БҚО-ДАҒЫ ОЛИМПИАДА РЕЗЕРВІ МЕКТЕБІ АЛҒАШҚЫ ТҮЛЕКТЕРІН ТҮЛЕТТІ
Математика және физика пәні бойынша олимпиада резерві мектебі осыдан төрт жыл бұрын, 2017 жылдың 19 маусымында Батыс Қазақстан облысы білім басқармасының №523 бұйрығымен «Дарын» қосымша білім орталығының жанынан ашылған еді. Алғашқы түлектер салтанатты түрде қолдарына сертификаттарын алды.
Облыс оқушыларының зияткерлік қабілеттерін анықтау, оны дамыту мақсатында ашылған математика және физика пәні бойынша Олимпиада резерві мектебіне 40 оқушы қабылданған болатын. Мектепте оқумен бірге жүргізілген қорытынды бақылаулар, олимпиадалар нәтижесінде оқушылар іріктеліп, бүгінде 22 оқушыға Батыс Қазақстан облысы білім басқармасының «Дарын» қосымша білім орталығының базасында Облыстық олимпиада резерві мектебін бітіргендігі туралы сертификаттары табыс етілді.
4 жыл ішінде әртүрлі облыстық, республикалық, халықаралық олимпиадалардың жеңімпаздары, жүлдегерлері, қатысушылары атанған оқушылар және осы оқушыларды сессия, сессияаралық кезеңдерде білім нәрімен сусындатқан ұстаздар білім басқармасының алғыс хат, дипломдарымен марапатталды.
Салтанатты жиынның соңында Олимпиада резерві мектебінің оқушылары «Жайық дарыны» атты тақтаға өз есімдерін қалдырып, раушан гүлдерін отырғызды.
zhaikuni.kz
Версия для печати
Пікір үстеу