КіруКОЛЛЕДЖДІҢ ЦИФРЛАНДЫРУ АЯСЫНДАҒЫ ТЫҢ ЖОБАЛАРЫМЕН ТАНЫСТЫ
Бүгін ҚР Премьер-Министрі Асқар Мамин өңірімізге жұмыс сапарында Оралдағы жоғары аграрлық-техникалық колледжіне арнайы ат басын бұрып, оқу орнының цифрландыру аясындағы тың жобаларымен танысты.
Кездесу барысында ҚР Премьер-Министріне BIM технологиясын оқу әрекетіне енгізу жайын колледж оқытушысы Руслан Махметов айтып берді. – Сіздердің назарларыңызға курстық жұмыс есебінде студенттермен бірге жасақталған «Жатақхана» жобасын ұсынамын. Жоба қолданылған материалдардың толық базасын және жобалау кезеңінде қабылданған шешімдерді сақтауға мүмкіндік беретін Revit бағдарламасымен BIM технологиясын қолдану арқылы жасақталды. Бұл өте маңызды сәт. Өйткені, ақпараттық база үнемі жобамен бірге жүреді. Бұл әдістің бір ерекшелігі – ғимаратты сандық жобалау кезінде қателіктерді анықтауға мүмкіндік береді. Сандық сыңарлар нақты физикалық нысанды тұрғызу кезінде нақсыздықтар мен қателерді болдырмау қаупін төмендету үшін жасалады. Бұл нақты үлгіге мәселен, ауылдық елдімекеннің жоспарына сай 160 орынға арналған тоғыз қабатты ғимаратты алуға болады. BIM технологиясын енгізу ақпараттық модельдеуді дамытуға елеулі үлес қосады, – деген Руслан Мұратұлы сондай-ақ «Мәдениет үйі» жобасын да меймандардың назарына ұсынды. Жобамен таныспас бұрын жиналғандар арнайы көзілдіріктерін киді. – Біз сіздермен көпсалалы мәдени ғимаратта тұрмыз. Үшқабатты нысанның жертөлесі және техникалық қабаттары бар. Көлемі 69.6х87.2. Мұнда 36 орындық мәжіліс залы, 926 орындық концерт залы, 72 орындық кафе бар, – деп таныстырған ол арнайы көзілдірік арқылы құрылысы мүлдем басталмаған ғимаратта тұрғандарын айтты. Бұл финдік Collaprime компаниясымен ынтымақтастық нәтижесінде алынған 3D Cave құрылғысы болашақ нысанды цифрлық форматта көруге мүмкіндік береді. Бүгінде 3D CAVE аппараттық-бағдарламалық кешенді іске асыру үшін нақты жұмыстар атқарылуда екен. Осы орайда колледж оқытушыларына арналған BIM технологиялары бойынша оқыту курсын жүзеге асыру үшін жол картасы дайындалған.
Айта кету керек, Өткен жылы Оралдағы жоғары агротехникалық колледжінде елімізде ең алғаш болып ғимараттардың пішінін үш өлшемді модельдеу әдісімен жобалай алатын кешен іске қосылған болатын. Отандық құрылыс саласын еуропалық стандарттарға негізделген жаңа деңгейге көтеруде цифрландыру аясындағы жобалардың маңызы арта түспек. Болашақта бой көтеретін нысанның сапасы мен беріктігін қамтамасыз етуде 3D модельдеудің мүмкіндігі зор.
Кәусар БАЙҒАЛИЕВА
Версия для печати
Соңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу