Кіру«УАҚЫТЫНДА ШАБЫЛМАҒАН АРАМШӨП ҚАР ҰСТАЙДЫ»
Біздің өңірде бүгінде 14 қоғамдық кеңес құрылған. Қоғамдық кеңес қоғамдағы ең өткір мәселелерге үн қосуда. Олар сан түрлі сала қызметін бақылап, кемшін тұстарын қоғам талқысында талдап, олқылықтардың орнын толтыруға жұмыстануда.
Өткен аптада Батыс Қазақстан облыстық мәслихатында қоғамдық кеңестің кеңейтілген кеңес отырысы өтті. Жиынның күн тәртібіндегі алғашқы мәселе бойынша кеңес мүшелері облысымызға танымал, туризм әсіресе, балалар туризмінде ерекше еңбегімен танымал, облыстық қоғамдық кеңес мүшесі болған Виктор Фоминді еске алып, кеңес құрамынан босату туралы шешім қабылданды.
Бұдан соң Қазақстан Республикасының Мемлекеттік қызмет істері агенттігінің Батыс Қазақстан облысы бойынша департаментінің мемлекеттік көрсетілетін қызметтердің сапасын бақылау бағыты бойынша атқарылған жұмыстар туралы аталмыш департамент басшысы, Әдеп жөніндегі кеңес төрағасы Ғалым Тұрсынбаев баяндаса, «Азаматтарға арналған үкімет» Мемлекеттік корпорациясы» коммерциялық емес акционерлік қоғамының Батыс Қазақстан облысы бойынша филиалының директоры Марат Басаров Зашаған шағынауданында тағы бір «Халыққа қызмет көрсету орталығы» ашылатынын хабарлады. Электрондық форматқа көшу құжаттарды қабылдау уақыты мен олардың санын қысқартады, әкімшілік кедергілерді жояды және қызметтерді алу процесін жеңілдететінін тарқатып айтты.
Ал 2019-2021 жылдарға арналған облыстық бюджет туралы Батыс Қазақстан облысының экономика және бюджеттік жоспарлау басқармасының басшысы Тілепберген Каюпов баяндады. Ал қысқы кезеңде автомобиль жолдарындағы көліктердің қауіпсіз және кедергісіз қозғалысын қамтамасыз етудегі жұмыстардың барысы туралы Батыс Қазақстан облысының жолаушылар көлігі және автомобиль жолдары басқармасы басшысының орынбасары Бауыржан Айтмағамбетов жеткізіп, облыстық маңызы бар автожолдарды күтіп ұстау және жөндеу жұмыстары туралы кеңінен әңгімелеп берді. – Қыс мезгілінде автожолдарды күтіп ұстау және жөндеу жұмыстарына арналған қызметкерлерге қажетті жол техникалары бар. Құрылыс мекемелерінің бос техникаларын бүгінгі күнге келісіп, арнайы оперативті түрде шығатын арнайы техника колонасы анықталды, бес бірлік техниканы жұмылдыруға жұмыстанып жатырмыз. Қар түскен кезде автожолдардың қар басатын телімдеріне көлік құралдарын үздіксіз жүріп өтуін қамтамасыз ету үшін қар тазарту техникаларының тұрақты қызмет көрсетуі ұйымдастырылатын болады. Қараша айының соңы мен желтоқсан айының басында су өткізгіш құбырларын салу жұмыстары бойынша 436 су құбырын салу жоспарланып отыр, – деген ол автожолдарды күтіп ұстау және олардың уақтылы орындалуын бақылау үшін алдағы жылдың 1 қаңтарынан бастап жол активтерінің сапасының ұлттық орталығы мекемесімен бірлесіп жұмыс жүргізетінін хабарлады.
Жиында Жаңақала аудандық Қоғамдық кеңесінің төрағасы Әлихан Досмұхамбетов орынды мәселе көтерді.
– Чапай-Сайхын автожолдарының 113-130 шақырымында Жаңақала ауданы аймағында 900 млн.-ға жуық ақшаға күрделі жөндеу жұмыстары өткізілген болатын. Бірақ соның кейбір бөлігі сапасыз салынғанына куә болдық. «Ануш-құрылыс» ЖШС өкілі сол сапасыз жолды бұзып, қайта түзеткелі тұрғанда, неге тапсырыс беруші құрылыс басқармасының өкілдері серіктестіктің материалдық жағдайына алаңдайды? Сапасыз жол салған компанияға қандай шара қолданасыз? Әлегі көп айқұш-ұйқыш жолдардан ертең тұрғындар жол апатына ұшыраса қайтеміз? – деген жанайқайын жеткізді Әлихан Декартұлы.
