БАТЫР РУХЫНА ТАҒЗЫМ

Оралдық студенттер Ұлы Жеңістің 75 жылдығы қарсаңында Кеңес Одағының батыры Темир Масиннің ескерткішіне гүл шоқтарын қойып, рухына тағзым жасады.

Ұлы Жеңістің 75 жылдығына орай облыс көлеміндегі «Біз – Жеңіс мұрагерлеріміз!» акциясы аясында Жоғары аграрлық-техникалық колледжінің директоры С.Х.Мұхамбеталиевтің бастамасымен колледжіміздің студенттері Ұлы Жеңіс жолында құрбан болған аталарымыз бен әкелеріміздің, мәңгі жадымызда сақталған жауынгерлер мен офицерлер рухына, бейбіт кезеңде дүниеден өткен және бүгінде ортамызда жүрген Ұлы Отан соғысы ардагерлерінің құрметіне орай, Кеңес Одағының батыры Темир Масиннің ескерткішіне гүл шоқтарын қойып, батыр рухына тағзым етті. Шараға Ұлы Отан соғысының ардагері Х.А.Сафин, колледж директоры С.Х.Мухамбеталиев, «Ауғанстан Ардагерлерінің Одағы» ҚБ төрағасы О.В.Пимонов, Ауған соғысының ардагері А.Г.Веремин қатысты. ҚР 5517 әскери бөлімінің оркестрінің сүймелдеуімен әскери марштар орындалған шарада сөз алған Ұлы Отан соғысының ардагері және колледжіміздің 1949 жылғы түлегі Х.А.Сафин сұм соғыстың тағдырлы тарихын баяндай отырып, бүгінгі студент- ертеңгі мамандарға қаһарман ерлердің қажырлы даңқына тағзым жасау – елдіктің белгісі екенін айтты. Сондай-ақ, О.В.Пимонов та колледж басшысы мен барша шәкірттерге бұл шараны бүгінгі ұрпақтың бақыты үшін фашизмге қарсы тұрып, оққа ұшқан майдангерлердің ерлігіне және 922-ші атқыштар полкінің командирі, капитан, бар ауыртпалығын өз мойнымен көтеріп, Отан үшін от кешіп, соғыстың қанға бөккен даласында қайсарлықпен шайқасқан, Жеңістің туын желбіреткен Темір Масиннің рухына көрсетілген құрмет ретінде атап өтіп, алғысын бідірді.

Зымыраған уақыттың қанатындағы Жеңістің 75-ші көктемі қарсаңында өткен бұл шара патриоттық рухтарын көтерер студенттерге тәлімді тәрбие бергені сөзсіз.