А.ШЫНЫБЕКОВ: «ИНФЕКЦИЯҒА ҚАРСЫ ТИІМДІ ШАРА – ҮЙДЕ ОТЫРУ, ЕШҚАЙДА ШЫҚПАУ, ТОЛЫҚ ИЗОЛЯЦИЯ»

Өздеріңізге мәлім, әлемді шарлаған коронавирус індеті асқынып барады, соңғы мәліметтерге сай әлемде коронавирус инфекциясын жұқтырғандар саны 717 мыңнан асты.
Ал Қазақстанда дәл қазір 284 адамның коронавирус инфекциясын жұқтырғаны туралы факті тіркелген болса, бұл көрсеткіш сағат сайын артуда. Өкінішке орай, елімізде бір адам қайтыс болды.

Кеше Орал және Ақсай қаласында коронавирус инфекциясын жұқтыру бойынша екі жағдай тіркелді. Олар облыс тұрғындары, бірі Атыраудан, екінші адам Ресейдің Саратов қаласынан келген. Олардың тезірек сауығып кетуіне тілектестік білдіремін.

Біздің қалада тіркелген факті қауіптің іргеде емес, иек астында екенін көрсетіп отыр. Тоғыз жолдың торабында, Еуропа мен Азияның тоғысында орналасқан Оралдың жан-жағынан жаңа пандемия шабуылдауда.

Коронавирустың ең қауіпті жағы – басқа инфекцияларға қарағанда өте жылдам, тіпті 20 есе тез таралады. Бұл бір. Екіншіден, инфекция, әсіресе, қарт адамдар мен созылмалы сырқаты бар, иммунитеті әлсіз жандар үшін өте қауіпті.
Бәрімізге ортақ маңызды міндет бар, бұл – әрбір азаматты қауіпті инфекциядан алдын ала сақтандыру, өмірі мен денсаулығын қорғау. Идеалды шешімді ешкім ұсына алмайды. Бірақ Сіз бен Біздің қолымыздан келетін, індеттен сақтайтын қарапайым қағидалар бар. Бұл – төтенше жағдай тәртібін қатаң сақтау және тазалық нұсқауларын бұлжытпай орындау.

Өкінішке орай, кейбір адамдар еліміздегі төтенше жағдай режимін демалыс екен, той тойлап, қонаққа бару деп түсініп, жайбарақат жүрген жайттар бар. Қала көшелерінде бала-шағасын ертіп алып, маска тақпай еркін серуендеген азаматтарға айтарым, пандемия – теледидардағы шетел жаңалықтары емес, фантастикалық кино да емес. Бұл – денсаулыққа қатерлі кесел, өте қауіпті вирус. Көзбен көріп, қолмен ұстамаған соң қатерді жете сезінбей отырмыз, бірақ бұл – мыңдаған адамның өмірін әкетіп жатқан ең қауіпті індет, мыңдаған отбасыны қайғыға душар етіп жатқан әлемдік қасірет. Қатерлі індетке тойтарыс беретін вакцина әлі ойлап табылған жоқ. Дәл қазір бұл инфекцияға қарсы тиімді шара – үйде отыру, ешқайда шықпау, толық изоляция. Темірдей тәртіп пен қарапайым қағидаларды мүлтіксіз орындауымыз қажет, жайбарақат жүруді біраз уақыт ұмыту керек. Өзімізге сергек қарап, бір кісідей сақтанайық!

Сондықтан отбасыңызбен оқшауланып, үйде отыру – сіздің саулығыңыздың кепілі. Сіздерге ұнасын-ұнамасын, қолайсыздық туғызса да мұны айтуға тиістімін, әрі төтенше жағдай талаптарын бұлжытпай орындауға шақырамын.

Бәріміздің қолымыздан келетін ең дұрыс шешім – осы. Коронавирустың ошағы болған Қытай елінің қатаң тәртіп пен ұйымшылдықтың арқасында қиындықтан жол тауып шыққаны сөзімізге нақты мысал.
Аз уақыт шыдасақ, індеттен тез құтыламыз!

Еліміздегі эпидемиологиялық жағдайдың күрделі екенін ескере отырып, облысымыздың бас санитарының қаулысымен төтенше жағдай режимі күшейтілді, бүгіннен бастап облысымызға кіріп-шығатын жолдар жабылды, Орал қаласы бойынша санитарлық карантиндік шаралар күшейтіле береді. Балабақшалардың жұмысы тоқтатылады. Азық-түліктік емес сауда орындары мен базарлар уақытша тоқтатылды, қаладағы қоғамдық тамақтану орындары сағат 10-нан кешкі 6-ға дейін қызмет көрсетеді, одан кейінгі уақытта үйге тамақты тек тапсырыспен алуға рұқсат етіледі. Қала аумағындағы адамдар көп шоғырланатын жерлерге (парктер, тынымбақтар, аялдамалар, жаяу жүргіншілер жолдары), қоғамдық көліктерде күнделікті дезинфекциялау шаралары жүргізілуде. Балалар спорт алаңдары жабылды.
Мемлекет қабылдап жатқан шаралардың барлығы сіздердің амандықтарыңыз бен қауіпсіздіктеріңіз үшін жасалып жатқанын айтқым келеді.

Қадірлі жерлестер, қалыптасқан жағдайда сары алтындай сабырды көңілге демеу етіп, өз отбасыңыз бен туыстарыңыздың денсаулығына жауапкершілікпен қарауға шақырамын! Жайма-шуақ қалыпты өмірге оралудың жолы – төтенше жағдай тәртібі мен санитарлық тазалық талаптарын сақтау!

Біз қиындықты тек бірлікпен, тәртіппен, бір-бірімізді қолдаумен еңсереміз.
Біз біргеміз!

 А.Шыныбеков, Орал қаласының әкімі