«Мен және менің полицейім» атты республикалық акция өтті

Сәуірдің 13 күні қаладағы №37 жалпы білім беретін орта мектептің ауласында «Мен және менің полицейім» атты республикалық акция аясында жол жүру ережелеріне қатысты көлемді іс-шара өтті.
Оқушылар бойына құқықтық тәрбиенің қоғамда маңызы зор екендігін сіңіру, ерік-жігердің оқушы өмірінде үлкен рөл атқаратынын түсіндіру, құқықты сақтауға тәрбиелеу және өз ойларын еркін жеткізуге дағдыландыру, жол жүру ережелерін қатаң сақтауды талап ету мақсатын ұстанған іс-шара Орал қ.ПБ мен №37 мектеп ұжымы және «Алау» балалар аула клубының ынтымақтаса жұмыстануы нәтижесінде жүзеге асты. «Алау» балалар аула клбуының жетекшісі Дариға Жасқайратқызы мен клуб құрамындағы тәрбиеленуші оқушыларының еңбегі зор екенін ерекше атаған жөн. Олай дейтініміз, аталмыш іс-шараны «Алау» балалар аула клубының ұжымы қызықты, тартымды мазмұнда ұйымдастыра білді. Бұл күнгі іс-шараға мектеп директорының тәрбие ісі жөніндегі орынбасарлары Гүлжан Бисенғалиева, Ботакөз Жасанова, №37 мектептің «Жас жол сақшылары» командасы, Орал қ.ПБ жергілікті полиция қызметі бөлімі кәмелетке толмағандар ісі жөніндегі бөлімше инспекторлары, сынып жетекшілері, жанкүйер болған ата-аналар қатысты.
Патрульдік полиция батальонының инспекторлары жол белгілерін көрсетіп, әрқайсысына қысқаша сипаттама берді. Самокат пен велосипедін үйінен ала келген оқушылар жол жүрісі ережелерін үнемі есте ұстап, көрсетілген жол белгілеріне сипаттама жасады. Ертегі кейіпкері кейпінде ортаға шыққандардың жол белгілеріне қатысты қойған сауалдарына оқушылар нақты жауаптар қайтарып, білетіндерін дәлелдеді. Оқушылармен «Дөңгелек» биін билеп, балғындарды бір сергітті. Тапқыр оқушыларға «Гауһар жолы» ұйымының менеджері Эльеонора Бекқазиева естелік сыйлықтар тапсырды.
Оқушылар бойында патриоттық рухты ұялату, құқықтық мәдениетті қалыптастыру, жол жүру ережесін, қауіпсіздік шараларын үйрету мақсаттарын көздеген «Мен және менің полицейім» атты республикалық акция аясындағы іс-шараға зор дайындықпен келген оқушыларға, «Алау» балалар аула клубының жетекшісі Дариға Ақболатоваға құзырлы басқарма өкілдері алғыстарын айтты.
Жол жүру ержесі туралы білетіндерін азғантай уақыт ішінде жеткізуге тырысқан оқушыларға шынайы ризашылығын жеткізген Орал қ.ПБ инспекторлары еліміздің ертеңгі болашақ патриоттарының әрбір қарымды істеріне толағай табыстар жолдас болсын деп тарқасты.

БҚО ПД Баспасөз қызметі