«Судың да сұрауы бар…»

Қазанның 31 – күні облыстық халық шығармашылығының үлкен залында БҚО әкімі Нариман Төреғалиев Орал қаласының тұрғындарымен кездескен болатын. Осы жиында Орал қаласының әкімі Мұрат Байменов ең маңызды мәселе – суды үнемдеу керегін тұрғындарға қатаң ескертті. Таза ауыз суды көлік жуу немесе бау-бақша суару секілді мақсаттарға шектен тыс пайдалану жағдайлары жиі кездесетінін атап өтті.
Жалпы, халықтың әл – ауқатын жақсарту бағытында атқарылған ауқымды істер туралы баяндаған шаһар басшысы өлкеде жарық, жылу және ауыз су сияқты негізгі коммуналдық бағытта бірқатар маңызды жобалар жүзеге асырылғанын, өткен жылы қалада 1,3 млрд теңгеге бір магистралдық желіні қайта жаңғырту жұмыстары аяқталып, нәтижесінде 63 көп қабатты тұрғын үй мен 12 әлеуметтік нысан тұрақты жылумен қамтылғанын айтты.
Құны 9,9 млрд теңге болатын ірі магистралдық жылу желісін реконструкциялау жұмыстары жүргізіліп, жобаның нәтижесінде 75 көпқабатты тұрғын үй мен 7 әлеуметтік нысан тұрақты әрі сапалы жылумен қамтамасыз етілген. Бұған қоса, алдағы екі жыл ішінде тағы 3 магистралдық желіні жаңғырту жоспарланып отыр. Сол секілді ауыз сумен қамту бағытында да бірқатар жұмыстар атқарылып, барлық 22 су жинау ұңғымасы қалыпқа келтіріліп, 22 тереңдік сорғы орнатылған. Өндірілген су көлемі соңғы бес жылмен салыстырғанда тәулігіне 19 мың текше метрге ұлғайып, су тапшылығы мәселесі ішінара шешімін тапқан.
«Судың да сұрауы бар» деген нақылды алға тартқан қала әкімі М. Байменов: – Барлығымыз да суды үнемдеп, оған ұқыпты қарауымыз қажет. Шағын және орта кәсіп иелері де суды үнемдеп, оны қайта өңдеуде әлемдік тәжірибеге сүйену керек, – деді.

Бұл туралы газеттің осы бейсенбідегі санынан толығырақ оқисыздар.

«Жайық үні»

Версия для печати