпігін ұзартып хас сұлуға айналады. Қазір қарапайым қонақтыққа бару үшін салон қызметіне жүгінетін болдық. Менің мақсатым – әр тұтынушыға сапалы қызмет көрсету. Ол үшін уақытпен санаспай жұмыс жасап, тәжірибе жинадым. Қасыма іскер, еңбекқор қыздарды алып, ісімді бастадым, – дейді Гүлмира.
Гүлмираның мамандығы дизайнер болғандықтан жаңашылдыққа жаны құмар, үнемі өзгелерден ерекшеленіп жүргенді қалайды. Ол 13 жыл мектепте технология пәнінен сабақ беріпті. Түрлі додаларда киім үлгісін дайындаудан топ жарып шыққан шәкірттері жетерлік. Еңбегінің нәтижесін айқындайтын дипломдары сөресінде самсап тұр. Мұғалімдік мамандықты осыдан үш жыл бұрын бизнеске айырбастаған ол жеке кәсіп ашып, елдің алғысын алып жүр. «Гүлнафисте» шаш қию, шаш бояу, сәндеу, кірпік жапсыру, тырнаққа манюкюр, педикюрдің түр-түрі жасалады. Мамандардың бәрі дерлік өз ісінің шеберлері, тәжірибелі. Келушілерді уақытымен қабылдап, көңілінен шыға біледі. «Егер өз жұмысыңды жаныңмен жақсы көрсең, бар ынтаңмен беріліп жасасаң кәсібің нәтижесін береді. Алдағы уақытта қызметкерлерімді тәжірибе алмасу үшін түрлі оқуларға, семинарларға жіберуді ойлап жүрмін. Халықтың сұлулық салонына жиі келгенін, әсіресе әйелдердің өзіне қарап жүргенін қалар едім. Мұнда олардың сыртқы көрінісін тартымды етеміз. Үлкен жаста болса да жаңаша келбет сыйлаймыз. Шаштаразда сапаға емес, санға мән береді. Ал салонның одан айырмашылығы, мұнда бәрі кешенді түрде жүргізіледі. Шеберлер клиентке не істеу керектігін толығымен түсіндіреді, – дейді Гүлмира Дәулетова.
Сұлулық салонына барған жан ең бірінші ойындағыдай шаш үлгісі мен бет-әлпетін жасартқысы келеді. Ол үшін клиент қандай салонға баратынын өзі таңдайды. Көңілінен шықса сол жердің тұрақты клиентіне айналады, шықпаса басқа салонға кетеді. Сондықтан, тұтынушының таңдау еркін жаулап алу үшін салондар да барын салып жатады. Біз барған сәтте бесаспап маман Гүлдана Жұмағалиеваға келушілер көп екенін байқадық. Он жылдық тәжірибесі бар шебер шаш бояп, бет әрлеп, арасында соңғы үлгімен шаш сәндеуде. Бақтыгүл Жұмағазиева ерлердің де, әйелдердің де шашын қия алатынымен көзге түссе, ерлер шаштаразы Әбілхайыр Мұратов, тырнақ сәндеуші, кірпік жалғайтын Мөлдір Оразғалиевалар да жұмысына бар ынтасымен кірісті. Жалпы салонда бес қызметкер жұмыс істейді. Бұлардың барлығы келушілерді жылы қарсы алып, ізетпен шығарып салуға дағдыланған. Ұлыстың күніне орай сән салонына келушілерге ыстық шәй, ұлттық тағамдар мен сусындар ұсынылды. Осының өзі ұйымшыл ұжымның әр тұтынушыға айрықша құрметпен қарайтынын көрсетеді.
– Бізге клиенттер күні бұрын келіп жазылады. Қызмет көрсететін бағаларымыз прейскурантта жазулы тұр. Олар телефонмен әкімшілікке қандай сән үлгісін жасатқысы келетінін айтады. Сырттан келушілерге де түсіндіреміз. Қысқасы, біз сән әлеміне енген жаңалықтан құр қалмауға тырысамыз, – дейді салонның әкімгері Ботагөз Давлетова.
Бүгінде шағын және орта бизнеске мемлекет тарапынан көп мүмкіндік қарастырылған. Соның арқасында ауданда көптеген кәсіпкер өз ісін ашып, өздерімен қатар өзгені де жұмыспен қамтып отыр. Осылай деген Зашаған кенті әкімінің орынбасары Нұрболат Шыныбеков бұл игі бастаманы қолдайтынын жеткізді. – Қазіргі таңда кентте 14 сұлулық салоны бар. «Еңбегіне қарай өнбегі» демекші, еңбекқұмарлығы мен табандылығының арқасында кәсібінен нәсібін көруді көздеген жанның бұл ісі көпке үлгі болары сөзсіз, – дейді Нұрболат Абайұлы.
Гүлмираның болашаққа құрған жүйелі жоспарлары аз емес. Отағасы Нұрбек жұбайының әр бастамасына қолдау білдіріп келеді. Бүгінде бақытты отбасында екі ұл мен инабатты қыз өсуде. Кәсіпкерлікке мықтап бетбұрған кейіпкеріміз болашақта өз ісін кеңейтіп, әлі талай жобаларды дүниеге әкелсем дейді. Кенттегі кәсіпкерлікті дамытып, ел экономикасының өсіп-өркендеуіне үлесін қосып жүрген Гүлмираға тек сәттілік тілейміз.
Кәусар БАЙҒАЛИЕВА
Версия для печати
Соңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу