БҚО-ДА КОРОНАВИРУСПЕН АУРУХАНАҒА ТҮСКЕН 20 НАУҚАС РЕАНИМАЦИЯЛЫҚ ЕМ АЛУДА

БҚО-дағы коронавирустық инфекцияға шалдыққан науқастардың жағдайы туралы бүгін, 5 ақпан күні өңірлік коммуникациялар қызметі ұйымдастырған брифингте БҚО денсаулық сақтау басқармасы басшысының міндетін атқарушы Арман Қалибеков айтып берді.

Қазіргі уақытта облыста 185 төсек-орынға арналған 4 карантиндік стационарда 26 науқас жатыр. Стационарлардың толымдылығы 14 пайызды құрайды. 579 төсек-орындық 7 инфекциялық стационарда 291 адам емделуде. Ауруханалардың толымдылығы 50,2 пайызды құрайды. Инфекциялық стационарлардағы 62 реанимациялық төсек-орында 20 науқас емделуде. Төсек-орын толымдылығы 32,2 пайызды құрайды.

– Қарқынды реанимация төсектеріндегі науқастардың төртеуі – 40-60 жас аралығындағылар, 14 науқас – 60-80 жастағылар, екеуі – 80 жастан асқандар. 18 науқаста ілеспелі созылмалы аурулар бар. Олардың 16-да жүрек-қан тамырлары аурулары, 1 науқаста қант диабеті, 1 науқаста ревматоидты артрит. Бүгінгі күні инвазивті өкпені жасанды желдету аппаратына 1 науқас, инвазивті емес өкпені жасанды желдету аппаратына 11 науқас, оттегі концентраторына 11 науқас, орталықтандырылған оттегі көзіне 56 науқас қосылған, – деді Армат Талғатұлы.

Қосымша 2008 төсек-орындық резервтік қор дайындалды. Олардың 1233 төсек-орыны инфекциялық стационарларда, 775 төсек-орыны карантиндік стационарларда. Әрбір емханада COVID-19 және пневмония симптомдары бар пациенттерді, созылмалы аурулары бар пациенттерді, сондай-ақ көрсеткіштер бойынша жүкті әйелдер мен балаларды үйде бақылау үшін 124 мобильді бригада жұмыс жасауда. Мобильді бригада тәулігіне орта шамамен 280 шақыруға барады, оның ішінде жетпіс шақтысы COVID-19 бойынша түсетін шақыртулар.

Айта кетейік, бүгінгі күнге дейін барлығы 11 395 адам індетті жұқтырғаны анықталды, оның ішінде 6 019 адамда ауру симптомдық, 5 376 адамда симптомсыз ағымда өтті. Бүгінгі күні инфекция жұқтырғандардың 81,3 пайызы,яғни 9 267 адам сауығып шықты. Оның ішінде 4 093 адам стационарлық деңгейде, 5 174 адам амбулаториялық деңгейде жазылып шыққандар. Өкінішкеорай, 199 адам коронавирустық инфекциядан көз жұмды.

Версия для печати