Тасқала аудандық Қоғамдық кеңесінің төрағасы аудандағы «Тасқала-Аққурай-Болашақ» автожолы 24 рет салынғанын жеткізді. Оның айтуынша, қақаған қыс кезінде асфальт қардан тазаланбай, бір тәуліктен артық тұрған күндері болды, «Оян» ауылының жолы бір жұма жабық тұрады, осындай қиындықтар жыл сайын қайталанып келеді екен. Сырым аудандық Қоғамдық кеңесінің төрағасы Асхат Дүйсенғалиев жалпы пайдаланымдағы автомобиль жолдары мемлекеттік меншік болып табылғанымен, Жымпиты-Ақсай жолдарындағы жағдайды реттеу керегін ескертті.
Жәнібек аудандық Қоғамдық кеңесінің төрағасы Бекет Әліпқалиев ауданның Ұзынкөл ауылдық округінің 115-110 шақырым жол жиегін жыл сайын ұзындығы бір метрге дейін жететін арамшөп қаптап кететінін айтты. – Қыс кезінде арамшөп қар ұстайды, нәтижесінде жолаушылар қиындық көреді. Тұрғындар өздері жолды аршып алады, солай бейімделген. Жаздыгүні Жәнібек ауданының 88-ші шақырым жолын қарайтын бірде-бір мекеменің техникасы келмейді. Чапай-Қазталов-Жәнібек тасжолдарына бір мердігер анықталып, ақша бөлінді ме? Уақытында арамшөп неге шабылмайды? Неше рет қадағалап тексердіңіз? – деген көкейкесті сұрақтарын қойған ол ауызша да, жазбаша да жауап беруін талап етті. Бәйтерек ауданының облыстық кеңес мүшесі Мәлік Өтешев тек Ұзынкөлден емес, Сайхынға дейін жол жағалай арамшөптен арылмайтынын тілге тиек етіп, арамшөптер уақытында шабылмай, жолдарымыз сапалы тегістелмей халықтың көңілі көншімейтінін жеткізді. Автомобиль жолдары басқармасы басшысының орынбасары Бауыржан Есқайырұлы кеткен кемшіліктердің түзелетінін, жол сапасын, жөндеу жұмыстарын әркез бақылауда ұстайтынына уәде берді.
Ал бесінші мәселе бойынша Мемлекеттік органдар мен квазимемлекеттік сектор субьектілері жүзеге асыратын тауарларды, жұмыстарды және көрсетілетін қызметтерді сатып алу саласында сыбайлас жемқорлық тәуекелдерін қысқарту жөніндегі шаралар туралы Батыс Қазақстан облысының мемлекеттік сатып алу басқармасының басшысы Бибігүл Ниетқалиева баяндама жасады.
Қоғамдық кеңес мүшелері Қазақстан Республикасының Мемлекеттік қызмет істері агенттігінің Батыс Қазақстан облысы бойынша департаментінің мемлекеттік көрсетілетін қызметтердің сапасын бақылау бағыты бойынша атқарылған жұмысы оң бағалансын, мемлекеттік органдардың бірігіп мониторинг жасау мәселесі, сыртқы мониторингке бірігіп жоспар жасап, қоғамдық кеңеспен бірге жүргізсек деп қорытындылады, жол басқармасының жұмысын да мониторинг жасап тексеруге болады деген қарар қабылданды.
Кез келген адам ел үшін маңызды мәселені облыстық Қоғамдық кеңес талқысына салып, күн тәртібіне шығара алады. Ол үшін кеңес мүшесі болуы міндетті емес. Мемлекет пен қоғамның алға дамуы үшін қажетті ұсынысты әр адам айтуға құқылы. Келісіп пішкен тон келте болмайтыны айдан анық.
Мейрамгүл ХАСАНОВА, «КазИИТУ» ғылыми-білім кешенінің
аға оқытушысы, педагогика ғылымдарының магистрі
Версия для печатиСоңғы жаңалықтар
Құқық бұзушылыққа жол бермейтін Telegram чат боты іске қосылды
Пікір үстеу